Luke 1 - Musselmani Burmese

¹ မြတ်သော အရှင်သီယိုဖီလာစ်၊ များစွာသောသူတို့သည် အကျွန်ုပ်တို့၌ဖြစ်ခဲ့ပြီး အကြောင်းအရာများကို ရေးသားပြုစုခဲ့ကြသည်။

² ထိုအကြောင်းအရာများကိုမျက်မြင်သက်သေများဖြစ်၍ ဟဇရသ်အီစာအကြောင်း သတင်းကောင်းကို ဟောပြောသူတို့၏ပြောကြားချက်များအရ ကျွန်ုပ်တို့ထံလက်ဆင့်ကမ်းခဲ့ပါ၏။

³ အကျွန်ုပ်သည်လည်း ထိုအကြောင်းအရာအပေါင်းကို စတင်ဖြစ်ပျက်ချိန်မှစ၍သေချာစွာ လေ့လာခဲ့သူဖြစ်သည့်အလျောက်၊

⁴ အရှင်ဖတ်ရှုနိုင်ရန် အစီစဥ်အတိုင်း ကျမ်းစာစောင်ကို ပြုစုရေးသားလျှင်ကောင်းမည်ဟု ယူဆပါသည်။ အရှင်ကြားသိခဲ့သောအကြောင်းအရာတို့သည် ဧကန်အမှန်ဖြစ်ကြောင်းကို အရှင့်အားသိစေလိုသောကြောင့် ဤကျမ်းတော်မြတ်ကို ပြုစုခြင်းဖြစ်ပါသည်။

⁵ ယုဒပြည်၏ ဟေရုဒ်မင်းလက်ထက်၌ ဇကရီယာအမည်ရှိသော “အီမာမ်” ရှေ့ဆောင်တစ်ပါးရှိ၏။ သူသည်အဘိယ “အီမာမ်” အဖွဲ့ဝင်ဖြစ်၏။ သူ၏ဇနီးသည် ဟာရွန့်အမျိုးအနွယ်ဖြစ်ပြီး အမည်မှာအဲ့လီစ်ဘဲသ်ဖြစ်၏။

⁶ ထိုသူနှစ်ဦးလုံးပင် အလ္လာဟ်အရှင်မြတ်၏ရှေ့တော်တွင် ဖြောင့်မတ်မှန်ကန်သူများဖြစ်ကြ၏။ အလ္လာဟ်၏ “ရှရီယသ်” ပညတ်တော်ရှိသမျှနှင့် ညွှန်ကြားတော်မူချက်များကို တစ်သွေမသိမ်းလိုက်နာကြ၏။

⁷ သို့သော် အဲ့လီစ်ဘဲသ်သည်အမြုံဖြစ်၍ သားသမီးမရ။ သူတို့နှစ်ဦးစလုံးပင်အသက်ကြီးရင့်ကြလေပြီး။

⁸ တစ်နေ့သ၌ ဇကရိယာသည် မိမိ၏အဖွဲ့တာဝန်အလှည့်ကျသဖြင့် အလ္လာဟ်အရှင်မြတ်၏ရှေ့တော်တွင် “အီမာမ်” အဖြစ်တာဝန်ကိုဆောင်ရွက်စဥ်

⁹ အီမာမ်” တို့၏ထုံးစံအရမဲကျသဖြင့် အလ္လာဟ်အရှင်မြတ်၏ “ဗိုင် (က်) တွလ်မုကာဒဲစ်” ဝတ်ဗိမာန်တော် အတွင်းသို့ဝင်၍ နံ့သာပေါင်းကို မီးရှို့ဆက်သရ၏။

¹⁰ ထိုသို့မီးရှို့ဆက်သနေချိန်၌ ဝတ်ပြုသူလူအပေါင်းတို့သည် အပြင်မှာ ဒိုအာ ဆုတောင်းလျက်နေကြ၏။

