3 Sun 1 - V'nen P'as iv'i Turanien Trtarep' m'a Turanien M'dah

A Sun ivr ip'as an a Kaias

¹ Kana nv'i elta ntep'a ruplet laha iv'alet asnm kv'i a Kaias, nlap'as anh istudau arna v'nen dau.

² Tv'alk nlap'as anh, ntu tamat a ti nakm palak p'as arna si udlani, kahua arna p'akm, inep'a nut m'im'ilm ip'as inap'ei.

³ Sena ti kana nrn ip'as istudau naran tv'ald avrama kavvrp'ep'a nut kuada v'nen dau inap'ei, kasapei.

⁴ Naran nrn ti a natk avsapa v'nen dau nrn ip'as istudau isiv' si udlani.

Ivr ti Kaias ien si p'as anr tv'aln m'er arv'anudl iel

⁵ Tv'alk nlap'as anh, pariam udlani kani asnr tv'alm m'er v'anudl, kani ip'as.

⁶ Hir atvrp'ep'a sera vtmienam arna sas. Ipavr ti nakm pasr lm'ar arna navanelar ipaviviln a nut Atua irni inap'ei, pan si p'as.

⁷ Sena ti hir avv'el sena nahan a Iesu Kristu. Ahavlev' si kinkin asnr v'anudl.

⁸ Sena si lera nakd p'vlav'r apavrama al nmahad, a ti p'vp'lt m'er arna pari na v'nen dau.

A Tiutrives m'ei a Timitrias

⁹ Ntulul sarei a ruplet itav'a arna sas, v'eti a Tiutrives, la irn ti ipalil aranar ha, iarn ti iparn v'nenam'em'.

¹⁰ Sena si lera, ipavr ti kana p'ama, p'evrur nut ien sei inap'ei. Sena ti hin isip'len kam'em' arna v'nen stu. Iarn ip'as a si lera uaki, v'eti hin ialav'r tv'ald apavrav'a al nmahan, v'eti ivrkarr m'ertu avrn si lera kasranr arna sas.

¹¹ Tv'alk nlap'as anh, masapa si kinkin iv'i si stu v'eti pasapa sei uaki iv'i si p'as. M'ertu ien si p'as, hin iv'i m'ertuan Atua, v'eti m'ertu ien si stu, idalei Atua naran kinkin.

¹² M'ertu udlani atvvrp'ep'a sera ti hin a Timitrias iv'i dui p'as. V'nen dau iv'iv'en a ti iv'i dui p'as. Aau, kam'em' ml nvvrp'ep'ei. Kam'i kvrndu ti v'nenam'em' iv'i v'nen dau.

V'nen itauatah dau

¹³ Sei istudau iter uam nrn ti p'ulul ani asnm, v'eti narn ti p'ulul ani arna ruplet.

¹⁴ V'eti nsarei ikap'arei p'elah kav'ana m'ah arna nahm. Nrn ti tamat ipater asnm. Tv'ald udlani atlaha avvr ip'as anh. Nakm pavr ip'as anr tv'ald udlani atlera kavrp'sev' a nahar.