Aisaia 1 - V'nen P'as iv'i Turanien Trtarep' m'a Turanien M'dah

Aisaia ivr ti arm'ertu a Suta apavrn istu sena si stuar

¹ V'nen laha iv'i sei hin Aisaia, la iv'i a natn Amus ha, ilei. Sei ilei ier v'anu a Suta, kaier v'anu lil a Serusalem. Si laha itu hin naran a Usaia, a Sutam, Ahas, m'ei a Esekaia, avv'i armlin a Suta.

Arm'ertu a Suta avan si stu istudau

² !U, p'knaran, pav'rn, nut a nadep', parn sei kana nvri! Sena ti a Mlin Eia itv'ana sarei, kavr ti a, “Kana ntmsnen sarar mardel, katv'av'ar naran avrama kavlil, v'eti atvrama sarei kavv'i pthua, kavmlen Kana.

³ Pluk irndu hin ak ip'auri. Tuki irndu nut m'ertu ip'auri ittu sera kis na suadan. V'eti a Isrel iarndaui. Arm'ertuak ahavv'ahur sei.”

⁴ Usa, v'anu stu. Kam'i kvv'i m'ertu kavradv sena si stuam'i. Kvv'i net m'ertu avan si stuet. !Kvv'i mardel avutakm a sei nakl! Atvtetvan sera tahr an a Mlin Eia. Atvtp' sarei Atua, la iv'i Atua p'as a Isrel ha, a ti nln iparer anr ipastudau. Atvvav sera hir, katvm'alet sarei arna navanel uraur.

⁵ ?Aputakm a kam'i ml sena v'ata? Nrndu ti kam'i pavv'i pthua kavmlen Kana ml, ikahiris. Pt v'anu itm'at sarei. Itars sarei arna nln.

⁶ Itudina hin arna nut auei arna tln, kadav'a kaier nut eia arna ptn, iap'as arna nut kinkin. Nut atr p'akn, m'nhn iak. Nadei stu aviak, v'eti ahahudar, ahatu m'erasin aranar. Nadei lera ahavp'leskar hir, avtp' uaki nakl.

⁷ V'anuam'i itstu sarei. Arm'ertu atvtu sera nap' anr v'anu lililam'i. V'anudl atvlev'la sera nadep'am'i, v'eti kam'i kvp'tir kavp'ar uaki. V'anu itama sarei kav'i nut kaka uaki, sena ti m'rau atvrama sarei kavkasri a nadep'.

⁸ Inap'i lera, net tav'etan a Saiun ilak mamk kanep'a sera nmah pa iamk al pitvet na nahau na krep, v'aha nmah tvtv iamk al pitvet na kukapa. Iv'i v'anu lil arm'rnur atvkada sera liu nen.

⁹ Imvr ti a Mlin na m'rnur idalnr duanam'em', la avsusupa dau ha, kam'em' mtvrama sarei kavnep'a v'anu a Satam, kavnep'a sera v'anu a Kamara.

¹⁰ Armlin a Satam, pavrn v'nenan a Mlin Eia. Kam'i arm'ertu a Kamara, pavv'rn a v'nen huan Atuam'em'.

¹¹ A Mlin Eia iv'ana, kavr ti a, “?Kvtu sakrivais istuduet a Kana sena v'ata? Kana nrn ti ntapd sarei, narn uvrin aali ml, aau, narn pua na sivsiv v'aha pluk, la atvhan sera nina istudau ha. Narn ip'as a di pluk, v'aha di net sivsiv v'aha nani.

¹² ?Naran kam'i pavrama a ti pavp'tir arna nahk, hin ak itv'ara sarei a kam'i a ti pavpas tlm'i a nut av'aran na nmahak?

¹³ Mavuirma sakrivais asnk ml, sena ti kvhap'il uaki. Sida p'as aali nakl iv'i sei nlep'lei. Naran kvv'ahur nal m'dah, v'aha Sapat, aau, naran kvv'ara anr m'ertu a ti apavp'lt a nut ipamk, Kana nkarn ip'as a ti pavp'lt, sena ti iv'i ti pavan si stu uaki.

¹⁴ Naran kvv'ahur nal mdah nakl, aau, naran kvtaui ti pavan tim'ah lil, m'im'ilk ilep'lei uaki. Avv'i si hua asnk, nrn np'k, aau, naran ti p'euada si lera ml.