¹¹ ထိုအခါ အလ္လာဟ်၏ “ဖရိချ်သာ” ကောင်းကင်တမန်သည် ဇကရိယာရှေ့တွင်ပေါ်လာ၍ နံ့သာပေါင်းမီးရှို့ရာ စားပွဲတော်၏လက်ယာဘက်တွင် ရပ်လျက်နေ၏။

¹² ဇကရီယာသည် ကောင်းကင်တမန်ကိုမြင်သောအခါ ထိတ်လန့်တုန်လှုပ်သွား၏။

¹³ သို့ရာတွင် “ဖရိချ်သာ” ကောင်းကင်တမန်က “ဇကရီယာ၊ မကြောက်နှင့်။ အလ္လာဟ်အရှင်မြတ်သည် သင်တောင်းဆိုသည်သည့် ‘ဒိုအာ’ ဆုတောင်းချက်ကို ‘ကဗူလ်’ ပြုလက်ခံတော်မူပြီ။ သင်၏ဇနီးအဲ့လီစ်ဘဲသ်သည် သင်အတွက်သားရတနာကိုဖွားမြင်လိမ့်မည်။ ထိုသားကို ယာဟ်ယာဟုအမည်မှည့်ရမည်။

¹⁴ သင်သည်ဝမ်းမြောက်ရွှင်မြူးလိမ့်မည်။ ထိုသားဖွားမြင်လာသည့်အတွက် လူအများပင် ဝမ်းမြောက်ကြလိမ့်မည်။

¹⁵ အကြောင်းမူကား၊ သူသည် အလ္လာဟ်၏ရှေ့တော်တွင် ကြီးမြတ်သူဖြစ်လိမ့်မည်။ သူသည်စပျစ်ရည်နှင့် သေရည်သေရက်ကို မသောက်ဘဲနေရမည်။ မိခင်ဝမ်းထဲမှာ ရှိစဉ်ကတည်းကပင် သူသည် ‘ရူဟုလ်ကုဒွတ်စ်’ သန့်ရှင်းသောဝိညာဥ်တော်နှင့် ပြည့်ဝလိမ့်မည်။

¹⁶ ထို့နောက်သူသည် များစွာသောအစ္စရာအီလီအမျိုးသားတို့ကို မိမိတို့၏ထာဝရအလ္လာဟ်အရှင်မြတ်သို့ ပြန်လည်ပို့ဆောင်ပေးလိမ့်မည်။

¹⁷ အလ္လာဟ်၏ရှေ့တော်ပြေးဖြစ်၍ နဗီတမန်တော်အီလ်ယာစ်ကဲ့သို့ ခွန်အားတန်ခိုးကြီးလိမ့်မည်။ သူသည် အဖတို့ကိုသားတို့နှင့် ပြန်လည်သင့်မြတ်စေလိမ့်မည်။ မနာခံသောသူတို့အား ဖြောင့်မတ်မှန်ကန်သောသူတို့၏ ဥာဏ်ပညာကိုပြန်လည်ရရှိစေလိမ့်မည်။ အလ္လာဟ်အရှင်မြတ်အတွက် အဆင်သင့်ဖြစ်စေရန် အရှင်မြတ်၏လူစုတော်ကို ပြင်ဆင်ပေးလိမ့်မည်” ဟု ဇကရိယာအားပြော၏။

¹⁸ ဇကရီယာက “ဤသို့ဖြစ်မည်ကို ကျွန်တော်အဘယ်သို့သိနိုင်ပါမည်နည်း။ အဘယ်ကြောင့်ဆိုသော် အကျွန်ုပ်သည် အိုမင်းသူဖြစ်ပါ၏။ အကျွန်ုပ်၏ဇနီးမှာလည်း အသက်ကြီးရင့်ပါပြီး” ဟု “ဖရိချ်သာ” ကောင်းကင်တမန်အားပြန်ပြော၏။

