Esta 1 - V'nen P'as iv'i Turanien Trtarep' m'a Turanien M'dah

A Vasti, iv'i a Hau Lil, iarn ti ipan sei a Mlin Ahasueras ivri

¹ Si udlani laha itu hin, arna naran a Mlin Ahasueras isilv'. Ahasueras lera iv'i mlin, v'anuan itudina hin a Intia, kadav'a kaier a Itiupia. V'anu udlani lera avv'i pruvins avnelnal iv'amk, pln inelru, neltl nen isaru (127).

² Arna naran lera, a mlin Ahasueras ilak arna napl p'asan, la iter al v'anu hua lilan a mlin ha, atu naha nut lera iv'i a Susan.

³ Laha, arna nitla pai iv'i mlin, ien tim'ah lil iamk sanar arm'ertu avv'i kavmanan, m'er arm'ertu na m'akarienan. Arm'ertu lera avv'i arm'ertu hua arna v'anu a Pesia m'ei a Mitia, avv'i arm'ertu lilil, m'er armlinar arpruvins nakl. Laha, hir udlani avrav'a asnn.

⁴ Laha, iv'iv'en anr si p'sp'as arna v'anuan, la ilil kap'eset ha, kav'iv'en anr a ti hin iv'i mlin lil iamk, kav'i mlin iamk arm'ertu avrn ti nahan ipav'a eia. Laha, iv'iv'en si udlani anr napn inelnal iv'amk, pln inelsatl (180).

⁵ Sarei, naran napn lera av'siau, a mlin ien tim'ah lil iamk sanar arm'ertu udlani, la avlak arna v'anu hua lil a Susan ha, arki avv'i m'ertu lilil, m'er arki avv'i m'ertu papa. Laha, iani napn isaru, arna nut av'aran na nmah hua lilan a mlin, iv'i pitvet pa iamk.

⁶ Laha, avhl nakal avv'i nav'et hua, kavtu nai nen, nai lera avani a silva. Sarei, avan kalik p'arei m'a kalik p'as iplu, katva. Sarei, avlal arna nai iv'i silva lahara. Sarei, avhudei m'a nahau aani a kalik p'as, m'a kalik im'ielm't. Laha, avanr napl p'as m'a kul m'a silva, kavtaur arna nut av'aran iamk. Avtaur nav'et hua arna nadep' arna nut lera, nki kinkin avm'iel, nki kinkin avplu, nki kinkin avtva, sarei, nki uraur avram't.

⁷ Laha, avtu naui m'iel anr arm'ertu, kavtu panikin avani a kul anr, v'eti nki iamk ianap'amk m'a nki uraur, avururaur nakl. Laha, avtu naui m'iel istudau anr, a ti ipav'iv'en ti a mlin irn ti ipatu sei istudau anr.

⁸ Laha, ahavtp' m'ertu a ti apavm'nm'n, sena ti iv'i v'nen huar iamk. Sena ti a mlin itv'ana sarei m'er arm'ertu avp'aur nmahan, kavr ti apavani ipanep'a nut m'ertu udlani p'sev' irn ti ipani ipanap'ei.

⁹ Laha, a Vasti, iv'i a hau lil, ien tim'ah lil iamk sanar artav'et. Iani al nmah lil, iv'i nkan a mlin Ahasueras.

¹⁰ Laha, arna saru na napn, naran a mlin itm'nm'n sarei karn ip'as sena ti itm'n sera naui m'iel, itu v'nen hua iamk anr a Mehuman, a Pista, a Harpuna, a Pikta, Apakta, a Seta, m'ei a Kakas. Ardu isaru lera avv'i tamav, kavv'i m'ertu na m'akarienan, la avm'akar arna nahn a mlin Ahasueras ha.

¹¹ Laha, ivr ti apavlev' a Vasti, la iv'i a hau lil ha, sarei kavani ti ipap'tir arna nahn a mlin. Ivr ti ipatu manu p'asan arna ptn, kav'iv'en anr arm'ertu, m'er arkavman, a ti iv'i tav'et p'as iamk, sena ti, naran arm'ertu avlei nakl, avla ti ip'eset.

