Ibarani 8 - Sura Malelaha

Tadulako Mpenomba Mahile i pototowia wou

¹ Idemi patoana paturongki: ara mpuu Tadulako Mpenomba Mahilenta au mohuda ntanda i koanana kadera kadatuana Pue Ala i suruga.

² Ia mampopolumao bago mewali Tadulako Mpenomba Mahile i paidaa malelaha, iami Bambaru Malelaha au naaro Pue, bara au naaro manusia.

³ Ope-ope Tadulako Mpenomba Mahile raangka bona mohuhu binata hai popenomba ntanina i Pue Ala. Nodo wori, Yesu Tadulako Mpenomba Mahilenta hangangaa mohuhu popenombaNa i Pue Ala, iami wataNa haduduaNa.

⁴ Ane rapana Yesu ara mani i dunia, Ia bara mewali tadulako mpenomba, lawi arahe tadulako mpenomba au mohuhu popenombanda i Pue Ala moula Aturana Musa.

⁵ Tadulako mpenomba iti mobagohe i lalu sou penombaa i dunia ide. Sou penombaa iti mewali pandiri irikita kana i apa au ara i suruga. Ido hai hangko damani nabi Musa moaro Bambaru Malelaha hangkoia, Pue Ala mouliangaa node: “Nukatuinao! Ope-ope iti hangangaa nubabehi moula apa au ratudungiamoko i wongko bulu!”

⁶ Agaiana pobagona Pue Yesu meliu kamaroana hangko i pobagonda tadulako mpenomba i dunia ide, lawi Yesu mewali nente au mopahawemi podandina Pue Ala au wou, au melumbu kamaroana hangko i podandi au napahawemi Musa. Hai hangko i podandi au wou iti, molambike dandina Pue Ala au meruu kamaroana.

⁷ Ane rapana podandi au napahawemi Musa bara ara kamakurana, kebarapi paraluu tahaoki rara ntani mohintuwu hai Pue Ala.

⁸ Agaiana Pue Ala molambi kamanawonda taunaNa, hai Nauliangaahe node: “Pehadingi! Hambela tempo ina mopaarana podandi au wou i to Yahudi, maroa au maida i tampo Isaraeli, maroa au maida i tampo Yehuda.

⁹ Podandi au wou, bara ina nodo podandi au Kupaara hai toiorunda hangkoia i kaKunininda mesuwu hangko i tampo Masiri. Lawi barahe mampeulai apa au teuki i podandi au nguru-nguruna, alana barapohe Kukadipura.

¹⁰ Mewali, idemi podandi au ina Kupaara hai to Isaraeli i alo au ina mai: HawaNgku ina Kuwoli i lalu pekirinda hai Kuuki i lalunda. Ina mewalina Pue Ala au rapenombai, hai ihira ina mewalihe taunaNgku.

¹¹ I tempo iti, barapohe paraluu mopaguru halalunda ba hangka ranganda bona raisaNa. Lawi ope-opehe ina moisaNa, maroa au koi tuwona ba au mahile tuwona.

¹² I tempo iti, ina Kuampungi salanda, hai dosanda barapi ina Kukakatuinao.”

¹³ Mewali, i lalu ngkora inona, Pue Ala mampololita kana i podandi au wou, hai moula lolitaNa, podandi au nguru-nguruna hangangaa rapahuru lawi haemi. Mewali, podandi au hae iti barapi mobundu, batena ratende hai rapahuru hai podandi au wou.