Sevanaia 1 - V'nen P'as iv'i Turanien Trtarep' m'a Turanien M'dah

¹ V'nen laha ima asn a Sevanaia, iv'i a natn a Kusi, a natn a Ketalaia, a natn Amaraia, a natn a Esekaia, arna naran na ti a Susaia, la iv'i a natn Amun ha, iv'i mlin a Suta. Iv'i v'nenan a Mlin Eia.

Napn lilan a Mlin Eia

² A Mlin Eia iv'ana, kavr ti a, “Kana p'elev'la si udlani arna nah nadep', akalei ml.

³ P'elev'lar m'ertu m'er si dm. P'elev'lar m'anh avlak arna p'knaran, m'er tilau avlak al nata, m'er nmah atkakapr sarei, m'er arm'ertu na si stu. P'etrlar m'ertu arna nah nadep'.” A Mlin Eia iv'ana, kavr si lera.

⁴ Sarei, ivr ti a, “P'ah lm'ak asn a Suta, m'er arm'ertu udlani avlak a Serusalem. P'etrla si udlani, la apatei a Pal m'ei ha, arna nut laha. P'elev'la nahar pris, la avpatar aitul ha, kalev'la nahar prisar v'anudl.

⁵ Arki lera avlak arna drl nmah kavpata si udlani iter arna p'knaran. Avpata nahan a Mlin Eia kavturan sei arna nahan, v'eti avturan sei ml arna nahan a Milkum.

⁶ Avv'i m'ertu atvvav sera hir arna navanel, ahavsapei a Mlin Eia ml. Aau, adavtala an a Mlin Eia, adavtu tamat kavmiman sei asnn.”

⁷ Pap'tir arna nahn a Mlin Eia, v'eti mavr si kinkin, sena ti napnan a Mlin Eia itv'i ti ipama ra. Sena ti a Mlin Eia itendedp' sera sakrivais iamk, itmiman sarei anr m'ertu a ti apavrama.

⁸ A Mlin Eia iv'ana, kavr ti a, “Laha, ipatu hin arna napn na sakrivaisan a Mlin Eia lera, Kana p'erpr m'ertu lilil m'er a natn a mlin, m'er arm'ertu udlani avua klusa m'rau nakl.

⁹ Arna napn lera prki, p'erpr m'ertu avsihavs a ti tlr ikaier karliu, la avani ti nmahar mlinar avlini a hap'ilien, la avrprp m'ertu ha.”

¹⁰ A Mlin Eia iv'ana, kavr ti a, “Arna napn lera, drlr m'ertu avrn istu kavvalau ipaiak, ipadan arna pn liu na tilau. Apavtakal arna kka v'anu lil, avr ti iv'i Tv'el Nut. Sarei, aparn drl sei ikakr istudau, ipadan asnr mrnut nakl.

¹¹ !Arm'ertu kvlak a Maktes, pavtakal eia! Sena ti attrpep'n sarar m'ertu avulul a sei nakl. Attrla sarar m'ertu avp'aur nav'et nakl.

¹² Laha, ipatu hin arna naran lera, Kana p'eua lait ipamk kaklau a sei arna nut a Serusalem. Sarei, p'erpr m'ertu atvlak mamh sarei, la avvr a nlr, ‘A Mlin Eia ikahan si p'as kinkin, sarei, ikahan si stu ki.’

¹³ Sena si lera, ultinar ipama kav'i sei alav'i arna naur. Nmahar apavrama kavv'i nut m'ertu ialak ml. Apavhl nmah, v'eti akavlak a nlr. Apavlu pitvet na nahau na krep, v'eti akavm'n naui m'iel idan aranar.”

¹⁴ Napn lilan a Mlin Eia itmima sarei. Itmima sarei, aau, itama ra. Nadl na napnan a Mlin Eia ihaau pr. Ardu hua apavv'ara eia arna napn lera.

¹⁵ Napn lera iv'i napn na nl rer, kav'i napn na der, aparn istu ipastudau. Iv'i napn na m'alk, kav'i napn na ti akala neiel. Aau, iv'i napn na p'knaran, kav'i napn na m'alk lil.

¹⁶ Iv'i napn apiv natav aranan, kav'i napn a ti apav'ana eia sena ti der lil itama sarei. Sena ti apamlanr v'anu hua lilil, m'er nmah, la hatahat nar aviak, la avrav'a eia dau ha.

¹⁷ “Kana p'ani ti m'ertu apavrn istuet. Apavv'el kavnep'a sera m'etapis, sena ti atvan sera si stu katvmlen sarei a Mlin Eia. Apatp'sran dir ipanep'a nut atp'sran neiev' inap'i. Aau, apasran p'akr ipanep'a nut asran nsi inap'i.”

¹⁸ Arna napn na nl reran a Mlin Eia, silva v'aha kul (la iv'i nkar ha) ikalev'lar. V'eti nap', la iv'iv'en ti nln irer ha, ipalev'la si udlani arna nadep' udlani. Sena ti ipalev'lar m'ertu udlani, la avlak arna v'anu ha, ipalahml sarei uaki.