Kalesia 1 - V'nen P'as iv'i Turanien Trtarep' m'a Turanien M'dah

A Pul ivr ip'as a sas udlani a Kalesia

¹ Kana nv'i a Pul, kav'i apusel. Iav'i m'ertu avtep'a kana, v'aha kavtu kana ti nv'i apusel. V'eti a Iesu Kristu m'ei Atua iv'i a Tatei, la iani ti ithal ml arna m'ienen ha, hir uaki arani ti nv'i apusel.

² Kam'em' m'er tv'alk udlani avlak asnk nvvr ip'as a sas udlani iter arna nut a Kalesia.

³ Nrn ti Atua, iv'i a Tatei, m'ei a Mlin Lilad a Iesu Kristu apartu vtmien m'a tamat a kam'i.

⁴ A Iesu Kristu im'ahu a Hin sena si stuad a ti ipalev'la nakd arna p'kl stu na nadep' laha, inep'a nut Atua, iv'i a Tetiad, irni inap'ei.

⁵ Nakd p'vani ti nahan ipav'a eia ipel dav'a ikahiris naran, Amen.

V'nen p'as iamk uaki

⁶ Kana ntah ani istudau, sena ti ilahml sarei kvln Atua, la iv'ara a kam'i arna vtmienan a Kristu ha, a ti pavsapa v'nen p'as kinkin uraur ml.

⁷ Sena ti v'nen p'as uraur ihei ml. V'eti m'ertu kinkin avuha v'ahienam'i kavrn ti apavvav v'nen p'asan a Kristu.

⁸ V'eti ipavr ti kam'em', v'aha ensel kinkin la ipandan eia ha, p'vvrp'ep'a v'nen p'as kinkin uraur a kam'i ml, la ianep'a v'nen p'as ntvvrp'ep'a sarei a kam'i ha, Atua iputakm ani ikahiris naran.

⁹ P'evri ml hilaha inep'a nut ntvvrp'ep'a sarei inap'ei, kavr ti a, Ipavr ti m'ertu kinkin ipamk ipavrp'ep'a v'nen p'as uraur ml a kam'i, ianep'a v'nen p'as ktvlev' sarei, Atua iputakm ani ikahiris naran.

¹⁰ ?Hilaha kvv'ah ti nrn ti m'ertu v'aha Atua iparn ipap'as a kana? ?Kvv'ah ti nrn ti m'ertu apavrn ipap'as a kana? Sena ti ipavr ti kana nrn ti m'ertu uaki apavrn ipap'as a kana, nkav'i dui na m'akarienan a Kristu.

A Iesu uaki iv'ara a Pul a ti ipama kav'i apusel

¹¹ Tv'alk, nvrdaui, nvr a kam'i, v'nen p'as la ntvrp'ep'a sarei a kam'i ha, iav'i v'nena m'ertu.

¹² Sena ti nalev' v'nen lera asn m'ertu, m'ertu kinkin iav'iv'en a kana, v'eti Hin a Iesu Kristu uaki iv'iv'en a kana.

¹³ Kam'i ktvrn sera p'klk tituei naran nsapa sasar ardu a Isrel, katp'ev' sasan Atua ihua istudau kutakm ani ihuadau.

¹⁴ Kadama kahua mau kasiv' tv'alk istudau arna sasar ardu a Isrel sena ti nsapa p'klr a pupuak ihua mau.

¹⁵ V'eti Atua itv'li sera kana naran ndlak uam al v'atn a uniak kav'ara a kana arna vtmienan,

¹⁶ Karn ip'as a ti ipav'iv'en a Natn a kana sena ti p'evrp'ep'ei asnr v'anudl. Arna naran lera, nahv'a asn m'ertu kinkin kavruri m'ei.

¹⁷ Nahv'a eia a Serusalem a ti p'elar dui avv'i apusel avtauamu a kana, v'eti nv'a arna nut Arepia, sarei, nm'alet ml kadav'a a Tamaskas.

A Pul ilei a P'ita m'ei a Sim'is arna nut a Serusalem

¹⁸ Sarei, pai itl iv'siau, nv'a eia a Serusalem, kalei a P'ita kalak m'ei napn inal lman ilm' (15)

¹⁹ V'eti naler apusel uraur, v'eti a Sim'is uaki, iv'i titiatah nan a Mlin Lilad.

²⁰ Sei nulul ani iv'alet asnm'i, nvrdaui arna nahan Atua, nahap'il.

²¹ Itauatah a naran lera, nv'a arna nut a Siria m'a Silisia.

²² Naran lera, m'ertu arna sasan a Kristu udlani a Sutia ahavledu kana.

²³ V'eti atvrn sera v'nen uaki ivr ti a, “Aulahara itp'ev' nakd tituei hara, hilaha ivrp'ep'a v'nen p'as iv'i v'ahienad, la tituei iutakm ani ha.”

²⁴ Laha, avpata nahan Atua sanak.