Jabuuroolu 114 - Mandinka Bible

Maariyo ye Banisirayilankoolu bondi Misira ñaameŋ

¹ Kabiriŋ Banisirayilankoolu bota naŋ Misira, Yaakuba koomalankoolu bota naŋ wo kaŋyelemoolu kono,

² Maariyo ye Yahuuda bankoo ke a taradulaa senuŋo le ti, a ye Banisirayila ke a faŋo taa ti, ka a mara.

³ Kulunjumbe Baa ye a je le, a borita, Yoridani Boloŋo ñorita a koo la.

⁴ Konko baalu sawuŋ-sawunta ko saajiikotoŋolu, konkoriŋolu, ko saajiiriŋolu.

⁵ Kulunjumbe, muŋ ne keta i la, fo i borita, aniŋ ite Yoridani, fo i ñorita i koo la?

⁶ Alitolu konko baalu, muŋ ne ye ali sawuŋ-sawundi ko saajiikotoŋolu, aniŋ alitolu konkoriŋolu, ko saajiiriŋolu?

⁷ Bankoo, jarajara Maariyo ñaatiliŋo la, Yaakuba la Alla.

⁸ Ate le ye bere baa yelemandi daloo ti, ka bere jaaroo yelemandi woyoo ti.