Susua 1 - V'nen P'as iv'i Turanien Trtarep' m'a Turanien M'dah

Atua itu parei an a Susua

¹ Naran a Musis, la iv'i dui na m'akarienan Atua ha, itam'a sarei, a Mlin Eia iv'ana m'ei a Susua, a natn a Nun, la isr lm'an a Musis nakl ha, kavr ti a,

² “A Musis, la iv'i dui na m'akarienak ha, itam'a sarei. Sena si lera, pilaph kav'el, nakm m'er arm'ertu laha udlani, kavluvn a nauei nahan iv'i a Surtan, nakm, m'er arm'ertu a Isrel laha, kavier nadep' ntau anr.

³ Nadep' udlani, la pavv'el aranan ha, nttu sarei a kam'i inep'a nut nvr an a Musis inap'ei.

⁴ Nadep' lera iter a nut kaka kaier a Lepanun, kadav'a kaier nauei lil nahan iv'i Iuvretis, kadav'a kaier nadep'ar ardu a Het, kadav'a kaier Nata Lil, iv'i nut neiel itpl dan. Nut udlani lera ipav'i nadep'am'i.

⁵ Arna silv'ienam udlani m'ertu kinkin ikasiv'h. Kana p'ep'aurh, ipanep'a nut np'aur a Musis inap'ei. Kana nkalnh naran kinkin, nkaruh asnm naran kinkin.

⁶ Pap'tir ipahua, madedrn, sena ti nadep' udlani kana ntturan sarei anr a tetiar m'ertu laha, nakm patupapri katau anr a ti ipav'i nkar.

⁷ Pap'tir ipahua pr, madedrn, a ti pauada mamh V'nen Hua udlani, la a Musis, iv'i dui na pariak, itau anh ha. Mav'el kavavh, kadav'a arna m'ldaum v'aha m'ir nam, a ti si udlani ipap'as asnm arna nut udlani pav'a aranan.

⁸ Maln ti pavrp'ep'a V'nen Hua iter arna ruplet laha ipel. Pav'ahur mamahi ren m'a lihat, a ti pauada mamh si udlani aulul ani a nln. Sarei, ipani ti navanelam ipap'as m'a si udlani pani ipap'eset.

⁹ !Palei, ntvr sarei anh! Pap'tir ipahua, madedrn, mav'ahur parndau a der, v'ahienam imahrs, sena ti Kana nv'i Mlin Lil kav'i Atuam p'elak asnm arna nut udlani pav'a.”

A Susua itep'a v'nen a ti apavdadar

¹⁰ Sarei, a Susua itu v'nen anr armlinar m'ertu a Isrel, kavr ti a,

¹¹ “Pavrav'a asnr m'ertuad udlani avlak unanut atlaha, kavvr anr, kavvr ti a, ‘Pavandedp' kam'i, sena ti napn ipatl mau, p'vv'el kavluvn a nauei nahan iv'i a Surtan, kavrav'a kavua nadep' Atua itau a kam'i.’ ”

¹² Sarei, a Susua iv'ana m'a nl nam'elan a Rup'en, m'a nl nam'elan a Kat, m'a pna nl nam'elan a Manasa kavr ti a,

¹³ “Pavv'ahur mamh v'nenan a Musis la iv'i dui na parian Atua ha, naran ivr a kam'i kavr ti a, ‘A Mlin Eia iv'i Atuam'i ipani ti pavrnrn kam'i arna nadep' laha.’

¹⁴ Tav'etam'i, m'er a netm'i, m'er tv'elm'i apavlak dei arna nadep' laha, iv'i nadep' a Musis itu kam'i a tv'eliel na nauei laha nahan iv'i a Surtan. V'eti kam'i udlani kvv'i m'rnur hua, pavua su nauram'i kavtauamu anr, kavsr lm'ar.

¹⁵ Dav'a, ipaier naran artv'elm'i apavrnrn hir, inep'a nut kam'i ktvrnrn sera kam'i inap'ei, ipaier naran hir apavua nadep' la a Mlin Eia iv'i Atuam'i itau anr ha. Sarei, kam'i pavm'alet arna nadep' laha, la a Musis iv'i dui na parian Atua itu kam'i ha, arna tv'eliel na nauei a Surtan, arna nut neiel itpeia dan, kavrn ip'as atlera.”

¹⁶ Sarei, avvrpren a Susua, kavvr ti a, “Si udlani ktvr sarei, p'vani, kavrav'a a nut udlani patep'a kam'em'.

¹⁷ Kam'em' p'vsapa v'nenam inep'a nut nvsapa v'nenan a Musis udlani inap'ei. Ip'as a ti Atua ipalak m'ah, ipanep'a nut ilak m'ei a Musis inap'ei.

¹⁸ Ipavr ti m'ertu kinkin ikaan sei kvri, iarn ti ipasapa v'nenam, ikam'a pr. Pap'tir ipahua uaki, madedrn.”