¹⁵ Naran kvlmlm lm'am'i, Kana nkap'a kam'i ml. Ipavr ti pavtu tamat ipastudau, Kana nkarn tamat lera. Nadei istudau iter arna lm'am'i.

¹⁶ Pavvav, aau, pavsila mamh kam'i. Pavsran si stuam'i, iv'i sei kvani nakl, a ti Kana nkalar ml. Mavan si stu ml.

¹⁷ Pavrama kavrndu navanel a ti pavan si p'as. Pavtala v'nen hua. Pavv'ana hua m'a m'ertu iutakm a m'ertu nakl. Pavp'tir sena m'ertu a tetian ihei. Pavv'ana sena tvtanu.”

¹⁸ A Mlin Eia iv'ana, kavr ti a, “Pavmima asnk hilaha, p'vvrur sei nakl. Ipavr ti si stuam'i avstuet, inep'a ti avm'iel, apavrama kavtva, ipanep'a sera snu. Ipavr ti avm'iel kavnep'a sera kalik im'ielet, v'eti apavrama kavnep'a sera nil sivsiv.

¹⁹ Ipavr ti pavrn ipap'as ani, aau, ipavr ti pavrn ti pavan sei Kana nvri, kam'i pavhan tim'ah p'as idan arna nadep'.

²⁰ V'eti ipavr ti mkavm'ahu ani, aau, ipavr ti pavmlen Kana, tali han ipaha kam'i, kahiris a kam'i.” Pnn a Mlin Eia itv'ana sarei.

V'anu lil itstu sarei

²¹ !V'anu lil, la iv'ahur Atua ha, itama sarei kav'i tav'et na navanel! Itauamu, ilini a v'nen hua, si p'sp'as iter atlera nakl. V'eti hilaha, arm'ertu avrpep'nr m'ertu uraur nakl avlak.

²² Silva, la iter arna v'anu lil ha, itama sarei kav'i tkv uaki. Naui m'iel itp'lt sarei m'a naui p'rei, itstu sarei.

²³ Arm'ertu lilil avv'i pthua, avsapar m'ertu avv'nah sei nakl. M'ertu udlani avlap'as a ti apavlev' nav'et a ti apavan si stu, aau, avtala nav'et sena sei avani nakl. Ahavp'tir sena m'ertu a tetian ihei, ahavrn ti apavv'ahur sei ier tvtanu nakl.

²⁴ Sena si lera, a Mlin Eia, iv'i Mlin na m'rnur, iv'ana. A Mlin Hua a Isrel iv'ana, kavr ti a, “Aau, Kana p'elev'lar arm'ertu, la avmlen Kana ha, asnk. P'etum'alet a sei anr arm'ertu avmlen Kana.

²⁵ P'evav lm'ak, laha, iparp kam'i. P'elev'lua tkvam'i, aau, p'elev'lua sei iv'i aian v'eti iahua ki, sena ti auhei m'a si uraur.

²⁶ Sarei, p'etaur arm'ertu na v'nen hua, apavp'tir ipanep'a nut avp'tir itauamu inap'ei. Arm'ertu avv'iv'en sei a kam'i itauamu apaviak ml. Itauatah a si lera, apavr ti v'anu lil iv'i v'anu lil na sei viviln, iv'i v'anu lil isapa mamh Kana.”

²⁷ Apulla v'anu lil a Saiun, v'eti apuli m'a v'nen hua. Apullar m'ertu avlak atlera kavrn istu sena si stuar, aau, apullar m'a sei viviln.

²⁸ V'eti arm'ertu avan si stu kavutakm a m'ertu uraur, m'er arm'ertu avan si stu kavutakm an Atua, aparpep'nr udlani ipav'amk. Arm'ertu avtetvan tahr an a Mlin Eia apavram'a ipalahml sarei.

²⁹ Arm'ertu lera apavmamih sanar nap'ak, la kvrni istudau ha. Aau, kam'i pavmamih ipastudau sanar pitvet kvv'li a ti ipav'i nkam'i.

³⁰ Sena ti pavrama kavnep'a sera nap'ak ipamk, raun itm'am'a sarei, aau, pavnep'a sera pitvet ipamk, nauei ihei sanan.

³¹ M'ertu hua ipav'i rana nap' uaki. Paria m'ertu lera ipav'i var nap'. Apavhapu ipav'amk uaki, m'ertu kinkin ikakam'ti.