Parei 1 - V'nen P'as iv'i Turanien Trtarep' m'a Turanien M'dah

V'nen itauamu

¹ Tv'alk Tiuvilas, arna pukak itauamu nulul a v'nen ivrur si udlani a Iesu iani, kav'iv'ani, naran iendina parian itauamu,

² dav'a ier napn Atua ilav'i iv'a eia, naran ittu sera v'nen huan anr apusel la iv'lair ha, arna nut huan a M'im'iln P'as.

³ Itauatah a m'ienen, A Iesu iv'iv'en Hin anr a ti isilv' ml, arna navanel inelnal, iav'i hap'ilien. Hir avlei arna napn inelv'a (40) naran ivrur v'anuan Atua.

A Iesu ituran a ti M'im'iln P'as ipama

⁴ Laha, naran ip'lt m'er, itu v'nen anr a ti amavln nut a Serusalem, kavr ti a, “Kam'i pavtrah turanienan a Tatei la Hin ittu sarei a kam'i ha, ipanep'a nut ntvr sarei a kam'i inap'ei.

⁵ Nvrdaui, a Sun ien paptais a kam'i a nauei, v'eti ikap'arei Atua ipan paptais a kam'i a M'im'iln P'as.”

⁶ Laha, naran avrama kavp'lt, avmiman ani, kavvr ti a, “?Mlin, hilaha iv'i naran na ti Nakm patum'alet a v'anuar m'ertu a Isrel ml anr?”

⁷ Ivrpranr kavr ti a, “Iav'i nkam'i a ti pavrndu naran na sei v'aha napn na sei a Tatei uaki itaui arna nut huan.

⁸ V'eti kam'i pavlev' nut hua naran M'im'iln P'as ipama aranam'i, kavv'i v'nenak arna nut a Serusalem, arna nut udlani a Sutia, arna nut a Sameria, m'a nut udlani arna nadep'.”

A Iesu iv'a arna nut eia

⁹ Ivr sera v'nen lera, laha, naran avp'ei, avla ti Atua ilav'i iv'a eia. Sarei, p'knaran iamk itukari ahavlei ml.

¹⁰ Avklau ihua uam naran iv'a eia. Laha, pavrni, dui arru arp'tir asnr, heiar itva, karvr ti a,

¹¹ “!Ardu a Kalili! ?Inap'i hin kvp'tir kavklau eia? A Iesu lera, la Atua ilav'i iv'a eia ha, Hin ipama ml ipanep'a nut kvla ti iv'a eia inap'ei.”

Avp'lt kavtu tamat al rum eia

¹² Sarei, avln ptha lera, nahan iv'i Uliv, kavm'alet kavrav'a ml a Serusalem, ihih kilumita iamk arna nut lera.

¹³ Laha, naran avier nut lera, avrav'a al nmah iamk arna rum nen iter eia. Hin a P'ita, a Sun, Adru, a P'iliv', a Tumas, a Patulumiu, a Matiu, a Sim'is iv'i a natn Alvias, a Saimun Silutis, m'ei a Sutas iv'i a natn a Sim'is, avlak atlera.

¹⁴ Hir udlani avp'lt arna v'ahienar iamk kavtu tamat kavmiman sei asn Atua nakl, hir m'er tav'et kinkin m'ei a Meri, iv'i a unian a Iesu, m'er tv'aln.

Av'lai a Mataias a ti ipav'i apusel

¹⁵ Arna naran lera, a P'ita ip'tir arna p't nut nar m'ertu udlani avv'ah a Iesu, avihih nelnal iv'amk pln inelru (120), kavr ti a,

¹⁶ “Tv'alk udlani, v'nen M'im'iln P'as ivri arna pnn a Divt naran ivrur a Sutas la iv'ev'a m'ertu avuadei a Iesu ha, iktu hin pr.

¹⁷ Hin ip'lt m'a kam'em' kalak m'a kam'em' arna parei laha.

¹⁸ Hin iul nadep' kinkin iamk a nav'et ilav'i arna si stuan, sarei, kadars atlera, v'atn udlani irdapri, laha, ann udlani ima aut.

¹⁹ Dav'a m'ertu udlani avlak a Serusalem avrndu si lera kavtu naha nadep' lera iv'i Akeltama. Arna v'nenar, iv'i Nadep' na Nadei.

²⁰ Sena ti aulul ani arna puk iamk arna Paivul, iv'i Npin, ivr ti a, ‘Ip'as a ti nmahan ipater vn uaki. M'ertu kinkin imalak a nln.’ Kavri ml arna nut uraur kavr ti a, ‘M'ertu uraur ipaua parian.’

²¹ Sena si lera, iviviln a ti p'vv'li m'ertu ipamk ilak m'a kam'em' iel naran a Mlin Lilad a Iesu iunanut m'a kam'em'.

²² Itudina hin naran a Sun ien paptais dav'a ier napn Atua ilev'lei asnm'em'. Apataui ti hin ipap'lt m'a kam'em' kavrp'ep'a ti a Iesu ithal ml arna m'ienen.”

²³ Laha, avtu naha dui arru, a Susev', avr ti iv'i a Pasapas, tv'el nahan iv'i a Sastas, m'ei a Mataias.

²⁴ Sarei, kavtu tamat kavvr ti a, “Mlin Eia, Nakm krndu nlr m'ertu udlani. Dui arru lera, pav'iv'en a kam'em' hin ak asnr ktv'li sarei.

²⁵ A ti hin ipav'i apusel kaua parian a Sutas la irs aranan ha, sena ti iluvn a v'nenan Atua kadav'a arna m'lnen.”

²⁶ Sarei, avhlhalei kavpasla nahan a Mataias kavtaui ip'lt m'er apusel inal lman iamk (11).