Matthew 4 - Te Gongo Gaoi

Te pakenga kia Jesus

¹ Ko Jesus na hutiaki e te Spirit Tapu ki te tugatea ke pake e Satan.

² Mugi i tena he'e kai 'anga o katoa haka haa ona 'ao ma te katoa haka haa ona poo, ko Ia na ongea to'a.

³ Ko te 'atua pake noko a'u kia Jesus o hai atu, “Ko Koe nimaa te Hosa o God, gea atu ki na hatu nei ke haka haagiu ai ni utunga.”

⁴ Ko Jesus noko haka tau kinai o hai atu, “Na 'oti i te hai ake na Kanukanu Tapu: ‘Ko pegea e he'e manga maa'ugi i na utunga, kae maa'ugi ma'u i ba'i kupu gea ai a te 'Aitu.’ ”

⁵ Ma te kakabe e Satan ia te Ia ki te manaha tapu i Jerusalem, o hai ia te Ia o tu'u i te kunga e hu'ai ma'u'agunga i te Hage Tapu,

⁶ o hai atu kinai, “Ko Koe nimaa te Hosa o God, 'utu atu ki gago, na'e na 'oti i te hai ake na Kanukanu Tapu: ‘E hai ke go kaunaki mai ona ensel, agatu'u ia te Koe, e hai ma'u kigatou go nekeneke ia te Koe i ogatou gima, ke go noka te tukia te ba'e o 'Ou ki he hatu.’ ”

⁷ Ma te haka tau a Jesus o hai atu, “Na Kanukanu Tapu e konei na hai ake ma'u: ‘Noka te tuku ia te 'Agiki te 'Aitu o 'ou ki te hai lobo.’ ”

⁸ Ma te haka kabe haka hoki e Satan 'ia Jesus ki te ogo hu'ai ma'u 'agunga, o haka kite kia te Ia na kakai 'anga o te kege nei ma ona gaoi 'anga.

⁹ Kae hai atu, “Na me'a nei ngatahi e hai kau go haiga'a 'ia kia te Koe, i te poi toko tugi Koe o sogi kia te au.”

¹⁰ Hai atu kinai a Jesus, “Hinatu 'aatea ia te Au, Satan. Na 'oti i te hai ake na Kanukanu Tapu: ‘Manga sogi atu kia te 'Agiki te 'Aitu o 'ou, ma te manga hai hekau kia te Ia launatasi.’ ”

¹¹ Ma te hano 'aatea a Satan ia Jesus, kae boo iho na ensel o 'aabaki kia te Ia.

Ko Jesus noko haka tu'u te tohi'aki

¹² Te 'aso na gongo ai a Jesus ko John kua tuku 'ia ki te hage kagohia, ko Ia na hoki ki Galilee.

¹³ Ko Ia na he'e noho i Nazareth, ka na hano o manga noho i Capernaum, te manaha pata i te gano i Galilee, i na kunga henua o na hanohano o Zebulun ma Naphtali,

¹⁴ ke haka maa'ogi ai nia noko gea kinai te taauga ia Isaiah:

¹⁵ “Na kunga henua o na hanohano o Zebulun ma Naphtali i te pa'asi ki tai i te bai mimigo i Jordan, ko Galilee te kakai 'anga o na pegea 'aatea,

¹⁶ te 'apitanga manga noho 'aki i te poo'uginga kua 'oti i te hiina'i ki te maagama hu'ai hua'eha; ko na pegea manga noho 'aki o maikia i te kai mamate, kua hetae kinai te maagama.”

¹⁷ Haka tu'u i na 'aso na o hano, ko Jesus na haka tu'u tena tohi'aki: “Koutou sui tegeu'a atu, iteme'agaa te Hakahua 'anga a te 'Aitu kua hitaiaki.”

Te mataa haka pogo 'anga ona pegea haka ako

¹⁸ Ko Jesus noko manga sehu i na pa'asi o te gano i Galilee. Ko Ia noko ina ki te hai haanau: ia Simon noko mate ko Peter, ma te taina ia Andrew. Ko kigaaua noko manga hai bugho i te gano, iteme'agaa ko kigaaua gua taangata tautai.

¹⁹ Ma te hai atu kinai a Jesus, “Tata'o mai ia te Au, ka kau hai 'ia ia te kougua ke go tautai pegea.”

²⁰ Ko kigaaua na ghali o ti'aki ogaua bugho, kae tata'o ia Jesus.

²¹ Nimaa boo soo atu kigatou, ko Jesus noko ina ma'u ki tegaa hai haanau: ia James ma John, gua hosa o Zebedee manga i te baka ma tegaaua tamana. Noko manga gosigosi ogatou bugho, ma te hakapogo e Jesus 'ia te kigaaua.

²² Ma te ghali kigaaua o ti'aki te baka ma tegaaua tamana, kae tata'o ia Jesus.

Ko Jesus noko haka ma'ugi masaki

²³ Ko Jesus noko sehu i ba'i kakai 'anga i Galilee, o manga ako i na Hage hai paaunga, ma te 'atigongo i te Gongo Gaoi o te Hakahua 'anga a te 'Aitu, ma te haka ma'ugi na pegea e iai te mou hage o na sa'o saga ma te masaki.

²⁴ Te gongo o'ona na hohoga i ba'i kunga i Syria, ka ko pegea na kakabe ake kia te Ia na pegea masasaki i te mou hage o te sa'o saga songo, ma na pegea manga higosia ma'u i te mou haka gongonga, na pegea eketia i te haagiki ma na pegea he ghotoi 'aki, ma na pegea mamate pa'asi tasi, ka noko haka ma'ugi ngatahi e Jesus.

²⁵ Na hu'ai tu'u pegea mai Galilee ma Decapolis, ma Jerusalem ma Judea ma na kakai 'anga i tegaa pa'asi i Jordan, noko manga he'agumaki ia te ia.