¹⁹ “ဖရိချ်သာ” ကောင်းကင်တမန်က “ငါသည် အလ္လာဟ်အရှင်မြတ်၏ရှေ့တော်တွင်ရပ်နေရသော ဂျီဗ်ရီလ်ဖြစ်၏။ သင့်အားဤသတင်းကောင်း သင့်ထံ လာရောက်ဟောပြောကြားရန် ငါ့ကိုစေလွှတ်တော်မူ၏။

²⁰ နားထောင်လော့။ သင်သည် ငါ့စကားကိုမယုံကြည်သောကြောင့် ဤအမှုအရာဖြစ်ပွားလာသည့်နေ့တိုင်အောင် စကားမပြောနိုင်ဘဲနေလိမ့်မည်။ အဘယ်ကြောင့်ဆိုသော် အချိန်တန်လျှင် ငါ၏စကားပြည့်စုံလာလိမ့်မည်” ဟုဆို၏။

²¹ လူတို့သည် ဇကရီယာကို စောင့်မျှော်လျက်နေကြ၏။ ဇကရီယာသည် ဝတ်ဗိမာန်တော်ထဲတွင် ကြန့်ကြာနေသည်ကိုတွေ့၍ အံ့ဩကြ၏။

²² ဇကရိယာသည် ဝတ်ဗိမာန်တော်ထဲမှ ထွက်လာလာသောအခါ စကားမပြောနိုင်တော့သဖြင့် ဝတ်ဗိမာန်တော်ထဲတွင် “ဝဟီ” ဗျာဒိတ်တော်ကိုရခဲ့ကြောင်း သူတို့ရိပ်မိကြ၏။ ဇကရီယာသည် စကားအ၍ လက်ရိပ်ခြေရိပ်ပြလျက်သာနေ၏။

²³ ထို့နောက်သူသည် သူ၏တာဝန်ကုန်ဆုံးချိန်၌ မိမိအိမ်သို့ပြန်လေ၏။

²⁴ ကာလအနည်းငယ်ကြာသောအခါ သူ၏ဇနီးအဲ့လီစ်ဘဲသ်သည် ကိုယ်ဝန်ရှိ၍ ငါးလပတ်လုံးအိမ်တွင်းအောင်းလျှက်နေ၏။

²⁵ အဲ့လီစ်ဘဲသ်က “ယခုအခါနောက်ဆုံးမှတော့ အလ္လာဟ်အရှင်မြတ်သည် ငါ့အားကောင်းချီးပေးတော်မူပြီ၊ အလ္လာဟ်အရှင်မြတ်သခင်သည် လူတို့၏ပြစ်တင်ရှုတ်ချခြင်းကို ငါ့ထံမှဖယ်ရှားတော်မူပြီ” ဟုဆို၏။ ဟဇရသ်အီစာဖွားမြင်တော်မည့်အကြောင်း ဟောကြားချက်

²⁶ အဲ့လီစ်ဘဲသ်ကိုယ်ဝန်ဆဋ္ဌမလသို့ရောက်သောအခါ အလ္လာဟ်အရှင်မြတ်သည် “ဖရိချ်သာ” ကောင်းကင်တမန် ဂျီဗ်ရီလ်အား ဂါလိလဲပြည်၊ နာဇရသ်မြို့ရှိ မိန်းမပျိုတစ်ဦးထံသို့ စေလွှတ်လိုက်တော်မူ၏။

²⁷ ထိုမိန်းမပျိုသည် ဒါဝူဒ် မင်းမှဆင်းသက်သူ ယူဆူဖ်အမည်ရှိအမျိုးသားတစ်ဦးနှင့် လက်ထပ်ထိမ်းမြားရန် စေ့စပ်ကြောင်းလမ်းထားသူဖြစ်၏။ သူ၏အမည်မှာ မရ်ယာမ်ဖြစ်၏။

