Pampetudungia 9 - Sura Malelaha

¹ Roo indo, malaeka au kalima motawue worimi tatamburuna, hai unga pea kuita haogu betue au manawo hangko i langi toa i dunia. Betue iti rawei pegili baba kabe ngkapate au bara tehoka kakaladuna.

² Betue iti mobungkahi mpuumi baba kabe ngkapate. Kanabungkahina, mengkaoremi rambu au moramuku, nodo rambu au mesupa hangko i tinewo au rahuwe. Alo hai laerawa mewali makaindi nabalungkuhi rambu au hangko i kabe ngkapate.

³ Hangko i lalu rambu iti, mesuwumohe kakomba au mendaulu i dunia. Kakomba iti raweihe pehoi au nodo pehoi topehingki.

⁴ Kakomba iti, barahe rapaliu mopakarugi hehi ba kau ba tuda-tuda. Au peisa pea rapakarugi, tauna au bara ara pekatandaina Pue Ala i wingkenda.

⁵ Barahe rapaliu mopapate manusia, agaiana rapaliu peahe mepopeahi-ahi i lalu lima wulana. Kamahaina pehoinda kakomba iti nodo kamahaina pehoi topehingki.

⁶ I lalu lima wulana iti, manusia mohaokihe rara bona mate, agaiana barahe peisa mate. Rapeinaomi mate, agaiana bara worihe mate.

⁷ Kakomba iti nodohe dara au rapesawii surodado lao mombeala. I waanda ara au nodo songko bulawa. Lindonda nodo lindo manusia.

⁸ Weluanda nodo welua towawine, ngihinda nodo ngihi singa.

⁹ Pondanda nabalungkuhi ruke au nodo badu besi. Pomoni kapinda nodo pomoni hangguruma kareta au radii dara lao mombeala.

¹⁰ Ikunda hai pehoinda nodo iku hai pehoi topehingki. I ikunda iti, ara kuasa mampopeahi-ahihe manusia i lalu lima wulana.

¹¹ Ara datunda au moparentaihe. Datunda iti, iami malaeka au mokampai kabe ngkapate. Hangana i lalu basa Ibarani, iami Abadon. I lalu basa Yunani, Apolion. Lempona, Topegero-gero.

¹² Kahurewu au nguru-nguruna liumi. Agaiana ara mani rompaka kahurewu au ina meusu.

¹³ Roo iti, malaeka au kaini motawue tatamburuna. Kuhadi hambua wotu hangko i iba huno meja pointua dupa au rababehi hangko i bulawa au i lindona Pue Ala.

¹⁴ Nauli wotu iti i malaeka au kaini, “Nukabahamohe iba malaeka au tehilu i owai Eprat.”

¹⁵ Nakabaha mpuumohe. Malaeka au iba iti rapasilolonga ami bona i pare, i wula, i alo hai i jaa au napakanotoahe Pue Ala bona mopapatehe hangkira talu hangko i ope-ope tauna.

¹⁶ I bokonda malaeka au iba iti, meulahe rongatu juta surodado topodara. Kabosanda iti kuisa, lawi ara au mouliangaana.

¹⁷ I lalu pampatongawa iti, moitana surodado iti hai dara au rapesawii. Surodado iti, ope-opehe mebadu besi. Badunda malei nodo api, maeta-eta nodo rambu, hai mabada ntepuu nodo watu belerang. Waa daranda nodo waa singa, hai hangko i nganganda mesuwu api, rambu hai belerang.

¹⁸ Hangkira talu hangko i manusia rapapatemi hai talu pakana pepopeahi-ahi ide: api, rambu hai belerang au mesuwu hangko i nganganda dara iti.

¹⁹ Kuasanda dara iti ara i nganganda hai i ikunda. Ikunda iti, nodo waa ile. Hai iku iti mampopeahi-ahihe manusia.

^20-21 Agaiana manusia au bara rapapate i pepopeahi-ahi iti, mia-miahe bara menoso hangko i babehianda au kadake. Barahe mau mampenosoi pepapatenda, pedotinda, babehianda au merikai hai panangkanda. Bara worihe mokabaha penombaanda i seta hai i lengge anitu au rababehi hai taienda haduduanda. Lengge iti rababehi hangko i bulawa, salaka, tambaga ba hangko i kau. Lengge au rababehi iti, barahe meita, barahe mehadi, hai bara worihe lumao.