Pilipi 1 - ALA WENE HIVIS DIRUP WATUGWA

¹ Hit Keretus Yesus hinim hunik Ala aburi ake denek o Pilipi agipik ako ovok erogo inim, Ala aburi vagenombogo agipik inim, ap yonggaragak inim, naburi wa. An Paulus Timotius niperenen Keretus Yesus ayeloman dugwit wene ambi yukherasogom.

² Nenasin Ala Nenowa Inis Ombok Yesus Keretus iperen henabwa en okbugugwis, hit henendawi ugun seyalek adenggen dogovovok yiluk, okhinipwis, ogagu dogopwak o.

At Paulus en enake samban ogagya lagagi wene

³ Hit an nape wengge iri dugwit, Nasin Ala, “Wa,” yugisiga.

^4-5 Samban ogagya dugwit, o endak en ogarit adigat wagya neyagek yogak yi hudi, Sek Wene hit ninim wane-wane ogarit nelagwi ako, nape wenggenggu dugwit, nendawi adenggen vaga henake samban ogasiga o.

⁶ At Ala en sek okhinivigiluk, endak ogagagi ako hudien, o hivis At Keretus Yesus warisogon andi vaga, yavup henendawima ogasiga ako atok weralogo avyarat ogarisogon imbita dugwit, yukheraliga.

⁷ An heda mago dugwit inim, eke heda maknetetek dugwit inim, avakwa en Sek Wene ako avyarat vagago dogopwak yiluk yugirigya dogogiluk Ala endawi hunik en andok okbaninggigi ako, ogagya neyagek hit an ninim ndatak ogasagwi. Halok, an nendawi mondok hit hinim hunik agirik atma, hit heneyave nape wengge iri halok nendawi sek dugwit, hit henake Ala, “Wa!” yugurup andi, segat ombasiga o.

⁸ At Keretus Yesus en henabwa imbita dugwit, endawi hunik okhinivisiga ako hak, an ogo hit ninim mondok nendawi hunik atma, “Ai, ninim avuk aklu ale,” henombasiga ako andi, Ala ilup aro.

⁹ Hit yi wene ndi wene adem des erogo hinilup agwi, eke, henendawi werek dugwit, yi menda ndi menda elese yedok hugwi, ogagu dugwit, it hinim henendawi hunik oginivisagwi ako, ambi inim ombok erogo oginipu dogovovok yiluk, henake samban ogasiga.

¹⁰ Hit anderogo ogagu dogovovok yiluk, henake samban ogasiga ako wane-wane ogagu hiniselok, yi menda ndi menda yenaga wokbaluk, eyave sek halok adigat okhedelagwi atma, Keretus warup amor ari wagya andi vaga At il hinugu dogomindik, “Hit weyak ogagetek sek adigat ogagu lagep o,” yiluk, ane anggin erogo ambi henovaga bigigayogonbuk.

¹¹ Yo enggen eve mondok sek yilin landiga andi hak, Yesus Keretus okbigigu hegek henovavut sek adigat ogarit lendagwi ako vaga avakwa en inil hinugu dogomundik, Ala inis adup ogagwi, wogobagwi, ogagu dogosogom o.

“Niluk dogop andi Keretus ake aro,” yugeragagi wene

¹² Ai naswei-narupwi o. An anggin-mbanggin okbanunggugwa ako vaga Sek Wene mondok ombok wigalarit lagagi atma, hinilup arovovok yiluk, yukheraliga.

¹³ An heda mago agirik yi vaga, it ap inis ombok Kaisar amwa malogo agarwik menda inim, it avakwa ugun agarwik menda inim, ovok erogo, “Paulus en Keretus wene yugeregek nagu lagagi ako vaga, heda magago mabiselagwima andoma agarik,” yiluk, inilup agagwa.

¹⁴ Eke, nenaswei Nenowa inim hunik agarwik nin wisane higirek ako andi, an heda maknitugwa ako vaga enendawi Nenowa ovaga vanggabaluk, yogak Ala wene yugeraup enalon dek mondok wadokdek dugwit, yugeregek nelagwi.

¹⁵ It ninen, “Nit ogo nenane hunggu dogopwak,” yiluk, avyarat enanggon numbutwi, “An iya hat iya,” yugwi, ogagu dugwit, Keretus wene yugerelagwi ovara, it ninen andi, enendawi sek vaga yugerelagwi.