²⁸ “ဖရိချ်သာ” ကောင်းကင်တမန်သည် မရ်ယာမ်ထံသို့လာ၍ “အစ္စလာမူအာလိုက်ကွမ်၊ ထူးကဲသောကျေးဇူးတော်ကိုခံစားရသောအမျိုးသမီး၊ အလ္လာဟ်သည် သင်နှင့်အတူရှိတော်မူသည်” ဟုဆို၏။

²⁹ ထိုစကားကြားလျှင် မရ်ယာမ်သည် စိတ်မငြိမ်မသက်ဖြစ်ကာ ဤနှုတ်ဆက်စကားကား အဘယ်သို့နည်းဟု တွေးတောလျက်နေ၏။

³⁰ “ဖရိချ်သာ” ကောင်းကင်တမန်က “မရ်ယာမ်၊ မကြောက်နှင့်၊ သင်သည် အလ္လာဟ်အရှင်မြတ်၏ရှေ့တော်မှာ မျက်နှာသာရလေပြီ။

³¹ သင်သည် ကိုယ်ဝန်ဆောင်၍ သားရတနာကိုဖွားမြင်လိမ့်မည်။ ထိုသားကို အီစာဟူ၍ အမည်ဖြင့်မှည့်ရမည်။

³² ထိုသားသည်ကြီးမြတ်လိမ့်မည်။ အမြင့်မြတ်ဆုံးသောအရှင်မြတ်၏သားတော်ဟု အခေါခံရလိမ့်မည်။ ထာဝရအရှင်အလ္လာဟ်အရှင်မြတ်သည် သူ့အဖဒါဝူဒ်မင်း၏နန်းမွေကို သူ့အားပေးတော်မူလိမ့်မည်။

³³ သူသည် ယအ်ကူးဗ်အမျိုးအနွယ်များကို အစဥ်မပြတ်အုပ်စိုးတော်မူလိမ့်မည်။ သူ၏နိုင်ငံတော်သည် အဘယ်အခါမျှ ကုန်ဆုံးလိမ့်မည်မဟုတ်” ဟု မရ်ယာမ်အားပြော၏။

³⁴ ထို့နောက် မရ်ယာမ်က “အကျွန်ုပ်သည် အပျိုစင်တစ်ဦးဖြစ်နေပါလျက်နှင့် ဤအရာသည် မည်သို့ဖြစ်နိုင်ပါမည်နည်း” ဟု “ဖရိချ်သာ” ကောင်းကင်တမန်အားမေး၏။

³⁵ “ဖရိချ်သာ” ကောင်းကင်တမန်က “ရူဟုလ်ကုဒွတ်စ် သန့်ရှင်းသောဝိညာဥ်တော်သည် သင်၏အပေါ်သို့ သက်ရောက်လိမ့်မည်။ အမြင့်မြတ်ဆုံးသောအရှင်မြတ်၏ ‘ကူဒူရသ်’ တန်ခိုးတော်သည် သင့်ကိုလွှမ်းခြုံလိမ့်မည်။ ထိုကြောင့် သင်မွေးဖွားမည့်ကလေးငယ်သည် သန့်ရှင်းမြင့်မြတ်သူဟူ၍လည်းကောင်း၊ အလ္လာဟ်အရှင်မြတ်၏သားတော်ဟူ၍လည်းကောင်း ခေါ်ဝေါ်ခြင်းခံရလိမ့်မည်။

³⁶ သင့်ဆွေမျိုးဖြစ်သော အဲ့လီစ်ဘဲသ်သည်လည်း အသက်အရွယ်ကြီးရင့်ခါမှ သားရတနာကို ကိုယ်ဝန်ဆောင်လျက်ရှိ၏။ အမြုံမ ဟုခေါ်ခံရသူသည် ကိုယ်ဝန်ဆောင်၍ ဆဋ္ဌမလသို့ရောက်လေပြီ။

