Daniel Uram 1 - Er Imtamnyi Uram

Babel mutuk sienyi ai deyok 1:1-21

¹ Ura, Yehuda yala nang asi Yoyakim biryi weik sienyi kiboka taleamwe. A taleamwe talak kwalina bitinyi bisibmouci, winiryi kwalina sirya kibmou ura, Babel sienyi si Nebukadnezar yandoka Yerusalem atei asi yandoka aknaboka kalikamnyi.

² Ara, Er Iya Erebdobnyi biryi Nebukadnezar biti mundu lobmou ba, Yehuda yala nang weik sienyi Yoyakim ab, Er Imtamnyi ai deiriramnyi keica nirya ab boboka mutuk Sinear dam binmou. Ura, er kwemdeina moloramuryi, dama deiriramwe miningdamwe keica dam bindoka minikmou.

³ Ura, sienyi Nebukadnezar biryi sienyi er ai dam wa iramnyi nang sun nai kiaminyi si Aspenas bisi ato eboka arukmou, “Sun Israel sienyi yala nang ab, sien nang yala nang boyabwe nang ab asi kam nang mikbaryi nang akwe wibdum.

⁴ A wibkwaminyi nang ara diblilibdeboka ninyi teleb nong babyi, mikib teleb akwe kuanci nang babyi, tonda etekdob bingna nang akwe wibkwandum. A nang aryi weik sekolah sekoka, bingna dinyi bikoka, sienyi ai dam a wa ina kikimanto nang akwe wibdum. Wibminyi ura, Aspenas kanci a nang asi Babel mutuk uram ena ab Babel mutuk uram sengna ab eterebdum,” eboka wa karebmou. Ba, a nang asi Aspenas biryi Babel mutuk uram etereramwe.

⁵ Ba, a etereramwe talak ara akatei sienyi biryi ato eamwe, “Sekolah a sengnamunyi talak ara tuba-tuba kwaning ab, me ab karenkwansin,” eamwe. Ba, a nang ara sienyi er yiramwe anggur me ab, kwaning ab teleb dinyi akwe tuba-tuba langkarikeiboka kareram kwalina winiryi yibde kuramnyi. Ani, sirya sekmai ura, sienyi bisi bindoka, “Kan sienyi kibumwe ai wa inkwayeb,” erbinmai.

⁶ A nang sun si ara Daniel ab, Hananya ab, Misael ab, Azarya ab kuramnyi.

⁷ Bok, akatei sienyi ai wa inkwamnyi deyok aryi sienyi a nang si dobnin yibinmou. Daniel si ara, “Beltsazar,” eboka si dobmou. Ba, Hananya bira, “Sadrakh,” eboka si dobmou. Ba, Misael bira, “Mesakh,” eboka si dobmou. Ba, Azarya bira, “Abednego,” eboka si dobmou.

⁸ Ba, Daniel bira a sienyi biryi sunti kiknirdeiriramwe anggur me ab kwaning ab ara, “Iya ni kum yinkwan,” eboka akatei sienyi ai wa in nang sienyi bisi ebdeibmou. Ato ebmou ara ato tenebmouci, kubmou, “A me ab kwaning ab yiranyi asi ni betebdongobdanyei,” tenebmouci, a me kum yiramwe.

⁹ Ato kubmou ara Er Iya Erebdobnyi biryi Aspenas kanyitam wa ibmou ba, Aspenas biryi Daniel bisi kanyi deiramwe.

¹⁰ Uca, sienyi ai wa in nang sienyi biryi Daniel bisi ato ebmou, “Akatei sienyi biryi, ‘Me ab kwaning ab tonkwa yinkwayeb,’ ebwe dinyi asi kan yina kum kuraminyi ura, kan nong kamuk yukto kubkiriryi, kan kwit yabwe bol kamuk yukto kubci ura, sienyi biryi ni obnicei. Ati, kanda a yina tangna mem, yironkwandum,” ebmou.

