2 Sun 1 - V'nen P'as iv'i Turanien Trtarep' m'a Turanien M'dah

A Sun ivr ip'as a tav'et iamk a Mlin Eia itv'li sarei, m'er a natn

¹ Kana nv'i elta ntep'a ruplet laha iv'alet asnm, kv'i tav'et Atua iv'laih, m'er a natm udlani. Kana nlap'as a kam'i arna v'nen dau. Iav'i kana uaki, v'eti m'ertu udlani la atvrndu sera v'nen dau ha.

² Nlap'as a kam'i sena v'nen dau iter a nld. Aau, ipater asnd dav'a ikahiris naran.

³ Atua, iv'i a Tatei, m'ei a Mlin Lilad a Iesu Kristu, iv'i a Natn a Tatei, apartep'a vtmienar asnm'i karrn istu a kam'i kartu tamat ipater asnm'i arna v'nen dau m'a vtmien.

Pavsapa v'nen dau m'a vtmien

⁴ Kana nrn ip'as istudau naran nla ti a natm kinkin avsapa v'nen dau, inep'a nut a Tatei itu v'nen hua a nakd inap'ei.

⁵ Tav'et, hilaha nmiman anh ihua a ti p'vlap'sp'as a nakd. Naulul a v'nen hua m'dah asnm, v'eti iv'i nki uaki ntvrn sarei itauamu ier dika.

⁶ Si laha iv'i vtmien. Iv'i ti p'vsapa v'nen huan. Si laha iv'i v'nen huan, a ti pavsapa sei kvrni itauamu.

Apavv'ah ti amavsapa m'ertu na hap'ilien la avmlen a Kristu ha

⁷ Sena ti m'ertu na hap'ilien istudau atvrama sarei arna nadep' ka. Hir ahavvrp'ep'a ti a Iesu Kristu ima arna p'akn. M'ertu inap'i lera iv'i m'ertu na hap'ilien kav'i dui imlen a Kristu.

⁸ Kam'i pavv'ahur kam'i a ti nkavkasmn sei nvm'akar sanan, v'eti p'vlev' ulien nen udlani.

⁹ M'ertu iluvn a v'nen huan Atua, iasapa v'nen p'asan a Kristu, hin Atua ihei asnn, v'eti m'ertu isapa v'nen p'asan a Kristu, a Tatei m'ei a Natn arru karlak a nln.

¹⁰ Ipavr ti m'ertu kinkin ipama asnm, v'eti iauirma v'nen lera, malav'i ipama al nmaham, mavr ip'as ani.

¹¹ Sena ti m'ertu ivr ip'as ani ip'lt m'ei arna pari stu iani.

A Sun ivr ip'as kavr ti ipama uam asnr

¹² Sei istudau iter uam a ti p'ulul ani asnm'i, v'eti narn ti p'ulul ani arna ruplet. V'eti nsarei p'ama asnm'i kav'ana m'a kam'i arna nahm'i a ti p'vrn ipap'as ipastudau.

¹³ A natn a tv'alm Atua itv'li sarei avvr ip'as anh. Amen.