³⁷ အကြောင်းမူကား အလ္လာဟ်အရှင်မြတ် မတတ်နိုင်သော အရာတစ်စုံတစ်ခုမျှမရှိ” ဟုဆို၏။

³⁸ မရ်ယာမ်က “ကျွန်မသည်အလ္လာဟ်၏ ‘ဗန္ဒဟ်’ အစေခံဖြစ်ပါ၏။ သင်ပြောသည့်အတိုင်း ကျွန်မ၌ဖြစ်ပါစေ” ဟု “ဖရိချ်သာ” ကောင်းကင်တမန်အားပြန်ပြော၏။ ထိုအခါ “ဖရိချ်သာ” ကောင်းကင်တမန်သည် မရ်ယာမ်ထံမှ ထွက်ခွာသွား၏။ အဲ့လီစ်ဘဲသ်ထံသို့မရ်ယာမ်သွားရောက်ခြင်း

³⁹ များမကြာမီမရ်ယာမ်သည် အသင့်ပြင်၍ တောင်ပေါ်ဒေသရှိယုဒပြည်မြို့တစ်မြို့ သို့အလျင်အမြန်သွား၏။

⁴⁰ သူသည် ဇကရီယာ၏အိမ်သို့ဝင်ပြီးလျှင် အဲ့လီစ်ဘဲသ်ကို “စလာမ်” ပေးနှုတ်ဆက်လေ၏။

⁴¹ မရ်ယာမ်၏နှုတ်ဆက်စကားကိုကြားသော် အဲ့လီစ်ဘဲသ်၏ဝမ်းမှကလေးသည် ခုန်လေ၏။ အဲ့လီစ်ဘဲသ်သည် “ရူဟုလ်ကုဒွတ်စ်” သန့်ရှင်းသောဝိညာဥ်တော်ဖြင့်ပြည့်ဝလျက်

⁴² “သင်သည် အမျိုးသမီးတကာတို့ထက် ‘မူဘာရဲက်’ မင်္ဂလာရှိ၏။ သင်၏ဝမ်း၌ရှိသောသူငယ်သည်လည်း ‘မူဘာရဲက်’ မင်္ဂလာရှိ၏။

⁴³ အကျွန်ုပ်အရှင်၏မယ်တော်သည် အဘယ်ကြောင့် အကျွန်ုပ်ထံသို့လာပါသနည်း။ အဘယ်ကြောင့် ဤအခွင့်ထူးကို အကျွန်ုပ်ခံစားရပါသနည်း။

⁴⁴ သင်၏နှုတ်ဆက်စကားကို အကျွန်ုပ်ကြားသောအခါ အကျွန်ုပ်၏ဝမ်းမှသူငယ်သည် ဝမ်းမြောက်ရွှင်မြူးသဖြင့် ခုန်လေ၏။

⁴⁵ သင်သည်လည်း အလ္လာဟ်အရှင်မြတ်သခင်မိန့်တော်မူသော စကားတော်အတိုင်း ပြည်စုံလိမ့်မည်ဟုယုံကြည်သဖြင့် ‘မူဘာရဲက်’ မင်္ဂလာရှိ၏” ဟု ကျယ်လောင်သောအသံဖြင့်ပြောဆို၏။ မရ်ယာမ်၏ချီးမွမ်းသီချင်း

⁴⁶ မရ်ယာမ်က၊ “ငါ၏စိတ်နှစ်လုံးသည် အလ္လာဟ်၏ ဂုဏ်တော်ကို ချီးမွမ်းပါ၏။

⁴⁷ ငါ့ကိုကယ်တင်တော်မူသော အလ္လာဟ်အရှင်မြတ်ကိုအမှီပြု၍၊ ငါ့ဝိညာဥ်သည် အားရရွှင်လန်းပါ၏။

