Hoseya 11 - Mandinka Bible

Yaawe ye Banisirayila kanu le hani saayiŋ

¹ Yaawe* ko: “Biriŋ Banisirayila la dindiŋyaa waatoo le mu, ŋa a kanu. Ka bo Misira, ŋa n dinkewo kili naŋ.

² Bari n ka ì kili ñaameŋ, ì ka jamfa n na wo le ñaama. Ì tuta sadaa* bo la Baali* jalaŋolu ye, ì ka cuuraayoo siisindi jalaŋ koteŋolu ye.

³ Nte faŋo le ye Efurayimu* moolu nindi taamoo la, ŋa ì muta ì buloolu le la ka ì teetee. Bari ì maŋ a loŋ ko, nte le mu ì hatilaa ti.

⁴ Ŋa ì samba hadamayaa le la, meŋ mu mooyaa niŋ kanoo ti. Ŋa ì la yookoo* sika ì toŋo to, n jimita ì kaŋ ka ì domorindi.

⁵ “Ì be muru la Misira le, Asiriya si ì mara, kaatu ì balanta le ka muru naŋ n kaŋ.

⁶ Hawusaroo* si ŋalasi ì la saatewolu to, a ye dundaŋ daa nee bantambiloolu tiñaa, moolu si faa ì la feere jawoolu kamma la.

⁷ N na moolu ka tenteŋ ne ka balaŋ m ma, bari hani niŋ ì ye ì la Baali jalaŋo kili, a te ì la yookoo sika noo la ì kaŋ.

⁸ “Bari Efurayimu, n si i bula noo ñaadii le? Banisirayila, n si m bo noo i to ñaadii le? N si ali kasaara noo ñaadii le ko Aduma saatewo, waraŋ Seboyimu saatewo? Ali la kuwo ye n niyo kuyaa le, balafaa ye m futufaa.

⁹ N te n na jusukandoo jii la ali kaŋ, sako n si Efurayimu kasaara. Nte mu Alla Senuŋ Baa le ti, meŋ be ali fee, m maŋ ke hadamadiŋo ti. N niŋ jusukandoo te naa la ali kaŋ.

¹⁰ Niŋ nte Yaawe bumbunta ko jatoo, n na moolu be bula la n nooma le. Niŋ m bumbunta, n diŋolu kijafaratoo si naa, ka bo tilijii karoo la.

¹¹ Ì kijafaratoo si naa ko kunoolu, ka bo naŋ Misira, ko puraalu, ka bo Asiriya. M be ì murundi la ì yaalu to le.” Yaawe le ye a fo.

Tuumiroo, Banisirayila niŋ Yahuuda kaŋ

¹² Yaawe ko: “Efurayimu niŋ faniyaa le ye m muru, Banisirayila moolu ye m muru nakaroo la. Yahuuda ka balaŋ m ma, a la Alla Senuŋo, meŋ foroyaata.