Nahumu 3 - Mandinka Bible

Baayiñaa te Ninewe la kasaaroo la

¹ Kooroo be yeleboŋ saatewo ye, faniyaa saatewo, saatewo meŋ be faariŋ ñapinkaŋ feŋolu la, saatewo meŋ, a la ñapinkandiroo maŋ dandulaa soto.

² Busoolu si kuma, sareeti siŋolu maakaŋo, suwoolu borikaŋo, aniŋ sareetoolu sawunkaŋo.

³ Suutiyolu si kirimbaasi ñaato keledulaa to. Sooroolu ye ŋalasi, hawusaroolu* ye tara malamalariŋ. Moo jurumoo ye faa, furewolu ye jurumi ñoo kaŋ, moo faariŋolu, dandulaa te tara la meŋ na. Kelediŋolu ye tara takiŋ-takiŋ na furewolu la.

⁴ Ñiŋ bee be ke la Ninewe la le, kaatu a keta le ko cakamusoo, meŋ na cakayaa maŋ dandulaa soto. A ka moolu neenee niŋ a la ñiiñaa la, a keta ko buwaamusoo, buwaayaa koyita meŋ ma. A ye banku jamaa le joŋyandi a la cakayaa la, a ye moolu joŋyandi a la buwaayaa la.

⁵ Yaawe* Alihawaa Maariyo* ye ñiŋ ne fo Ninewe ye ko, “N niŋ i be janjuŋ na le! Ŋa i wura fefes, ŋa banku koteŋolu bula ì ye i kenseŋo je, mansamarali bankoolu ñaa ye loo i la malu kuwo kaŋ.

⁶ N si i ke suntukuŋo ti, ka i malundi, moolu ye ì ñaa mala i kaŋ ka kaawa.

⁷ Moo-wo-moo ñaa boyita i kaŋ, a si bori i la, a ye a fo ko, ‘Ninewe kasaarata le fokabaŋ, jumaa le bala be faa la a ye?’ Moo be bo noo la miŋ, meŋ be a sabarindi la?”

⁸ Fo ite le fisiyaata Tebesi ti baŋ, meŋ be Nayili Boloŋo bala, a daala bee niŋ jiyo? Baa le mu a la tankoo buloo ti, jiyo le mu a la tankoo sansaŋo ti.

⁹ Kusi* niŋ Misira le mu a semboo ti, dandulaa te meŋ na. Puti niŋ Libiya, wolu le mu a maakoyilaalu ti.

¹⁰ Hani wo bee, jawoolu ye a muta, a keta kelejoŋo ti. Hani dindiŋolu, ì ye ì lipaŋ-lipaŋ mbeedoolu kaŋ ne taariŋ fo ì ye ì faa. Alikuuroolu* le keta a la kee kummaayaariŋolu la kuwo to, ka ì talaa ñoo teema. A ñaatonkoolu tuta sitiriŋ neejoloolu la.

¹¹ Ite Ninewe, i fanaa be ke la le ko siiratoo, i ye bori ka taa maabo, ka tankoo ñini i jawoolu ma.

¹² I la tatoolu bee ka muluŋ ne ko sooto diŋ mooriŋolu, niŋ sooto suŋo jiijaata doroŋ, ì si joloŋ ì domolaa daa kono suruk.

¹³ I la kelediŋolu juubee, ì bee keta musoo ti. Dimbaa ye i la bankoo naanewo sorondaŋolu bee jani, dulaa bee yeleta i jawoolu ye hakañi.

¹⁴ Jiyo fankanta, waatoo meŋ na ì be i suki la. I la tatoolu dadaa kuu, i ye potoo dori, i ye muuloo parendi birikikosoo ye.

¹⁵ Dimbaa be i domo la jee le to, hawusaroo ye i faa. I be kasaara la le ko kuntiŋolu ye feŋ meŋ domo. I faŋ siyandi ko kuntiŋolu, i ye i faŋ lafaa ko jatatoŋolu.

¹⁶ I la safaarilaalu naata siyaa ka tambi looloo la saŋo santo. Ko kuntiŋolu, ì ye wandi feŋolu bee ñapinkaŋ, ì niŋ ì ye yeemaŋ.

¹⁷ I la kantarilaalu be le ko jatatoŋolu, i la mansakundaa dookuulaalu ko kuntiŋ koorewo. Ì si tara denderiŋ sansaŋolu bala taariŋ, sumayaa waatoolu la. Niŋ tiloo bota ñaameŋ, ì ye taa, moo te a loŋ na ì taata daameŋ.

¹⁸ Hee, Asiriya mansa, i la maralilaalu be jinkoo la, i la kee kendoolu be laariŋ, i la moolu be janjandiŋ konkoolu kaŋ, moo maŋ soto noo ka ì kafundi ñoo ma.

¹⁹ Dimoo meŋ ye i maa, jaarañaa te a la, i la baramoo te jaara noo la. Niŋ moo-wo-moo ye i la kasaaroo moyi, a be a buloo le kosi la, kaatu moo bee le toorata i la tilimbaliyaa bambaloo waatoo la.