Ester Uram 1 - Er Imtamnyi Uram

Weik sien ner si Wasti biryi weik sienyi si Ahasyweros uram asi kum kekebmou ba, taklobmou uram deyok 1:1-22

¹ Minob talak aryi weik sienyi si Ahasyweros kuramwe. Anyi bira Persia mutuk nirya kalingnamwe. Ara, yaletam mutuk India mutuk aryi kuboka kitingbantam mutuk Etiopia mutuk ababyi kalingnamwe. Anyi biryi taleamwe sien atei ara 127 baryi sien atei taleamwe.

² Ba, weik sienyi Ahasyweros er erebdob bun sokon bukoka kalingnamwe atei ara Susan atei aryi kalingnamwe. Ba, Susan atei ara lika aryi doboka aknabdongoamnyi.

³ Ani, er weik sienyi kibmou ba, talebmou talak kwalina winiryi kwalina aryi erci, “Weik kwalina yubkarebkwan,” tenen er amwetam wa in sien nang ab, yuk wa irmilin nang ab nirya asi er ai du dongobmou. Tonda, Persia mutuk ab, Media mutuk yin doun nang bomenengna nang ab, er taleamwe mutuk atei ninyi bon nang ab, weik atei sien nang ab ababyi nirya weik sienyi urasin dam bulubmai ba, er yina yubkarebmou.

⁴ A ninyi yubwa nirya nabmou ara er kwalina akwe kum yibkarebkwamwe ati nabmou. Eda, er kalingdamwe mutuk kuramwe bona talena ab, er weik sienyi kiamuryi, taleramwe dinyi ab asi sun urasin dam amurdeinkwamwe ati nabmou ba, bulubmai. Ba, erci er dinyi nirya amurdeiriramwe talak ara uki 180 baryi aryi yina yubkareboka er bona talena amurdeiriramwe.

⁵ Weik sienyi biryi a kwaliboka yirkareramwe ani, sirya bisibkwamou talak aryi erci, “Yuk nang ni atei kunun dam kuramingnyi nang ati ton kwalibkarebkwan,” tenebmou. Ura, erci uki tabaryi ara er kuramwe atei si Susan atei dam kuramnyi nang ati kwaliboka yibkarebmou. Yubmou ura, akatei dam si erebdob nang babyi, talyi nang babyi er kuramwe atei dam keta asi bulubdeiboka kwaliboka yibkarebmou.

⁶ A kwalina yubkarebkwamwe ura, sunci atei keta asi kerketa laboka kweirya doboka aknabmai. Ara, ato kubmai. Weik sienyi atei dam keta asi sunci kat keil abyokomna ikweleamnyi dub ai asi aling kolo bol amuma-amuma labkwetebnin yibinmai. Ara, namin aling kolo si kain lenan bol kuruta dinyi ab, kait bol dinyi ab asi lenan bulbul aryi biribdongoboka labkwetebmai. Ba, aling kolo lamkwetenmai ura, tabwe diribdongona ara keil si perak aryi kikniamnyi dinyi asi lumubdongobmaici, labkwetebmai. Ba, bun sokon ara dengna weik keil si emas ab perak ab aryi kikniamnyi dinyi asi kiknibminikmai. A bun sokon ara bol turukna-turukna keil aryi yangaboka doamnyi ai amsuna deici asi deibmai. A turukna-turukna ara dengna weik keil si pualam ab, keil si marmar kait dinyi ab, keil si gewang ab, keil si pelinggam ab aryi dukoka yangaboka doamnyi deici asi deibmai.

⁷ Ba, me yibkarebmou ababyi me yin meyok ara dengna weik keil si emas aryi bol amuma-amuma kiknibdanamnyi meyok aryi yibkarebmou. Ba, co anggur du yung me ababyi weik sien nang kikniboka, ton sungtalena kum uca, kabloboka kiknibminikamwe aryi yibkarebmou.

⁸ Ba, me yina ara ato kuboka lilibdeamwe: Er ai wa in nang asi, “Ninyi me yirkarenkwamunyi babyi, sunci arung-arung eboka karena mem. Eda, sun, ‘Yibkwayeb,’ tenebmangnyi to kuboka dingdeirinkwandarur,” eamwe to kuboka yiramnyi.

⁹ Ato kuramwe talak aryok weik sienyi Ahasyweros er ner si Wasti bibabyi nerabwe mer ati weik sienyi atei dam aryi yina yuboka yibkarebmou.

¹⁰ Yirkareramwe ani, uki tabaryi tum berekmou ura, weik sienyi Ahasyweros biryi co anggur du yung me yibmou deyok aryi er kanya kilkil kubmou ba, er dam kobdob wa iramnyi nang si sida-sida nang asi arukmou. A arukmou nang sun si ara: Mehuman ab, Bizta ab, Harbona ab, Bigta ab, Abagta ab, Zetar ab, Karkas ab asi arukmou.

¹¹ A nang asi arukmou ara, “Weik sien ner Wasti bisi nabmunyi ura, erci weik sien nerabwe kaluraming dinyi mahkota kalubloboka ni weik sienyi urasin dam yarur. Ba, sun ni ai dam yandoka wekmang nang ur yuk nang babyi, sien nang babyi nirya aryi ni ner er nong nena ab er urasin ab dibdengnyi ura, ‘A ner ara ner teleb,’ tenebkwaming ati, amurdaryarur,” eboka arukmou.