¹⁶ An Sek Wene avakwa avyarat ombarupwak yiluk, mbilinogo yugirigya dogogiluk, Ala enat mondok okbaninggigi yoma agirik ako, it nin enendawi sek vaga yugerelagwi akoen inilup atma, ninim nenendawi hunik dugwit yugerelagwi.

¹⁷ Eke, it nin ako andi, enendawi sek vaga Keretus wene yugerelagwidek. Ata, “An yagaliga adigat hulupwak,” umbutu dugwit, an heda mago neyagek, anggin ambi inim novaga banusogom yiluk, enendawi lakot numbutu dugwit, yugerelagwi.

¹⁸ Anderogo yagan naguselok andi, segat. It enendawi lakot numbutu dugwit yagalagwi a, ata enendawi sek vaga yagalagwi a, ako andi, Keretus wene adigat yagalagwi atma, “Sek aro,” yiluk, nendawi adenggen adigat ombasiga. Eke, hivis ogo, nendawi adenggen imbita dogosogon.

¹⁹ Hiren nake samban ogagwi, eke, Yesus Keretus Averiniki en yonggat-nitya, ogasagwi andi vaga heda visilogo bani wulu warusogom an nilup atma, nendawi adenggen adigat ombasiga.

²⁰ An ogagya dogogiluk andok okbaninggigi ako, nin ogagetek neyalok, nanggadi arup nanggon atma, “Ai,” ombasiga. An neyave vaga Keretus siyabaup ombasiga ako, yogak wane-wane imbita dugwit, hambup halok, niluk dogop halok, “Sek adigat aro,” yiluk, nalon dek dugwit yugeregek nagu dogop hogop adigat ombasiga o.

²¹ Niluk dogop halok andi, Keretus ake aro. Eke, hambup halok andi, an ambi hedalaup atma, niluk dogop halok, hambup halok, segat.

²² An niluk dogop halok, Ala wene yugeregek naliga vaga ambi enggen yikbisaup hegek dogop atma, an nggatuk erogoat, “Hambigya a, niluk dogweik a?” yiluk, mikhedaup andi meyan.

^23-24 An Keretus niperen dogop andi, sek adigat imbita dugwit, wen vaga yoma hekbaluk, adema laup, “Ai,” ombasiga ovara, hit ninim dugwit okbigigaup ambi werek atma, nendawi mberen okneraliga o, naswei.

²⁵ Hit okbigigaup ambi werek imbitirikmu, hit avyarat ombasagwi ako vaga henendawi hoda agya hegek, adenggen umbutu dogovovok yiluk, ninimat dogop ombasiga.

²⁶ An heda visilogo hekbanumwi vaga henadema ari wagya neyalok, Keretus Yesus hinim hunik dugwit, henendawi adenggen ombasagwi ako ombok erogo arupwak yiluk, henadema warisogon ombasiga.

²⁷ Andi halok, Sek Wene Keretus avok ako, wane-wane des erogoat ogarit lagu dogones. Andien, an yoma neyagek hit ogarit nelagwi naruk hulimi a, ata andoma henadoma ari warimindikmu ogagu hinisami a, hit Sek Wene avyarat umbutu lagagupik wogogup ako, hekbagetek henendawi ambiat akluk, wadokdek dugwit, ogarit lendagwi ako nilup arisogon.

²⁸ It hinim ndup agarwik ako eneyave henalon habuk. Henalon embetetek nelagwi andi vaga, it hinim ndup agarwik akoen, “Iya! It avyarat yagalagwi atma, nit andi, degerogo bininaup higyo,” yiluk, yugwi, eke, hit andi, avyarat At Ala enat henagap wendakhinivisogon hinilup agwi, ogarusogom o.

²⁹ At Ala en henabwa imbita dugwit, ogarup imbitigi ako andi, hit henendawi Keretus ovaga vanggabaluk avyarat ombarovovok yiluk adigat imbitigibuk. Ata, At Keretus inis wogogup vaga anggin-mbanggin inim havovok yiluk imbitigi.

³⁰ An endak anggin-mbanggin okbanunggusigik, ogagya neyagu lagagup ako inim, eke, yogak okbanunggusigik, wadokdek dugwit, ogarit landiga hulisagwi ako inim, hit ninim wane-wane-at anggin-mbanggin okbininelagwi o.