Yeremiya 47 - Mandinka Bible

Kiilaariyaa kumoo meŋ fota Filisitini bankoo kamma

¹ Yaawe* la ñiŋ kumoo le naata Annabilayi Yeremiya kaŋ Filisitinkoolu la kuwo to, janniŋ Firawoona ka ì la saatewo Kaasa kele:

² Yaawe ye ñiŋ ne fo ko: “A juubee baajiyo ka wuli maraa la naŋ ñaameŋ, ì be naa ke la waamoo ti ka woyi. Ì be bankoo niŋ a feŋo bee kunuŋ na le, saatewolu niŋ mennu be sabatiriŋ ì kono. Moolu be wuuri la le, moo-wo-moo be siiriŋ bankoo kaŋ be lemba la le,

³ niŋ ì ye suubori sinkaŋolu moyi naŋ, keleraŋ sareetoolu* maakaŋo, ì siŋolu borikaŋo, faalu te ì kooma fele la ì diŋolu la, ì buloolu ye lamfu.

⁴ Kaatu luŋo siita le silaŋ, ka Filisitinkoolu bee kasaara, aniŋ ka ì la kana moolu bee faa, mennu si Tire niŋ Sidoni maakoyi. Nte Yaawe pareeta le ka Filisitinkoolu kasaara, mennu bajonkita naŋ ka bo Kireti baajooyoo to.

⁵ Kuŋ nunkoo siita Kaasa ma le, ka ì la niikuyaa yitandi, Asikeloni taata deyoo kono yem. Alitolu Anaki koomalankoolu, ali be tu la faŋ bala namoo la fo muŋ tuma?

⁶ “Ali ka ñiŋ ne kumboo ko, ‘Hee, Yaawe la hawusaroo*, muŋ tuma le i be i foño la faaroo la? Seyi i laa kono, i ye i foñondiŋ ka tenkuŋ.’

⁷ Bari a si i foño ñaadii le, kaatu Yaawe le ye a yaamari? A ye a yaamari le ka Asikeloni kele, aniŋ baadaa borindoo moolu.”