Upataia 1 - V'nen P'as iv'i Turanien Trtarep' m'a Turanien M'dah

A Mlin Eia iparp v'anu a Itum

¹ V'nen laha ivrur sei a Upataia ilei. A Mlin Atua ivrp'ep'a si laha, ier a Itum (Ntvrn sera v'nen iamk, idan asn a Mlin Eia. Aau, ittep'a sera v'nen iamk, a ti ipav'a asnr v'anudl nakl, kavr ti a, “Pavp'tir. Aau, p'vp'tir a ti p'van naur”).

² A Mlin Eia iv'ana, kavr ti a, “Palei, Kana p'ani ti pav'i v'anu pa ipamk asnr v'anu nakl. Arm'ertu apavlep'lah ipastudau.

³ Nakm kuklh a nlm, v'eti si lera ithap'il sarei anh. Nakm, la klak arna nut nav'et itupr hin, la kauada nut eia na mrnut ha--kav'ana m'ah a nlm, kavr ti a, ‘?Hin ak ipakasr kana, a ti p'ars a nadep'?’

⁴ Aau, nakm kan nihm arna nut eia dau, inep'a sera nut np'el iani inap'ei. V'eti Kana p'elev'lah dan arna nut lera, kakasrh auei.” A Mlin Eia iv'ana, kavr si lera.

⁵ “?Ipavr ti m'ertu na v'nv'nahien advrama asnm, aau, idvr ti advrama lihat--(U, p'etrlah uam!)--advv'nah sei dav'a ti akavrn si kinkin ml, v'aha inap'i? ?Ipavr ti m'ertu advrama asnm, a ti apavlev'lar krepam, advln krep kinkin a ti m'ertu apavtktak ani, v'aha ihei?

⁶ !U, apatala sei arna v'anuan a Isau dav'a ti akapasla si kinkin ml! !Apaklau anr si p'sp'asan, la ittutuan sarei ha!

⁷ Arm'ertu udlani, la avp'lt m'ah itauamu ha, apavtp'h dav'a ti paier dari na v'anu. Arm'ertu avlak arna tamat m'ah apavhap'il m'ah kavsiv'h. Arm'ertu avhan p'ret m'ah apavhl tah sanam, a ti pars a nln. M'ertu kinkin idarndaui.”

⁸ A Mlin Eia iv'ana, kavr ti a, “?Karndu ti, arna napn lera, p'ekap'nr m'ertu a Itum, la aviak a v'ahien p'as ha, kalev'la p'kl na ti aparndu sei dan arna ptha lilil a Isau?

⁹ U Teman, arna naran lera, ardu huam apavrn istu, v'ahienar ipars. Dav'a, apatrpep'nr m'ertu udlani, la avlak arna ptha lilil a Isau ha, apatrpep'nr udlani.

A Itum iutakm an a tv'aln

¹⁰ Sena ti ktrp sarei a tv'alm, iv'i a Sikup, mamihien ipatavkarh, laha, p'etrlah ikahiris naran.

¹¹ Arna napn kp'tir a tv'eliel--aau, arna napn v'anudl avlev'lar m'rnuran, kavani ti avp'resin, naran m'rau avrama eim na pn liu na v'anu lil kavan hlhal sanan a Serusalem--nakm kp'lt m'er arm'ertu lera kanep'a sarar.

¹² V'eti iap'as a ti klak kap'a tv'alm arna napn lera, arna napn a ti iv'a kap'resin. Iaviviln a ti kvtma karn ip'as arna napn a ti avutakm anr arm'ertu a Suta istudau. Aau, iaviviln a ti kv'ana kuklh arna napn a ti avlak arna der lil.

¹³ Iap'as a ti kv'el kadav'a eim na pn liuar m'ertuak arna napn na ti der lil iari. Nvrdaui, iap'as a ti kp'tir kap'ar naran avutakm anr m'ertu arna napn na ti der lil iarr. Iv'i si stu, a ti kv'nah siar arna napn na ti der lil iarr.

¹⁴ Aau, iap'as a ti kp'tir arna nut navanel itupr hin, a ti pani ti arm'ertu, la atvruh sarei ha, akavruh ml. Iv'i si stu iamk a ti kuadar arm'ertu avlak uam, sarei kataur al lm'ar m'ertu, arna napn na der lil.

¹⁵ Sena ti napnan a Mlin Eia, la ipaiarr v'anu udlani ha, itmima sarei. Ipanep'a nut nakm kten sarei, ipam'alet aranam ipanap'i lera pr. Aau, iparph, ipam'alet arna ptm pr.

¹⁶ Sena ti, ipanep'a nut kam'i ktvm'n sera sei arna ptha lilak, arv'anudl udlani apavm'n sei ipanap'i lera, akavhiris. Aau, apavm'n sei, kavdrlm'i, dav'a ti ipanep'a ti adavsilv' naran kinkin.

A Isrel ipasiv'i uam

¹⁷ V'eti ptha lil a Saiun ipav'i nut alev'la natei. Ipav'i nut na p'kl p'as. Laha, arm'ertu na nl nam'elan a Sikup apavlev' sei avrn ip'as ani nakl.

¹⁸ Nl nam'elan a Sikup ipav'i nap' lil ipamk, aau, nl nam'elan a Susev' ipav'i nap'. V'eti nl nam'elan a Isau ipav'i nina m'am'a uaki. Laha, nap' lera ipaiarr kalev'lar udlani, laha, m'ertu kinkin ikasilv' ml arna nl nam'elan a Isau.” Sena ti a Mlin Eia itv'ana sarei.

¹⁹ Sarei, arm'ertu arna Saut apavlav'r ptha lililan a Isau. Arm'ertu avlak auei arna m'lden apavlev' nut a Vilistia. Aau, apavlav'r pitvetar arm'ertu a Ivrem, kavlav'r pitvetar arm'ertu a Sameria. A P'ensamin ipalev' v'anu a Kiliat.

²⁰ Sarei, arm'ertu a Isrel, la avstudau kavp'resin ha, hir apavlev' nadep'ar arm'ertu a Kenan, ipav'a kaier a Sarevat. Laha, arm'ertu a Serusalem, la avp'resin kavlak a Sarevat ha, hir apavlav'r v'anu lilil arna Saut.

²¹ Sarei, arm'ertu na v'nen hua apavrav'a kavier ptha lil a Saiun, a ti apavv'ana hua m'er ptha lilil a Isau. Laha, v'anu ipav'i nkan a Mlin Eia.