Juda 1 - O Vatavata we Garaqa 1931 (Vanuatu)

¹ I Juda, o rowrowovag anan i Jesus Christ, tasin James, mun rasei me suwarera, me tape veta neira alo God o Mama, wa me kokor gorora alo i Jesus Christ:

² O magarosa wa o tamata wa o tapeva a qoqoqo mun kamiu.

³ Ra meratape, alo na me la o tinegaro si na rave at mun kamiu ape liŋe esuva nina we taur pul apena, me gege inau si na rave mun kamiu si na vasosov kamiu si a gege leasag ape nomtup ilone me ukeg vatuwale veta ma munra roŋo.

⁴ Ape o tuan tanun apena me kalo pata roroŋo ma, pa me vonogira veta we tuai ape lea veveg iloke, ira ganganor nane, we ge ris o sogov mon God inina mun liŋe wasmata, wa we tala i Liwoa goro tuwale wa i Lord inina, i Jesus Christ.

⁵ Pa nau we maros we ge lolomaran kel kamiu, pa kam we gilala vatuwale o gene ŋaŋ, si i Lord me vaesu paso veta o sul nan o vanua Misraim, ni me ge tagea mulaŋ ineira gate nomtup.

⁶ Wa ira angel mulaŋ gate kokor goro nor o moe tanoi, nava me toavtag nor o tur tano togatoga, ni me taur goro mun o taltalai ti galava alo siliga ape veveg tape qoŋ liwoa ilone.

⁷ Tama mulaŋ Sodom wa Gomora, wa o laqlaqe vanua mulaŋ wawaliog rara me ukeg kelura tamaine ape togara pakapaka, wa ape tataga o visogoi we sea, me mapura ti o makaliu gina, we roŋotag mora o veveg wasi o av galava.

⁸ Nava tamaine mulaŋ iragai iloke we qoreqore we ge lepa o visogoi, wa we gevtag o liŋe liwoa goro wa we liŋasapur ira gene we leŋas ŋaŋ.

⁹ Pa i Mikael o moe angel tana Satan we varkesa, we varleasag ape turian Moses, pa ni gate nommot si a vile o lea veveg liŋasapur apena, nava ti vet wa, I Lord ni ŋorov goroko.

¹⁰ Panava iragai ilone ape sava gene ŋaŋ neira gate lolomaran apena, neira we liŋasapur apena; pa o sava gene ŋaŋ neira we gilala gap mun o matev tanun, tama o gene esu ŋaŋ gate nonom ilo, alo ine ŋaŋ nane ilone neira we tagtagea apena.

¹¹ Tur magarosa neira! Ape neira me gis raka mora alo matesalan Kain; wa me sasale gap alo lerava non Balaam, manig som rusarusai; wa me mate tagea alo liŋan Kora we tamtames.

¹² Iragai ŋaŋ iloke o malo we rasa gagao nake alo nomiu o ganagana tapeva, we ganagana saratuwale amen kamiu; ira altag goro nake we vaŋvaŋan kelura wa gate apemaragai; iloke ŋaŋ o maligo o wena tagai apena, o laŋ ŋaŋ we nuravag kelkel gap; iloke o tangae ŋaŋ nake o tau veta ma pa o woai tagai, me mate vagarua veta, me vutvut savrag ran.

¹³ Iloke ŋaŋ o rep vanameag talo lama, we uresagavag o moromorosa tape sale gene ŋaŋ te apemaragai apena; o vitu leralera ŋaŋ, me taurmate veta mun neira o qoŋ silmatoga ti tuai ti tuai.

¹⁴ Pa munragai ŋaŋ mulaŋ iloke i Enok o laveruai ma nan Adam me gagapalag o liŋe prophet, we vet si, Ilo, i Lord veta ma amaira roŋo anana tar tar;

¹⁵ sin sar munragai nol, wa sin veveg qalo ira ganganor nol ape mor o gagapalag ganganor nol neira me ganganor ti apena, wa ape vavae wasvat nol ira kiskislag ganganor ŋaŋ ilone me wales neia nia.

¹⁶ Iragai ŋaŋ iloke we terevaŋutŋut wa we wutoto, we mulemule tataga nor o tortoron gese, wa navalara we vava lue o vavae ŋaŋ we poa aneane, neira we lavlav vires o nago tanun o manig wanea.

¹⁷ Nava ikamiu, ra meratape, tur lolomaran kel ape vavae ŋaŋ ilone ira salan i Lord inina i Jesus Christ me gaganag mora amoa;

¹⁸ si neira me vet nan qa mun kamiu si, Alo qoŋ ŋaŋ o paspasoanai o tuan tanun poroporosag te rasu ma, we mulemule tataga nor o tortoron ganganor gegese.

¹⁹ Iragai ŋaŋ iloke we qeteg vilevilewora, we talo esu visogoi vires, o Vui itagai amaira.

²⁰ Nava ikamiu, ra meratape, tur taur kalo kel naimamiu avune liŋe nomtup nanomiu iloke we roŋo aneane, we tatataro alo Vui we Roŋo.

²¹ Tur kokor goro kel kamiu alo tapeva mon God, we nernerei o magarosa non i Lord inina i Jesus Christ, gai niŋa o esu galava.

²² Wa tur magarosa gorora, irasei nan qa o tuaniu we nom varuarua;

²³ wa tur vaesura o tuaniu, we wosag luera ma nan o av; wa tur magarosa gorora o tuaniu mun o gogolo, we ŋustup o siopa mulaŋ we pulsama mun o visogoi.

²⁴ Naŋ munia gina we mana si a kokor goro kamiu nan wa tutuag, wa si a vatira kamiu ape nago leŋasina, napugamiu tagai, wa mun o lakalaka liwoa apena;

²⁵ munia nane, God tuwale wora i Vaesunina, o leŋas wa o liwoa, o riga goro wa o mana, ilokenake ran ma, wa ti tuai ti tuai. Amen.