¹² Uca, weik sien ner Wasti biryi weik sienyi er dam kobdob wa in nang aryi weik sienyi ebdeibmou to erbinmai uram kekebmouci, erci, “Ni li,” ebmouci, kum kunubmou. Ba, weik sienyi ato kubmar en uram kekebmou ura, erci, “Ni mining ner aryi ni uram kum kekenurur ara unato ati do?” tenen aryi er yu weik kubmou.

¹³ Ba, weik sienyi biryi, “Ni ner ara una kuboka wenebkwan do?” tenen erci sun teleb dinyi malyi dinyi bingna nang asi asibmou. Ara, minob kubde yangaramnyi to lilirdeirin nang ab, ninyi wenena uram bingna nang ab aryi, “Ato kubmangnyi nang ara ato kuboka wenebkwandum,” eboka arungdamnyi to ati sunsi asibdenmou.

¹⁴ Ara, ninyi si Karsena ab, Setar ab, Admata ab, Tarsis ab, Meres ab, Marsena ab, Memukan ab asi nabmou ura, asibdenmou. A tabaryi nang ara weik sienyi bisi uram dorkaren nang kuramiryok, Persia mutuk ab Media mutuk ab erebdob wa asi doamnyi. Tonda, sunda weik sienyi dam bindoka uram ena ababyi mem kuma eramnyi. Ati, a nang asi weik sienyi biryi ato eboka asibdenmou,

¹⁵ “Nisi weik sien ner Wasti biryi ukubmanir to dinyi ara minob kuramnyi sien nang aryi lilirdeirin kerek sengna umbura dam ara una eboka sekdeibyi do? A ner aryi ni Ahasyweros biryi ni dam kobdob wa in nang asi uram eboka arukmonwe dinyi kum kununa kum kubmar dinyi ara una kubkwanun do?” eboka asibdenmou.

¹⁶ Uca, ninyi si Memukan biryi weik sienyi urasin dam ab, yuk erebdob nang urasin dam ab aryi kutam ikdongboka luknubdanmou ura, ato ebmou, “Nai, weik sien ner Wasti bira weik sienyi kan dam akwe malyi kum kibdongobmakir. Eda, a mutuk erebdob nang dam ababyi malyi kibdongobmasir. Ani, nai weik sienyi Ahasyweros, kanci kalingdum mutuk nang babyi nirya asi malyi kibmasir.

¹⁷ Ara, ato deyok ati ebman: Weik sien ner aryi kubmar to malyi kanya dinyi ara nerabwe mer nirya kekebingnyi ura, dakdongobdanin yibinkwamang. Ba, nerabwe mer aryi sun akenyi yabwe uram kum kekebkwamasing. Ato kubmar uram asi ninyi nirya dam asi, ‘Weik sienyi Ahasyweros biryi, “Weik sien ner Wasti ni dam iniboka boyandarur,” eboka arukmo ba, inirbamongwe uca, “Ni li,” ebmar,’ en uram nukde yibinkwamang.

¹⁸ Ba, a tum aryi Persia mutuk ab Media mutuk erebdob nang sun nerabwe ababyi weik sien ner ukun dinyi kekebingnyi ura, a tum aryok sun akenyi yabwe uram kum kekebkalibkwamang ba, sun nang bitinyi ina ngilikdandoka, kerebdandoka obdanin yibinkwamang.

¹⁹ Ati, nai weik sienyi, kanci teleb tenebminyi ura, ato kubkwandum: A ner asi taklobminyi ura, yuk ner dobdobdum. Ara, yuk nerabwe, er kuramwe to kum uca iya teleb kunkwanci ner asi weik sien ner wa karebkwandum. Tonda, kanci kerek sengna umbura deib aryi ato eboka sekeibdum, ‘Wasti bira ukuryok akiryi deyok kouboka er kubde binkwanda nirya ara weik sienyi dam iya yangana kum kunkwande,’ eboka sekeibdum. Ba, a kerek sengna ara weik sienyi biryi erdeirin uram dakbisibman kum uram kerek sengna kibdeibdum. Ani, kan talebumwe mutuk Persia ab Media ab mutuk kunub nang ati, ‘Ato kubkwanub,’ eboka sengdeirin kerek sengna umbura kerek sekdongobkwayeb.

²⁰ Ba, weik sienyi kanci uram sekweteboka uram ebdeibmaminyi dinyi asi kan iya weik kalingnandim mutuk nirya kekebkwaming. Ura, tonda nerabwe mer nirya ara sun akenyi yabwe uram akwe kekeboka kununkwaming. Ara, weik nang erebdob nang nerabwe aryi kuboka ur yuk nang nerabwe ababyi sun akenyi yabwe uram kekeboka kunubkwaming,” eboka sienyi dam uram dobkarebmou.

²¹ Ba, weik sienyi ab yuk erebdob nang ab aryi anyi biryi dobkarebmou uram ara, “Teleb,” tenebmai, ura weik sienyi biryi Memukan biryi uram dobkarebmou to kunubmou.

²² Ura, weik sienyi biryi kerek sekoka er taleamwe mutuk atei dam nirya sekoka deibmou. A kerek sekmou ara sun mutuk yuk-yuk, atei yuk-yuk, uram yuk-yuk eramnyi to ab, sun huruf sengna yuk-yuk sengnamnyi to kuboka kerek sekoka deibmou. A kerek sengna umbura ato eboka sekoka deibmou, “Ninyi sal ara sun ai ninyi sun sienyi kubkwandur. Ba, sun nerabwe ara sun akenyi yabwe ebmaci uram kunubkwanung,” eboka sekdeibmou.