Akai 1 - V'nen P'as iv'i Turanien Trtarep' m'a Turanien M'dah

A Mlin Eia ivrp'ep'a ti iv'i naran na ti apahl nmah tamatan Atua

¹ Arna tv'el pai a Tarias iv'i mlin, arna lm'sei na nal, arna napn itauamu na nal lera, v'nenan a Mlin Eia ima asn Akai, iv'i pruvet. Laha, v'nen laha iendan asnn, kaier a Serupapel, iv'i a natn a Sealtiel, kav'i kavman arna v'anu a Suta, kaier a Susua, iv'i a natn a Sehusatak, kav'i pris lil. Laha, ivr ti a,

² “A Mlin na m'rnur iv'ana inap'i laha, kavr ti a, ‘Arm'ertu laha avv'ana, kavvr ti a, “Idav'a naran nen, aau, idav'i naran na ti apahl nmah tamatan a Mlin Eia.” ’ ”

³ Laha, v'nenan a Mlin Eia iendan asn Akai, iv'i pruvet. Laha, ivr ti a,

⁴ “?Kvv'ah ti iv'i naran na ti kam'i pavlak al nmaham'i, la kvani a nai p'as ha, v'eti nmah tamat laha ilak stu uaki?”

⁵ Sena si lera, a Mlin na m'rnur iv'ana inap'i laha, kavr ti a, “!Pavv'ahur mamh sei kvani nakl!

⁶ Ktvlu sera sei istudau, v'eti sei ktvlev' sarei isusupa uaki. Kvhatat, v'eti kvrn nam'er uam. Kvm'n nauei, v'eti kvrn navam'i uam. Kvtu klus aranam'i, v'eti m'ertu irn m'la uam. M'ertu ilev' nav'et sena parian, ilev' nav'et a ti ipataui al naten itiapr sera hin uaki.”

⁷ A Mlin na m'rnur iv'ana inap'i laha, kavr ti a, “!Pavv'ahur mamh sei kvani nakl!

⁸ Pavvrav'a eia arna ptha lilil kavlev' nai, kavhl nmah tamat, a ti Kana p'ern ipap'as ani, a ti nahak ipav'a eia.” A Mlin Eia iv'ana, kavr si lera.

⁹ A Mlin na m'rnur iv'ana, kavr ti a, “Kvtala sei istudau, v'eti kvlev' si papa uaki. Sarei, naran kvuirv'am'alet al nah nmah, Kana nani ti nalen itvtv kalev'lei. ?Sena v'ata? Iv'i sena ti nmah tamatak ilak stu, v'eti kam'i udlani p'sev' kvvrvr kavrav'a a utam'i.

¹⁰ Sena si lera, p'knaran, la iter eia na kam'i ha, iuada niu, sarei, nadep' iatu navan.

¹¹ Sena ti Kana ntaui ti m'em'erien ipaier nadep' m'er ptha lilil, kaier uit m'a naui m'iel m'dah m'a ueil, kaier si udlani isi arna nadep', kaiarr m'ertu m'er pluk, m'a si udlani iv'i pari na lm'am'i.”

Arm'ertu avan sei ivri

¹² Sarei, a Serupapel, iv'i a natn a Sealtiel, m'ei a Susua, iv'i a natn a Sehusatak (la iv'i pris lil ha), m'er duanar m'ertu udlani, avan sei a Mlin Eia, iv'i Atuar, ivri, kavsapa v'nenan Akai, iv'i pruvet, sena ti a Mlin Eia, iv'i Atuar, ittep'a sarei. Laha, arm'ertu avdedrn arna nahn a Mlin Eia.

¹³ Sarei, Akai, iv'i v'nenan a Mlin Eia, ivrp'ep'a v'nenan a Mlin Eia anr arm'ertu, kavr ti a, “A Mlin Eia ivr ti a, ‘Kana nlak m'a kam'i.’ ”

¹⁴ Laha, a Mlin Eia iuha m'im'iln a Serupapel, iv'i a natn a Sealtiel (la iv'i kavman a Suta ha), kuha m'im'iln a Susua, iv'i a natn a Sehusatak (la iv'i pris lil ha), m'er m'im'ilr duanar m'ertu udlani. Laha, avrama kavm'akar arna nmah tamatan a Mlin na m'rnur, la iv'i Atuar ha.

¹⁵ Laha, itu hin arna tv'el pai a Tarias iv'i mlin, arna lm'sei na nal, arna napn inelru pln iv'a (24) na nal lera.