Matiu 2 - Sura Malelaha

To Mata alo mohaoki Yesu

¹ I tempona Datu Herode moparenta, Yesu rapoanaka i boea Beteleme i tampo Yudea. I tempo iti, arahe bahangkia tauna au hawe i Yerusale hangko i tamponda au karao ntanda i Mata alo. To Mata alo iti mapandehe mampeita tanda i betue.

² Mekunemohe i to Yerusale, rauli, “Iumba Datunda to Yahudi au hangko rapoanaka iti? Kiitami betue i Mata alo au mopakanoto pesupaNa. Ido hai maingkai, lawi kipeinao menomba Iria.”

³ Kanahadina Datu Herode bambari iti, tingkara laluna, nodo worihe ope-ope tauna i Yerusale.

⁴ Hangko inditi, nakakiomohe ope-ope kapala tadulako mpenomba hai guru agama Yahudi bona maihe mogulu. Moteruhumohe ope-ope, mekunemi Datu Herode irihira, nauli, “Iumba mpuu karapoanakana Datu Topehompo au nadandi Pue Ala hangkoia?”

⁵ Mehanahe, rauli, “I boea Beteleme i tampo Yudea, lawi arami lolitana Pue au nauki hadua nabi hangkoia. Nauli Pue:

⁶ ‘Boea Beteleme i tampo Yudea, barako boea au tepakokoi. Ina mahile hangamu hangko i ope-ope boea i tampo Yudea. Lawi hangko irio ina mesupa hadua Tadulako Mahile; batena Ia au motadulakoi taunaNgku to Isaraeli.’ ”

⁷ Kanahadina Herode lolitanda, nakakio ngkandiimohe to Mata alo dati raisa tauna ntanina. Napekunehe impira mpuu betue iti nguru-nguruna mesupa.

⁸ Roo indo, natudumohe lao i Beteleme, nauliangaahe, “Laomokau i Beteleme, nihaoki mpuu Anangkoi iti. Ane nilambimi, maina niuliangaa bona lao worina menomba Iria.” Lao mpuumohe.

^9-10 I tanga rara, moita mbulihe betue iti ntanda i Mata alo. Matana ntepuuhe. Betue iti mampoioruahe duuna mengkaroo i wongko sou paidaana Anangkoi iti.

¹¹ Kahawenda, mesuamohe i lalu sou, hai liliuhe moita Anangkoi iti hihimbela hai Maria inaNa. Motumpamohe menomba Iria. Roo indo, mobungkahimohe pambolia anu-anunda, hai mohuhuhe popenombanda Iria. Popenombanda iti iami bulawa hai anu-anu mawongi au masuli nodo dupa hai mur.

¹² Tanga kaindi, Pue Ala mampopaingaahe i lalu pangipinda, Nauli, “Ineekau mesule i Herode!” Mewali i pesulenda i tamponda, barahe moliu i Yerusale, moulamohe rara ntanina.

Yusupu moanti Maria hai Yesu lao i tampo Masiri

¹³ I pesulenda to Mata alo, mampatongawa mbulimi malaekana Pue i Yusupu i lalu pangipina. Nauli malaeka iti, “Yusupu! Herode mohaoki Anangkoi iti lawi napeinao napapate. Mearomoko, antimide Anangkoi iti hai inana lao i tampo Masiri! Maidamokau hampai inditi duuna mololita mbulina irikamu.”

¹⁴ Kaindi iti, mearomi Yusupu, hai moanti Maria hai Yesu lao i tampo Masiri.

¹⁵ Maidamohe inditi duuna Datu Herode mate. Mewali, tepabukeimi Ngkorana Pue au napahawe nabiNa hangkoia au manguli node, “Kukakio mai AnaNgku hangko i tampo Masiri.”

Anangkoi i Beteleme rapapatehe

¹⁶ Kanaisana Herode karaakalangina to Mata alo, rumihi ntepuu karumpuna. Ido hai napohawaami surodadona lao mopapate ope-ope anangkoi tobalilo i Beteleme hai i boea au hungku inditi bona Anangkoi au ina mewali datu kana wori rapapate. Naisa mpuu Herode impira pesupana betue iti, lawi napekune hangkoia i to Mata alo. Ido hai natuduhe bona ope-ope anangkoi tobalilo i Beteleme rapapate, mepongka i analei au hangko rapoanaka hawe i anangkoi au romparemi tinuwunda.

¹⁷ Bosa ampu boea Beteleme moteriahi ananda au rapapate surodadona Herode. Ido hai tepabukei lolitana nabi Yeremia hangkoia au manguli:

¹⁸ “I boea Rama tehadi topoteria hai topandawi. Raheli moteriahihe anana. Bara mau rapalindo, lawi barapohe ara.”

Yusupu moanti Maria hai Yesu mesule hangko i tampo Masiri

¹⁹ Tanganda mani Yusupu, Maria hai Yesu i tampo Masiri, matemi Datu Herode. Roo indo, hawe mbulimi malaekana Pue i Yusupu i lalu pangipina.

²⁰ Nauli malaeka iti, “Tauna au mampeinao mopapate Anangkoi iti, matemi. Mewali, mearomoko, antimide Anangkoi iti hai inana, mesulemokau lao i boeami i tamponda to Isaraeli.”

²¹ Mearo mpuumi Yusupu moanti Anangkoi iti hai Maria mesule lao i tamponda to Isaraeli.

²² Agaiana nahadi Yusupu, Arkelaus anana Herode mopahuru umana mewali datu i tampo Yudea. Mewali, langa mesule inditi. Roo indo, ara mbuli au napahawea Pue i lalu pangipina. Ido hai laohe i tampo Galilea,

²³ hai maidahe i boea au rahanga Nasare. Mewali tepabukeimi lolitanda nabi hangkoia kana i Datu Topehompo au manguli node: Ia ina rauli to Nasare.