Yuuba 3 - Mandinka Bible

Yuuba ye luŋo danka, a wuluuta meŋ na

¹ Ñiŋ bee koolaa, Yuuba naata a daa yele, a ye a wuluu luŋo danka.

² Yuuba kumata ko:

³ Allamaa luŋo ye kasaara, n wuluuta meŋ na, aniŋ suutoo meŋ, n na alifaalu ye n soto.

⁴ Wo luŋo ye ke luŋ dibiriŋo ti. Allamaa Alla kana a luŋo hati, aduŋ Allamaa Alla kana maloo sotondi a luŋo la.

⁵ Dibi baa ye a luŋo taa, minaayoolu ye a muuri, a luŋo ñiŋ na diboo ye a silaŋñaa warandi.

⁶ Dibi baa si a luŋo suutoo taa, a kana yaatee saŋo tiloolu kono. A luŋo kana tara karoolu tili yaatewo kono.

⁷ Moo kana konoo taa a luŋo ñiŋ na, kontaani kumakaŋ kana moyi a luŋo la.

⁸ Moolu mennu ka luŋolu danka, mennu ka haañi ka daafeŋ Lefiyatani kuniŋ, ì ye wo luŋo danka.

⁹ A luŋo subaalooloolu ye dibi, a ye tara i yillaariŋ maloo la, bari a kana a soto fereŋ. A luŋo kana hani siiliŋo la boo je.

¹⁰ Kaatu a maŋ m baamaa wuluuñaŋo daa soroŋ, ka n tankandi niitooroo ma.

¹¹ Muŋ ne ye a tinna m maŋ faa n wuluu waatoo, ŋa bo wuluuñaŋo kono doroŋ, ŋa tambi?

¹² Muŋ ne ye a tinna m baamaa ñoyita n kunna? Muŋ ne ye a tinna sunjoolu sotota n ye ka suusuu?

¹³ Niŋ wo nte nuŋ, m be tara la laariŋ ne, m be deyiriŋ, m be tara la siinoo le la, aduŋ m be tara la dahaa le kono.

¹⁴ N niŋ duniyaa mara mansoolu be tara la laariŋ, mennu ye mansabuŋ kotoolu seyinkaŋ loo ì faŋolu ye, ì niŋ ì la mansakundaa yaamarilaalu,

¹⁵ waraŋ maralilaalu, mennu ye sanoo soto, ì ye ì la buŋolu kono fandi kodiforoo la.

¹⁶ Muŋ ne ye a tinna m maŋ wuluu, m fureemaa, ŋa baadee, komeŋ deenaanoo meŋ nene maŋ tiloo la maloo je?

¹⁷ Jee to, moo kuruŋolu ka i foño toorandiroo la le, moo bataariŋolu ye dahaa soto.

¹⁸ Jee to, hani mutamoolu ka tara kayiroo le kono, ì buka ì ŋayibelaa diyaamukaŋo moyi.

¹⁹ Moondiŋolu niŋ moo baalu bee be jee, joŋolu dahaata ì maariyolu bulu.

²⁰ Muŋ ne ye a tinna baluwo be dii la moo bataariŋo la, moo meŋ ye niitoora kuu baa soto a la baluwo kono?

²¹ Moo meŋ tarata saayaa baturiŋ, bari a maŋ naa a kaŋ, aduŋ a tarata a ñini kaŋ komeŋ sanoo.

²² Feŋ maŋ a kontaani ka tambi ka tara kaburu dinkoo kono.

²³ Muŋ ne ye a tinna baluwo be dii la moo la, meŋ maŋ a taadulaa loŋ, Alla ye moo meŋ kalee karoo bee la?

²⁴ Sikisikoo le keta n na domoroo ti, n na woosiyo keta le komeŋ jiiboroo.

²⁵ Tooñaa-tooñaa, n silata feŋo meŋ na, wo le naata n kaŋ. M maŋ haañi feŋo meŋ na, wo le laata n kaŋ.

²⁶ M maŋ tara dahaa kono, waraŋ tenkuŋo, m maŋ foñondiŋ soto, bataa doroŋ.