Esikiel 1 - V'nen P'as iv'i Turanien Trtarep' m'a Turanien M'dah

Sei a Esikiel ilei

¹ Laha, itu hin, arna neltl na pai, arna niv'a nal, arna nilm'a napn na nal lera, naran nlak m'er arm'ertu avp'resin arna v'anu uraur, asn nauei a Sipar, inep'a ti uidua na p'knaran aviela hir, sarei, nla sei iv'iv'en p'kln Atua.

² Sarei, arna nilm'a napn na nal, arna nilm'a pai a mlin a Sehuiakin ip'resin,

³ v'nenan a Mlin Eia ima asn a Esikiel, iv'i pris, kav'i a natn a Pusi. Laha, v'nen ima asnn arna v'anuar arm'ertu a Kaltia, a p'ak nauei a Sipar. Laha, lm'an a Mlin Eia iter aranan arna nut lera.

A Esikiel ila sei, iv'iv'en p'kln Atua

⁴ Naran lera, nklau eia, sarei, palei, nalen lil iamk iendan arna Nut, m'a p'knaran lil iamk. Laha, nap' lil iamk iv'en al p'knaran lera, ker istudau. Naran ap'a p't nut na nap' lera, ala ti im'iel kadauas.

⁵ Sarei, si kinkin arv'a (4) avnep'a sera si dm avdan a nln. Laha, naran ap'ar, ala ti avnep'a sera dui.

⁶ Hir udlani p'sev' nahr arv'a. Sarei, nil heiar arv'a.

⁷ Sarei, tlr ahavhapr, nut auei na tlr avnep'a sera nka net pluk. Laha, avklkalan kavnep'a sera aian v'il, la atm'akar sarei aranan a ti ipap'eset ha.

⁸ Sarei, a nv' nil heiar arna tv'eliel arv'a, lm'ar aviak. Hir udlani nahr aviak, nil heiar aviak.

⁹ Laha, nil heiar avier hir. Laha, si dm lera, naran avv'el, ahavvav hir, avv'el kavsapa navanel uaki.

¹⁰ Naran ala nahr, ala ti hir udlani p'sev' nahr avv'i nah dui. Sarei, arna m'ldaur, nahr avv'i nah laiun. Sarei, arna m'ir nar, nahr avv'i nah pluk. Sarei, hir udlani p'sev' nahr avv'i nah np'el.

¹¹ Laha, nahr avnap'i lera. Laha, avlmlm nil heiar nakl. Nil heiar arru arier hir. Sarei, nil heiar arru artavkarr p'akr.

¹² Laha, hir udlani p'sev' avv'el mamh uaki, ahavruh arna navanel. Laha, arna nut m'im'ilr avrn ti apavrav'a, avv'el kavrav'a atlera uaki. Naran avv'el, ahavvav hir.

¹³ Naran ap'ar si dm lera, avnep'a sera var nap' la ien ha. Laha, inep'a ti nap' nen ivrvr kadav'a sarei kadam'a ml, kaier nki iamk, sarei kaier nki uraur. Laha, nap' ier istudau, sarei, nav'l ilev' m'aten dan al nap' lera.

¹⁴ Laha, si dm lera avvrvr kavrav'a, sarei kavrama ml. Naran alar, inep'a ti ala nav'l ilev' m'aten.

¹⁵ Laha, naran kana nlak kap'ar si dm lera, palei, uil kinkin avrater arna nadep' ka, avp'tir asnr si dm (la nahar iv'a ha) udlani p'sev'.

¹⁶ Laha, naran ap'ar uil lera, m'a sei iani ti avvrvr, ala ti avm'iel. Laha, hir udlani p'sev' avnap'amk uaki. Laha, sei, la avani ti avvrvr ha, avnep'a sarar uil papa avrater a p't nut nar uil lil.

¹⁷ Laha, naran avvrvr, avv'el kavrav'a arna nut avrni uaki, avrndu ti apavrav'a arna nut iv'a, v'eti ahavvav hir naran avv'el.

¹⁸ Laha, uil nar avlilet kavp'eriet. Sena si lera, atah anr istudau. Laha, m'atar aviak arna uil lera nakl, avlini anr, kavmldanr uil arv'a lera.

¹⁹ Laha, naran si dm lera avv'el, uil lera avv'el kavsapar nakl. Sarei, naran si dm lera avtetv eia arna p'knaran, uil lera avtetv kavrav'a eia.

²⁰ Arna nut m'im'ilr avrn ti apavv'el, avv'el kavrav'a atlera. Sena ti, ipavr ti m'im'ilr avrn ti apavrav'a a nut kinkin, aruil lera avtetv kavsapar, sena ti m'im'ilr si dm avlak al uil lera nakl.

²¹ Naran avv'el, aruil avv'el. Naran avp'tir uaki, aruil avp'tir uaki. Naran avtetv eia, aruil avtetv eia, sena ti m'im'ilr si dm avlak al uil lera nakl.

²² Laha, naran ap'a p'knaran, la iter eia na ptr si dm lera ha, ala ti kala nen inep'a sera klas, nahan iv'i kristal, ip'eset istudau. Laha, inep'a ti p'knaran ilmlm hin eia na ptr.

²³ Sarei, avah nil heiar a nv' p'knaran lera, nki iamk iv'a a ti ipaier nki uraur nakl. Si dm udlani p'sev' aviak a nil heiar arru, artukar tv'eliel iamk na p'akr, m'er arki arru artukar tv'eliel uraur na p'akn.

²⁴ Laha, naran avv'el, nrn drlr nil heiar, inep'a sera drl naui lil iamk naran irarev' ilahml, kanep'a sera drln Atua Na Nut Hua Udlani, kanep'a sera drlr m'rnur avkakar istudau. Laha, naran avp'tir a nut iamk, avani ti nil heiar avrav'a a nadep' ml.

²⁵ Laha, nrn drl si iamk iv'ana dan arna liha masamas, la iter eia na ptr ha. Aau, naran avp'tir a nut iamk, avani ti nil heiar avrav'a a nadep' ml.

²⁶ Sarei, arna liha masamas, la iter eia na ptr ha, nla si iamk inep'a sera napl na mlin iamk, kanep'a sera nav'et p'as iv'i savaia. Laha, si iamk, la inep'a sera dui iamk ha, ilak arna si lera, la inep'a sera napl na mlin ha, v'eti ilak eia dau.

²⁷ Sarei ml, nla ti, itudina hin arna lihan kadav'a eia arna p'akn, sei inep'a nap' iak, im'iel kadauas. Sarei, itudina hin arna lihan kadav'a auei, nla nap' ier istudau kamldani.

²⁸ Sarei, naran ier inap'i lera, inep'a sera nev'iel iamk arna p'knaran, la arndu ti apalei naran nu iu nakl ha. Laha, nla ti si lera iv'i si iamk ier istudau kav'iv'en si p'sp'asan a Mlin Eia. Laha, naran nlei, nrs arna nadep', nahk ier nadep'. Sarei, nrn drln Atua iv'ana.