⁴⁸ အကြောင်းမူကား၊ သူသည် မိမိ၏ ‘ဗန္ဒဟ်’ အစေခံသိမ်းငယ် နှိမ့်ချသောအဖြစ်ကို ကြည့်ရှု၍၊ အကျွန်ုပ်ကို မေ့လျော့မထားပေ။ ယခုအချိန်မှစ၍ နောင်လာနောင်သားအပေါင်းတို့သည် ငါ့ကို ‘မူဘာရဲက်’ မင်္ဂလာရှိသောသူဟူ၍ ခေါ်ကြလိမ့်မည်။

⁴⁹ အဘယ်ကြောင့်ဆိုသော် တန်ခိုးနှင့်ပြည့်စုံတော်မူသော အရှင်မြတ်သည် ငါ့အတွက်အံ့ဩဖွယ်သောအမှုများကို ပြုတော်မူသောကြောင့်ဖြစ်၏။ အရှင်မြတ်၏နမတော်သည် မြင့်မြတ်သန့်ရှင်းတော်မူ၏။

⁵⁰ အရှင်မြတ်ကိုကြောက်ရွံ့ရိုသေသူအပေါင်းတို့အား သားစဥ်မြေးဆက် ‘ရဟ်မသ်’ ကရုဏာထားတော်မူ၏။

⁵¹ လက်တော်ဖြင့် တန်ခိုးတော်ကိုပြတော်မူပြီ။ စိတ်နှစ်လုံးထဲ၌မာနကြီးသူများကို ဖရိုဖရဲကွဲလွင့်စေတော်မူ၏။

⁵² ရှင်ဘုရင်များကိုနန်းချ၍ သိမ်းငယ်သူများကို ချီးမြှောက်တော်မူပြီ။

⁵³ ငတ်မွတ်သောသူတို့အား ကောင်းသောအစားအစာကို ကျွေးမွေး၍ ချမ်းသာကြွယ်ဝသူများကို လက်ချည်းလွှတ်လိုက်တော်မူပြီ။

⁵⁴ အရှင်မြတ်သည် ငါတို့၏ဘိုးဘေးများအားပေးခဲ့သည့် ကတိတော်နှင့်အညီ၊ မိမိ၏‘ဗန္ဒဟ်’ အစ္စရာအီလီကိုမစတော်မူပြီ။

⁵⁵ အီဗ်ရာဟိမ်နှင့် သူ၏အမျိုးအနွယ်များအပေါ်ထားတော်မူသော ရဟ်မသ်တော်ကို အစဥ်အမြဲပြုခြင်းငှာ သတိရတော်မူပြီ” ဟုဆို၏။

⁵⁶ ထို့နောက်မရ်ယာမ်သည် အဲလီစ်ဘဲသ်အထံတွင် သုံးလခန့်နေပြီးနောက် မိမိအိမ်သို့ပြန်လေ၏။ ယာဟ်ယာဖွားမြင်ခြင်း

⁵⁷ အဲ့လီစ်ဘဲသ်သည် သားမွေးဖွားရမည့်အချိန်ရောက်သောအခါ သားယောက်ျားကိုဖွားမြင်၏။

⁵⁸ ဤသို့သူ့အား အလ္လာဟ်အရှင်မြတ်သည် အံ့ဩဖွယ်ကောင်းအောင် “ရဟ်မသ်” သနားကရုနာပြတော်မူကြောင်း ကြားကြသောအခါ အိမ်နီးချင်းတို့နှင့်ဆွေမျိုးသားချင်းတို့သည် သူနှင့်အတူရွှင်လန်းဝမ်းမြောက်ကြ၏။

⁵⁹ ထို့နောက် ရှစ်ရက်မြောက်နေ့၌ ထိုသူတို့သည်ကလေးငယ်ကို “ဟသ်နာ” ပြုအရေပြားလှီးခြင်းမင်္ဂလာiပြုပေးကြ၍ ကလေးငယ်အားဇကရီယာဟူ၍ အဖ၏အမည်ကိုပင် မှည့်လိုကြ၏။

