Apakuk 1 - V'nen P'as iv'i Turanien Trtarep' m'a Turanien M'dah

Apakuk iarndu v'ahienan a Mlin Eia

¹ V'nen laha ivrur si dv hin Apakuk, la iv'i pruvet ha, ilei.

Apakuk itu v'nen hapr an a Mlin Eia

² ?U Mlin Eia, p'ev'ara anh ipaier v'aran, v'eti kdav'rn a kana? Nv'ara anh, kavr ti a, “!Arp sei istudau!” v'eti kdalev'la m'ertu arna der.

³ ?Kv'iv'en si stu a kana, kani ti nla der lil, v'eti iv'i sena v'ata? Sena ti m'ertu avv'nah sei kavrprp m'ertu arna nahk. M'ertu avv'lv'al nakl, aau, avthth hir, si lera nakl ima eia.

⁴ Sena si lera, nut hua na v'nen hua ihei, v'nen viviln iaier m'ertu kamhmah a m'ertu. Sena ti arm'ertu na si stu avmldanr m'ertu viviln. Sena si lera, avv'ana hua, v'eti sei avtaui ihapr uaki.

A Mlin Eia ivrprani

⁵ A Mlin Eia ivrprani, kavr ti a, “Paklau eia kap'ar v'anu. !Pap'ei dav'a katah ani ipastudau! Sena ti Kana p'en pari ipamk arna naran na ti ksilv', imvri ti nmvrp'ep'ei anh, mkav'ah ti ipatu hin ki.

⁶ Sena ti nvrdaui, hilaha uaki p'ani ti arm'ertu a Kaltia apavilaph. Arm'ertu lera avv'i m'ertu avhaau arna v'ahienar, aau, avrakn a ti apavan sei nakl. Avv'el ihua kavsiv' nadep' ka, tv'eliel iamk ier tv'eliel uraur. Avrav'a a ti apavlav'r nut apavlak aranan, v'eti nadep' lera ahavv'i nkar.

⁷ M'ertu avtah anr kavdedrn anr istudau. Hir uaki avv'ana hua arna sei, aau, hir prki avv'ah ti avv'i mlin lilil nakl.

⁸ Husar avvrvr ilahml kavsiv'r lapt lil avr ti iv'i lepet, aau, avhua kavsiv'r lip'ah didi avunanut lihat. Hus lilar (la avvrvret ha) avvrvr kavtauamu anr. Ardu avua hus na naur avv'alet dan arna nut v'iv'a. Avtetv kavnep'a sera np'el la irakn a ti ipahan sei ha.

⁹ Avrama a ti apavrp sei. Nahr avhua kavnep'a sera nalen lil idan arna Is. Avpapianr m'ertu a ti apavtaur al p'resin, kavani inep'a nut m'ertu ilev' nun al lm'an uaki.

¹⁰ Naran avlar mlin, avvtma uaki anr. Avsip'lanr m'ertu lilil nakl. Naran avlar nut p'as, la avhua ha, avvr ti ahavv'i sei, sena ti avan m'ev' lilil kavlev' nut lera uaki.

¹¹ Sarei, m'ertu na nut lera ivav v'ahienan, sarei kaluvn a v'nen hua. Aau, ien si stu kavr ti nut huan idan asn atuan.”

Apakuk itu v'nen hapr an a Mlin Eia, iv'i v'aru nen

¹² ?U Mlin Eia, Nakm kv'i Atuak, kav'i Atua P'asak, v'aha ihei? Kam'em' mkavram'a. U Mlin Eia, Nakm kttu sarei ti apavlak a nv' v'nen huam. U nav'et huak, nakm kttu sera mak aranar, a ti pav'ana hua m'er.

¹³ M'atam avp'eset, laha, mkalak kap'a si stu lil, aau, mkap'a si stu. ?Sena v'ata kp'ar m'ertu avutakm anr m'ertu arna navanel tutuah? ?Sena v'ata Nakm kuada nm'm naran m'ertu stu ikap'n m'ertu iviviln kasiv'i?

¹⁴ ?Sena v'ata Nakm kani ti m'ertu avnep'a sera tilau na nata, kani ti avnep'a sera sei iharev' arna nadep', la mlinar ihei ha?

¹⁵ Avlev'luar udlani m'a uk, aau, avlav'r m'a nit na tilau. Avtupianr m'a nit na tilau lil, la arv'i ha. Sena si lera, avvtma kavrn ip'as.

¹⁶ Sena si lera, avan sakrivais sena nit na tilau, kaval sida p'as sena nit na tilau lil (la arv'i ha). Avani sena ti si lera nakl iani ti nadep'ar ilil, tim'ah nar istuduet.

¹⁷ ?Iviviln a ti apavtp'sran sei dan al nitar, kavtrpep'nr m'ertu na v'anu uraur (p'klr iv'i ti akavrn istu anr), v'aha inap'i?