Kawandilaa 5 - Mandinka Bible

Alla batoo niŋ laahidoo la kuwo

¹ I taañaa loŋ, niŋ i be Alla Batudulaa Buŋo* waliŋ na. Kata i ye i lamoyi, wo le beteyaata ñiŋ ti ka beeyaŋ sadaa* bo ko toolewolu mennu buka a loŋ ko ì ye kuu kuruŋo le ke.

² I daa mara, i kana soŋ i sondomoo ye feŋ-wo-feŋ maa, i ye tariyaa ka a fo Alla ñaatiliŋo la. Kaatu Alla be Arijana le, ite be duniyaa. Wo kamma la i daakumoo kana siyaa.

³ Siiboo ka naa le niŋ haajoolu siyaata. Niŋ diyaamoo siyaata, kuma kenseŋolu le mu.

⁴ Niŋ i ye laahidoo taa Alla ye, kana tonkutonku a timmandoo la. Alla buka kontaani toolewo la kuu la. I laahidita meŋ na, a timmandi.

⁵ Niŋ i maŋ laahidoo taa muumee, wo le fisiyaata ka laahidoo taa, i maŋ naa a timmandi.

⁶ Kana soŋ i daa ye i duŋ junuboo to, aduŋ kana i daa laa i faŋ kaŋ ka a fo piriisoo* ye ko, “N na laahidoo taa keta m bulu lañinoo le ti.” Kana soŋ Alla ye kamfaa i kamma, i la laahidi timmandibaliyaa kamma la. A si i la dookuu feŋolu kasaara noo le.

⁷ Siiboo jamaa niŋ kuma jamaa maŋ nafaa soto. Wo to, sila Alla la.

Fankoo la nafantaŋyaa

⁸ Niŋ i ye a je tundoo kaŋ, ì be fentaŋolu toorandi kaŋ, tiliŋo niŋ tooñaa taata, kana jaakali a kuwo la. Kaatu kantiyolu le ka ñoo kuburu. Aduŋ ì la ñaatonka baalu le ka ì tanka.

⁹ Bari bankoo munafaŋo, wo be moo bee le ye. Mansakewo nafaa mu ñiŋ ne ti ka senekunkoolu tankandi.

¹⁰ Kodilandii baa, kodoo nene te a sii la muk, aduŋ feŋ landii baa, a nene buka sotoo ke fo a ye sii. Ñiŋ fanaa maŋ ke feŋ ti.

¹¹ Niŋ sotoo lafaata, domorilaalu fanaa ka siyaa le. A nafaa lee ì maariiñolu ye, fo ka a juubee doroŋ?

¹² Sembe dookuulaa la siinoo, siinoo diimaa, a ye domoroo soto a ñaama wo, a maŋ a soto a ñaama wo, a ka siinoo le. Bari fankamaa la soto baa, wo le faŋo ka a tinna a buka siinoo noo a ñaama.

¹³ Kuu dimindiŋo fele, ŋa meŋ je ñiŋ duniyaa tiloo koto: Fankamaa ye a la sotofeŋo bee laŋ-laŋ ñoo kaŋ, a naata ke a ye mantaabembaliyaa ti.

¹⁴ A foota a la fankoo la, mantaabembaliyaa kono. Niŋ a ye diŋo soto, a be a bulu kenseŋo le tu la.

¹⁵ Hadamadiŋo naata ñaameŋ ka bo a baamaa wuluuñaŋo kono, a be muru la wo le ñaama. Ko a kenseŋo naata ñaameŋ, a la dookuwo munafaŋo, a niŋ hani feŋ ne te muru la ka tara a bulu.

¹⁶ Ñiŋ fanaa mu kuu dimindiŋo le ti: Ko hadamadiŋo naata ñaameŋ, a be muru la wo le ñaama. Wo to, a la munafaŋ sotoo nafaa lee, baawo a ye dookuwo ke foñoo le ye?

¹⁷ Ñiŋ koolaa, a ka a la baluwo muumeelaa bee ke diboo le kono, wo niŋ niitoora bambaloo, kuuraŋo, aniŋ niikuyaa.

¹⁸ Nte naata meŋ je kuu kendoo ti, wo le mu ka domoroo ke, ka i miŋ. A beteyaata ka seewoo kuu kendoolu la i la kata kuwolu bee to, ñiŋ duniyaa tiloo koto, i baluu tili dantaŋolu kono, Alla ye mennu dii i la. Wo le mu i niyo ti.

¹⁹ Niŋ Alla ye fankoo dii hadamadiŋo la, a ye a sotondi feŋolu la, wo mu soori baa le ti. Niŋ Alla ye a maakoyi ka seewoo soto ì to, ka tinewo aniŋ niiseewoo soto a la dookuwolu to, wo fanaa bota Alla le bulu.

²⁰ Alla ka niiseewoo meŋ dii hadamadiŋo la, wo ka a tinna le, a hakiloo buka tara looriŋ a baluu tiloo la sutiyaa kaŋ.