⁶⁰ သို့ရာတွင် ကလေးငယ်၏မိခင်အဲ့လီစ်ဘဲသ်က “ထိုအမည်ကိုမမှည့်ပါနှင့်။ ယာဟ်ယာဟုမှည့်ခေါ်ကြပါ” ဟုဆို၏။

⁶¹ လူတို့က “သင်၏မျိုးရိုးတွင် ယာဟ်ယာဟုအမည်တွင်သူ တစ်စုံတစ်ယောက်မျှမရှိ” ဟု အဲ့လီစ်ဘဲသ်အားပြန်ပြောကြ၏။

⁶² ထို့နောက်သူတို့သည် ကလေးငယ်ကို အဘယ်သို့မှည့်စေလိုသနည်းဟု ဖခင်အားလက်ရိပ်ခြေရိပ်ပြ၍မေးကြ၏။

⁶³ ကရိယာသည် သင်ပုံတစ်ချပ်ကိုတောင်းယူပြီးလျှင် “ကလေးငယ်အမည်ကားယာဟ်ယာဖြစ်၏” ဟူ၍ရေး၏။ ထိုသူအပေါင်းတို့သည် အံ့ဩခြင်းရှိကြ၏

⁶⁴ ဇကရိယာ၏နှုတ်သည် ချက်ချင်းပွင့်၍ လျှာသည်လည်းအနှောင်အဖွဲ့မှလွတ်မြောက်ကာ ပြန်လည်စကားပြောနိုင်လာပြီး အလ္လာဟ်အရှင်မြတ်၏ဂုဏ်တော်ကို ချီးမွမ်းလေ၏။

⁶⁵ အိမ်နီးချင်းအပေါင်းတို့သည် ကြောက်ရွံ့ကြကုန်၏။ ဤအဖြစ်အပျက်သတင်းသည် ယုဒပြည်တောင်ကုန်းဒေသတစ်လျှောက်လုံးသို့ ပျံ့နှံ့သွား၏။

⁶⁶ ကြားကြသူအပေါင်းတို့သည် စိတ်နှစ်လုံးတွင်မှတ်သား၍ “ဤကလေးငယ် မည်သို့သောသူဖြစ်လိမ့်မည်နည်း” ဟု ပြောဆိုကြ၏။ အလ္လာဟ်အရှင်မြတ်၏ “ကူဒူရသ်” တန်ခိုးတော်သည် ကလေးငယ်နှင့်အတူရှိတော်မူ၏။ ဇကရိယာ၏ဟောပြောချက်

⁶⁷ ယာဟ်ယာ၏အဖဇကရီယာသည် “ရူဟုလ်ကုဒွတ်စ်” သန့်ရှင်းသောဝိညာဥ်တော်ဖြင့်ပြည့်ဝလျက်၊ ထို့နောက်သူသည် စတင်၍စကားပြောနေသည်။

⁶⁸ “အစ္စရာအီလီအမျိုးသား တို့၏အရှင် ထာဝရအလ္လာဟ်အရှင်မြတ်ကို ချီးမွမ်းထောမနာပြုကြပါစေသော။ အရှင်မြတ်သည် အစ္စရာအီလီအမျိုးသားတို့ထံသို့ ကြွလာ၍ သူတို့ကိုလွတ်မြောက်စေတော်မူပြီ။

⁶⁹ အရှင်မြတ်၏ ‘ဗန္ဒဟ်’ အစေခံဒါဝူဒ်အမျိုးအနွယ်တွင် တန်ခိုးကြီးမားသော ကယ်တင်ရှင်ကို ကျွန်ုပ်တို့အားလုံးအတွက် ပေါ်ထွန်းစေတော်မူပြီ။