¹² Laha, naran artamav lera avuirv'a v'nen lera asnn, a Vasti, iv'i a hau lil, iam'ahu a ti ipav'a asn a mlin. Sarei, nln a mlin irer istudau, aau, inep'a ti nl reran lera ivuv istudau a nln.

¹³ Sarei, a mlin iv'ana m'er arm'ertu avrndu sei, kavrndu mamh sei itu hin nakl arna v'anu (sena ti a mlin iani inap'i lera nakl m'er arm'ertu avrndu mamh v'nen hua, kavrndu ti apavv'ana hua m'a m'ertu nakl).

¹⁴ Arm'ertu avmima asnn nakl avv'i a Karsena, a Setar, Atmata, a Tasis, a Meres, a Marsena, m'ei a Memukan. Ardu isaru lera avv'i armlin lilil na v'anu a Pesia m'ei a Mitia. Hir lera avrndu ti apavlak mima asn a mlin, kavv'i mlin lilil kavsiv'r armlin uraur arna v'anu.

¹⁵ Laha, Ahasueras ivr anr, kavr ti a, “?V'nen hua na v'anu ivr ti p'van v'ata m'ei a Vasti, iv'i a hau lil, sena ti iav'rn anr artamav, naran avuirv'a v'nen huan a mlin Ahasueras?”

¹⁶ Laha, a Memukan ip'tir arna nahn a mlin, m'er armlin uraur, kavrprani, kavr ti, “A hau lil, iv'i a Vasti, itutakm sarei a mlin. V'eti iav'i si lera uaki, itutakm sarar armlin, m'er arm'ertu udlani avlak arna pruvins udlani, la avv'i nkan a mlin Ahasueras ha.

¹⁷ Sena ti artav'et udlani apavla sei a hau lil iten sarei, laha, apavp'a stu anr a naur, sarei kavlep'lar. Inap'i lera, apavv'ana, kavvr ti a, ‘A mlin Ahasueras ivr ti a Vasti, iv'i a hau lil, ipav'a asnn, v'eti iahv'a ki.’

¹⁸ Arna napn laha prki, artav'et lilil a Pesia m'ei a Mitia apavv'ana m'er arkavmanan a mlin udlani, kavvr ti avrn ti a hau lil iten sera si lera. Sarei, m'ertu istudau apavsip'lanr m'ertu uraur, nlr iparer ipastudau.

¹⁹ Ipavr ti a mlin iparn ipap'as a ti ipani, hin ipatu v'nen hua ipamk, ipandan asnn. Ipanap'i lera, apulul ani arna puk na v'nen huar arm'ertu a Pesia m'er arm'ertu a Mitia, m'ertu kinkin ikavavi naran kinkin. V'nen hua lera ipavr ti a Vasti, iv'i a hau lil, ikahv'a ml arna nahn a mlin Ahasueras. Sarei, a mlin ipalev' tav'et uraur ipamk, ipav'i tav'et ipap'as kasiv' a Vasti lera, aau, ipaua m'lnen kav'i a hau lil.

²⁰ Naran apavvrp'ep'a v'nen huan a mlin lera arna nut udlani arna v'anu (sena ti iv'i v'anu ilil iamk), artav'et udlani apavani ti nahar a naur ipav'a eia, arki avv'i m'ertu lilil, m'er arki avv'i m'ertu papa uaki.”

²¹ Laha, naran ivrpranr a mlin lil m'er armlin na v'anu inap'i lera, avrn ip'as a v'nenan. Sarei, a mlin iani inep'a nut a Memukan lera ivri inap'ei.

²² Sarei, itap'er lita iv'a arna pruvinsan a mlin udlani. Avulul a lita lera arna v'nenar arm'ertu arna pruvins ururaur nakl. Inap'i lera, litan a mlin iak arna v'nenar arm'ertu udlani. Lita lera ivr ti ardu udlani apavv'i mlin na nmahar nakl, sarei apavv'ana arna v'nenar arm'ertuar uaki.