Vilipai 1 - V'nen P'as iv'i Turanien Trtarep' m'a Turanien M'dah

A Pul m'ei a Timuti arvr ip'as anr m'ertu p'asan Atua avlak arna nut a Vilipai

¹ Kam'em' nrv'i a Pul m'ei a Timuti karv'i m'ertu na m'akarienan a Iesu Kristu. Nrtep'a v'nen laha iv'alet asnm'i, kvv'i m'ertuan a Kristu Iesu kvlak arna nut a Vilipai, m'er elta m'er tikun udlani.

² Nrrn ti Atua, iv'i a Tetiad, m'ei a Mlin Lilad a Iesu Kristu apartu vtmien m'a tamat a kam'i.

A Pul itu tamat sanar a ti apavlini a nava p'kl p'asan a Iesu

³ Kana nvr ip'as an Atuak nakl naran nv'ahur kam'i,

⁴ Katu tamat nakl, kamiman sei sanam'i udlani karn ip'as iel.

⁵ Sena ti kvp'lt m'a kam'em' arna pari na v'nen p'as, itudina hin arna napn itauamu dav'a kaier dika.

⁶ Nrndu mamh si laha, ti Atua la itendina sera pari p'as a nlm'i ha, hin ipahiris a parian dav'a ipaier napnan a Iesu Kristu.

⁷ Iviviln a ti p'ev'ahur kam'i udlani ipanap'i lera, sena ti nv'ahur kam'i udlani arna nlk nakl. Sena ti kam'i kvp'lt m'a kana arna vtmienan Atua naran np'tir kavrp'ep'a v'nen p'as, kavp'lt m'a kana naran np'resin.

⁸ Sena ti Atua irndu nut nrn nam'er a ti p'ela kam'i inap'ei arna vtmienan a Iesu Kristu.

⁹ Ntu tamat a si laha, a ti vtmienam'i ipama kalil mau nakl, a ti pavrndu sei, kavrndu navanel na p'kl viviln.

¹⁰ A ti kam'i pavrndu v'ata ip'as istudau, a ti p'klm'i ipaviviln, a ti m'ertu akavpasla si stu kinkin asnm'i dav'a ipaier napnan a Kristu.

¹¹ Nrn ti pavlini a nava p'kl p'as la iendan asn a Iesu Kristu ha, a ti pavpatei Atua kavani ti nahan ipav'a eia.

A Pul irn ip'as naran avrp'ep'ei a Kristu

¹² V'eti tv'alk, nrn ti kam'i pavrndu ti sei ier kana imhmah a pari na v'nen p'as ilil mau.

¹³ Sena ti nelnal avlak kavp'aur nmaha kavman lil m'er m'ertu uraur udlani avrndu ti np'resin sanan a Kristu.

¹⁴ Hilaha tv'ald istudau aranan a Mlin Lilad avp'tir ihua mau, sena ti avla ti np'resin, kavvrp'ep'a v'nen p'as, ahavdedrn ml.

¹⁵ Aau, hir kinkin avvrp'ep'ei a Kristu sena ti nlr ipr tv'alr kavrn ti apavan der, v'eti hir kinkin avvrp'ep'ei arna nl p'as.

¹⁶ M'ertu itauamu hara avvrp'ep'ei a Kristu sena v'lv'elien uaki, ahavvrp'ep'ei arna navanel viviln. Avv'ah ti apavtu der uraur a kana ml ipap'lt m'a p'resin.

¹⁷ V'eti hir uraur avvrp'ep'a v'nen p'as arna vtmien uaki, kavrndu ti Atua itu kana a ti p'ep'tir sena v'nen p'as.

¹⁸ Inap'i? Avvrp'ep'ei a Kristu arna navanel ururaur. Hir kinkin avvrp'ep'ei arna navanel na hap'ilien, hir kinkin uraur avvrp'ep'ei arna v'nen dau. V'eti kana nrn ip'as sena ti avvrp'ep'ei a Kristu. Aau, p'ern ip'as ani uam.

Silv'ienak iv'i a Kristu

¹⁹ Sena ti nrndu ti ipatauatah, Atua ipalev'la kana sena tamatam'i, karndu ti M'im'iln a Iesu Kristu ipasr lm'ak.

²⁰ Nrni ihuadau a ti nkamamih sena si kinkin, v'eti nrn si laha uaki, a ti p'ep'tir ipahua uam, inep'a nut nten sarei inap'ei nakl, a ti hilaha ml nahan a Kristu ipav'a eia arna p'akk, arna silv'ienak v'aha arna m'ienak.

²¹ Sena ti asnk, silv'ienak iv'i a Kristu, v'eti ipavr ti p'am'a, ipap'as mau.

²² V'eti ipavr ti p'esilv' uam kalak al p'akk, nava pariak ipaiak. Kana narndu sei p'ev'lai.

²³ Ihuat, sena ti v'ahienak iru. Nrn ti p'eln silv'ienak laha kalak m'ei a Kristu. Ki lera ip'as mau.

²⁴ V'eti ip'as mau a ti p'esilv' kalak uam sanam'i.

²⁵ Aau, nrndu ti ipanap'i lera, ti p'elak m'a kam'i udlani uam a ti pavhua mau kavrn ipap'as mau arna v'ahien p'asam'i.

²⁶ A ti kam'i pavani ti nahan a Iesu Kristu ipav'a eia mau, sena ti p'ama asnm'i ml.

Pavp'tir ipahua sena v'ahien p'as

²⁷ V'eti p'klm'i ipaviviln a v'nen p'asan a Kristu. Laha, ipavr ti p'ama kala kam'i, v'aha ipavr ti nkalak asnm'i, p'ern v'nen ivrur kam'i a ti kvp'tir ihua, nlm'i iamk kavp'lt arna v'ahienam'i, sena v'ahien p'as na v'nen p'as,

²⁸ Kaavdedrn sena m'ertu avmlen kam'i. Si lera ipav'iv'en anr ti hir apavmln, v'eti ipav'iv'en a kam'i a ti Atua ipalev'la kam'i.

²⁹ Sena ti Atua iatu kam'i a ti pavv'ah a Kristu uaki, v'eti a ti der ipaier kam'i aranan ml sanan.

³⁰ Nauram'i inap'amk m'a nki kvla ti kana nlak aranan tituei, kavrn ti iter asnk hilaha.