¹¹ Uca, Daniel biryi akai ai wa in nang sienyi Aspenas biryi tikeiamunyi bisi ato ebmou, “Ato ebmarim ura, nun bol kamuk dibdenkwamasirim ati, uki takubaryi ara nunsi yuk yina karesina mem. Eda, me sirik ab, buna demang ab akwe karenmasiminyi ani, nun bol kamuk tubto dibdesurum. Ba, nun bol kamuk asi yila biribkwansir kum? Yuk nang akai wa in nang asi yila biribkwande kum?” ebmou. Ura, Daniel tam kibmaici, er ebmou to kunubmai nang ara, Hananya ab, Misael ab, Azarya ab milibmai.

¹² Ani, Daniel biryi tubto ato ebmou, “Ukubdenkwayeb ati, kan wa irmiliranking nang asi nong kamuk buruk-buruk ebkwande kum? Nun tam nang asi yila biribkwansir kum? Ati, uki takubaryi nunsi yina karesina mem. Eda, me ab buna ab demang akwe karebkwansurum.

¹³ Ba, uki takubaryi sirya bisibci ura, kan wa irmilin nang ara, sienyi yina yiramingnyi nang bol dibde? Nun bol dibde kibkwayeb. Ukubibyi ba, kan wa in nang bol dibdeminyi ura, kan tenebminyi to da ukubdum,” ebmou.

¹⁴ Ura, sienyi ai wa iboka kalingna sienyi Aspenas biryi tikeibmounyi biryi a ebmou to ara, “Teleb,” tenebmouci, uki takubaryi ukubdenmai.

¹⁵ Ura, kunmai ani, uki takubaryi tum sirya wengbinmou ura, sun nong bol dirdaramnyi uca, sienyi yina tuba yiramnyi nang bol asi yila biribdanmou. Uca, sienyi yina kum yiramnyi nang bol ara nong bol tungdena kum kubmou.

¹⁶ Ato kubmou deyok aryi sienyi ai wa iboka kalingna deyoknyi biryi Daniel ab er kwit yabwe ab ara yina ton kum kareramnyi. Eda, buna ab me ab akwe kareramnyi ba, yibde kuramnyi.

¹⁷ A dumbaryi nang ara Er Iya Erebdobnyi biryi bingna dinyi yala ilinto kareramwe ba, bingnamnyi. Ara, kerek sengna babyi, etekdob bingna babyi ilinto bingnamnyi. Ani, Daniel bira lengdera lilirdeirin dinyi mabde baramwe dinyi ab, kunumna deici aryi asing eiriramwe dinyi ab ababyi liliboka, “Ato dinyi kunubkwande ati, a lengdera mabse,” tenen bingnamwe.

¹⁸ A talak kubde baramnyi ani, akatei sienyi Nebukadnezar biryi ato eamwe, “A nang sekolah etereramunyi ani, kwalina winiryi bisibci ura, ni dam boyankwandarur,” eamwe. Ba, a nang asi sekolah etereramnyi ani, a mutuk sienyi eamwe to kunuboka kwalina winiryi sirya kubmou. Ura, akai wa in deyoknyi biryi a Israel nang asi akatei sienyi Nebukadnezar dam bobinmou.

¹⁹ Ba, sienyi Nebukadnezar biryi sun sekolah eteramnyi dinyi asi asirdenmou. Uca, yuk nang ara a etereramnyi dinyi diboka kum bikamnyi. Eda, Daniel ab, Hananya ab, Misael ab, Azarya ab asi erebdobto bikamnyi. Ato kuboka bikamnyi deyok aryi sienyi biryi er sienyi kiboka taleamwe ai asi, “Wa karebsinyi ba, wa ibkwandum,” ebmou. Ba, a nang ara akatei sienyi ai dam kuboka wa iramnyi.

²⁰ Ba, sienyi ai dam a wa ibde kuramnyi talak ara, etekdobto dinyi sienyi biryi a nang asi molobci ura, sunci lilirdeiriramnyi. Ato kuramnyi deyok aryi sun a nang bingna ara, mirei bingna nang bingnamnyi to kum uca bisibkaboka eitoto bikamnyi asi bikmou.

²¹ Ani, Babel mutuk sienyi tubto Koresh unubmai talak ababyi Daniel bira a mutuk tuba kuramwe.