Pampetudungia 15 - Sura Malelaha

Naninda topenangi

¹ Roo indo, kuita mbulimi i langi hambua tanda au mahile hai au mewulungai: pitu malaeka hai pitu pakana pepopeahi-ahi au kahopoana. Ane hopomi pepopeahi-ahi ide, opemi karumpuna Pue Ala i tauna i dunia.

² Hai kuita ara au nodo tahi kamaembana, lenggena nodo kaca mogalo api. Hai i wiwi ntahi au nodo kaca iti, kuita bosa tauna meangka. Tauna iti au monangihe binata au kadake, lawi barahe menomba iria, barahe menomba i lengge binata iti, hai barahe modoko lamoro au mopahuru hangana. Tauna au menangi iti, meangkahe i wiwi ntahi au nodo kaca, hai mokingkihe kecapi au naweihe Pue Ala.

³ Mamponanimohe nanina nabi Musa, hawina Pue Ala hangkoia, hai nani pebilanda i Ana Dimba. Node naninda: “O Pue Ala, mahile hai maroa ntepuu babehiaMu, Melumbu kuasaMu hangko i hinangkana! Ope-ope au Nubabehi, manoto hai tou. Oiomi datunda ope-ope tauna i dunia.

⁴ Pue, hema pae au bara meula Irio? Hema pae au bara mopangaku kamasukuna tuwoMu? Lawi Oio pea au malelaha. Ope-ope tauna batena menomba Irio, Lawi tongawami katouna pobotusiMu i hinangkana.”

Pitu malaeka hai pitu pambolia au moihi pehukuna Pue Ala

⁵ Roo iti, kuita hologa malelaha ntepuu au ara i bambaru malelaha au i suruga rabungkahimi.

⁶ Hai pitu malaeka au moanti pitu pakana pepopeahi-ahi mesuwuhe hangko i Souna Pue Ala. Hampinda rababehi hangko i bana au bula meningki hai au mengkila-ngkila. Pondanda rawewehi bulawa au nodo pampou.

⁷ I pesuwunda malaeka iti, hambaa hangko i iba pinatuwo au mantoleli i kadera kadatuana Pue Ala moweihe pitu mbuana pambolia hangko i bulawa au moihi karumpuna Pue Ala au tuwo hawe i hae-haena.

⁸ I tempo iti, Souna Pue Ala i suruga unga pea buke rambu au mesupa hangko i peawana Pue Ala hai hangko i kuasaNa. Bara ara hadua au peisa mesua i lalu, ane bara mani hopo pitu pakana pepopeahi-ahi au raanti malaeka au pitu.