⁷⁰ ကမ္ဘာဦးမှစ၍ ဖြစ်တည်လာသော သန့်ရှင်းမြင့်မြတ်သော နဗီတမန်တော်တို့၏နှုတ်မှတစ်ဆင့် မိန့်တော်မူသည်နှင့်အညီ၊

⁷¹ အရှင်မြတ်သည် ငါတို့အား ရန်သူများ၏ လက်မှလည်းကောင်း၊ ငါတို့ကိုမုန်းသောသူအပေါင်းတို့၏လက်မှလည်းကောင်း ကယ်တင်မည်၊

⁷² ငါတို့၏ဘိုးဘေးများအပေါ်ဝယ် ‘ရဟ်မသ်’ ကရုဏာထားတော်မူမည်ဖြစ်ကြောင်းနှင့်၊ ပဋိညာဥ်သစ္စာတော်ကိုသတိရမည်ဖြစ်ကြောင်း မိန့်တော်မူခဲ့ပြီ။

⁷³ ငါတို့၏အဖ အီဗ်ရာဟိမ်အား ကျိန်ဆိုတော်မူသော ပဋိညာဥ်သစ္စာစကားဟူမူကား၊

⁷⁴ အလ္လာဟ်အရှင်မြတ်သခင်က ကျွန်တော်တို့ကို ရန်သူတွေလက်ကနေ ကာကွယ်မယ်ဖြစ်ပြီး။ ထို့နောက် သင်တို့သည် မကြောက်ဘဲဝတ်ပြုကိုးကွယ်နိုင်သည်။

⁷⁵ သင့်ဘဝတလျှောက်လုံး ကိုယ်တော်ကိုမကြောက်မရွံ့ သန့်ရှင်းခြင်း၊ ဖြောင့်မတ်ခြင်းတရားဖြင့် ကိုးကွယ်ပါ။”

⁷⁶ “အသင်ကလေးငယ်၊ သင်သည် အမြင့်မြတ်ဆုံးသောအလ္လာဟ်အရှင်မြတ်သခင်၏ နဗီတမန်တော်ဟု ခေါ်ခံရလိမ့်မည်။အကြောင်းမူကား သင်သည် အရှင်ကိုယ်တော်အတွက်လမ်းကို အသင့်ပြင်ဆင်ရမည့်ရှေ့တော်ပြေးဖြစ်ပြီးလျှင်၊

⁷⁷ အရှင်မြတ်၏လူစုတော်အား ‘ဂူနာဟ်’ အပြစ်များကိုခွင့်လွှတ်တော်မူ၍ ကယ်တင်တော်မူမည်ဖြစ်ကြောင်း ပြောကြားလိမ့်မည်။

⁷⁸ ါတို့၏အလ္လာဟ်အရှင်မြတ်သည် ‘ရဟ်မသ်’ သနားကရုဏာနှင့် ကြွယ်ဝတော်မူ၏။ အရှင်မြတ်သည် ကယ်တင်ရှင်ကို ဂျန္နသ်ကောင်းကင်မှနေရုဏ်အလင်းသဖွယ် ငါတို့ထံသို့ ပို့ဆောင်၍၊

⁷⁹ သေမင်း၏အရိပ်တွင်နေထိုင်သူများအပေါ် ထွန်းလင်းစေတော်မူလိမ့်မည်။ ထို့အပြင် ငါတို့အားငြိမ်းချမ်းရေးလမ်းသို့လည်း ပို့ဆောင်စေတော်မူလိမ့်မည်” ဟု “ဝဟီ” ဗျာဒိတ်တော်အားဖြင့် ဟောပြောလေ၏။

⁸⁰ ကလေးငယ်သည်၊ ကြီးပြင်းလျက် အသိဥာဏ်ရင့်သန်လာ၏။ သူသည်အစ္စရာအီလီအမျိုးသား တို့အလယ်၌ မဟောပြောခင်တိုင်အောင် တောကန္တာရတွင်နေ၏။