Yuuba 11 - Mandinka Bible

Sofari la diyaamu foloo

¹ Bituŋ Sofari Naamankoo ye jaabiroo ke ko:

² Yuuba, fo moo si tara diyaamu la baŋ, moo te i jaabi la? Fo diyaamu jamaa si moo ke noo moo tilindiŋo ti baŋ?

³ Fo i la ñiŋ kumabaafoo le be moolu deyindi noo la baŋ? Niŋ i ye tooñeeroo ke, fo moo maŋ ñaŋ na i dooyaa la baŋ?

⁴ Ite le ko, i fokumoo mu tooñaa le ti, i ko, i seneyaata Alla ñaa koto le.

⁵ Saayiŋ Alla faŋo si naa a daa yele, a ye diyaamu i ye.

⁶ A ye ñaameŋo kulloolu lankenemayandi i ye, kaawakuu baalu, hadamadiŋo buka mennu fahaamu noo. I be a loŋ na wo le to ko, Alla ye ñiŋ jaraboo meŋ laa i kaŋ, wo mu domandiŋo le ti, niŋ i ye a niŋ baara kuwo laa, i ye meŋ ke.

⁷ I si Alla la kuu diinondiŋolu fintindi noo baŋ? I si Alla Tallaa la mansabaayaa waroo daŋo loŋ noo baŋ?

⁸ Alla la ñaameŋo le jamfata ka tambi saŋ fatoolu la, ite si muŋ ne ke noo? A la ñaameŋo le fanuta ka tambi laakira la, ite ye muŋ ne loŋ?

⁹ Alla la waroo le tambita duniyaa la, ate le fanuta baajiyo ti.

¹⁰ Niŋ a naata, a ye i soroŋ bunjawoo kono, a ye i londi kiitiyo ñaatiliŋo la, jumaa le si i loo noo a fee?

¹¹ Ate Alla le ye loŋo ke moolu la, mennu mu moo kenseŋolu ti. Niŋ kuu kuruŋo keta, a ka tara londiŋ a la le.

¹² Bari niŋ hakilintaŋo si fahaamuroo ke, faloo si wuluu, a diŋo ye ke hadamadiŋo ti.

¹³ Yuuba, i sondomoo bee loo Alla kaŋ, i ye i buloo laa a ye.

¹⁴ I ye i la junube kuwolu landi kara la, mennu be i bulu, i kana soŋ kuu kuruŋo ye ke i yaa.

¹⁵ Wo to le i si i buloo wulindi noo santo, i te malu la. I si tankoo soto, i te sila la.

¹⁶ I si ñina i la bataa kuwo la, i si ñina a la ko jii bondiŋo.

¹⁷ Aduŋ i la baluwo kono, i si naa mala ko tiloo. I la baluwo diboo be ke la le komeŋ fanikee maloo.

¹⁸ I si taamaayaa soto, kaatu jikoo le be tara la i ye. I si tankoo soto, i ye i la foñondiŋo ke kayiroo kono.

¹⁹ Moo te i silandi noo la, niŋ i be laariŋ. Moolu le be kali naa la i ñaañini la, ka deemaaroo ñini i bulu.

²⁰ Bari moo kuruŋolu be ke la le ko finkintewolu, ì te sila je noo la, ì be bori la meŋ na. Ì hakiloo be tara la looriŋ saayaa doroŋ ne kaŋ.