Yaaya 1 - Migaama

Beneyyi aaye omma min diilico lawwi paracco

¹ Min diiliti maa ga Mella alɗe kelgeyya ɗa missa ya maatiki, ga gata kaaka maa gu kolaa goo Beneyyi, gata aaye paaɗe. Gata aaye ma Mella, o ga gata saa kulla ay Mella.

² Omma min kilgiyco lawwi paracco, ga gata kaaka aaye ma Mella.

³ Mella kilgiyiy lawwi paracco ma gata, lekka ɗa ya maatiki ma kilgiyenta bala gata.

⁴ Beneyyi pa, beraayo hayaatane oko lawwi paracco. Hayaatane taata pa, ay bahaarane ma beraayo oko giimo.

⁵ Gii bahaarane asiɗe beera namtuwwi, gaa namtuwe alɗe gederra ɗa ga bitticca.

⁶ Mella n̰aame palaynice kaƴi aɗe maa gu semeetee goo Yaaya.

⁷ Gata pa ase ga asiɗe beneyya ma gaarti bahaarane taata maa ga elle o maa ga giyye ku maa gu giimi paracco amanniyya beneyti kaaka, guu oyyicca bahaarane.

⁸ Yaaya ma batasayya giimi gata kaaka pa, ay gata ɗa ma ay bahaarane, innasoopa, ga ase beneyya ma gaarti bahaaranti.

⁹ Bahaarane taata pa, ay ta tirta ma ase dunuune teete gi asiyooca gaara seeniti Mellayi oko giimi paracco.

¹⁰ Gata pa, maa gu kolaa goo Beneyyi aaye dunuune teete, o ga Mella kilgiyca dunuune ma gata. Gaa ma kaaka aɗe, gu giimi ku dunuune teete alɗiya ibina ɗa.

¹¹ Beneyyi pa ase oko gimtee, guu guta pa alɗeeca saara ɗa.

¹² Oko giimi soopa ma joobiya o ma dowwiy galbigeeco oko gata, ga biryoo botol ku maa gu deeɗe rontee Mellayi.

¹³ Guta pa deero rontee Mellayi, ay ma wiyaw ɗa ka aleŋ ta giimo teete, o gi ma aŋko tanco ɗa ka, innasoopa, ga ay Mella saa ma oyye gu deeɗe rontee.

¹⁴ Beneyyi gata kee pa deero gimu, gaa nuntiɗe aattini, o ni ellica darjanti. Darjane taata pa, ay Mella Baaba ma berewweeca, o gi ta Runti ka kayti ka, ma unenta ma gidaanuwe ma gakamma ɗa o ma seene.

¹⁵ Gaa Yaaya asiyyo taasa oko giimo ma gaartee Beneyyi gata kee gaa: «Ay gata appe maa na asitoŋ beneyya gaartee naa: Gata akka asa taartu, o ga tatta ƴiila min oko naa, asan ga aaye paaɗe omma min oko naa.»

¹⁶ Mileŋ ga unenta ma gidaanuwe pa, ay ɗakko appe ga lewɗineega gidaanuwti ma gakamma ɗa.

¹⁷ Mella birneegu hukumnigeetee ma Muusa. Gidaanuwti ma kaawo o seeniti soopa, ga birneegu ma Iisa Masi.

¹⁸ Lekka ɗa kaytiŋ gimu ma elliyya Mella, illa ay Runti Mellayi ka kayti ka. Gata ay Mella, o ga aaye saripti Mella Baaba. Ay gata ma gaarineega Mella.

Beneyti Yaaya ma gaartee Masi

¹⁹ Keeke pa ay beneyti Yaaya ma gaartee Masi wikinne maa gu taattuweeco Yawudigeyyo n̰aamiyyeegu soƴoowee ku saɗikaŋgeyyo, o Leebitnigee min geegar ka Zerizalem wikirti Yaaya ma batasayya giimi, gu asiyya inna goo: «Kii ay we? Kii ay Masi e?»

²⁰ Yaaya pa ursiyoo ɗa, beneyyiyooca saa purta gaa: «Naata ay Masi ɗa, gata maa ga Mella aparre.»

²¹ Guu inniyya payya goo: «A ki ay nabiinice Eliyas ma akka yooka dunuune teete omma min asawti Masi e?» Gaa Yaaya tiiliyyoo gaa: «Kaw.» Guu inniyya payya goo: «A ki ay Nabiinice maa ga Muusa kitipiye gaa ga Mella akkiya n̰aama e?» Gaa tiiliyyoo gaa: «Kaw.»

²² Guu beneyyiyyee goo: «A kii appe ay we? Ni aŋka ni deeɗiyo beneyya oko giimi ma n̰akammini. Gaa oko kii ka, kii ki ay we?»

²³ Gaa Yaaya tiiliyyoo gaa: «Naa keeke appe ay gimu kee maa ga nabiinice Esaya beneyye gaartee tippa gaa: “Lekka gimu ma beneyyayo oko giimo ma raɗɗa kayni gaa: Panoŋga botol oko Miltine ga deeɗo cur.”»

²⁴ Gaa min oko giimi kotti maa gu n̰aamiyee oko Yaaya, gu lekkiɗo kulla daare ma gu kolaa goo Pariziyennigee.

²⁵ Guu giimi kotti inniyya payya goo: «A kii ay Masi ɗa, gata maa ga Mella aparre, o ki ay Eliyas ɗa, o ki ay Nabiinice ɗa, ayme ki batasayɗo giimi?»

²⁶ Gaa Yaaya tiiliyyoo gaa: «Naa batasayyatoŋ ma ammi ka, lekka soopa gimu kaƴi ma aaye aattoŋ maa ku ibina ɗa ma seene.

²⁷ Gata kaaka pa akka asa taartu, o ya seppee ku n̰urtee ka kulla, na arakke ɗa na ipiriyyeegu min asintee.»

²⁸ Gaari kooko pa paracco deero geegar ka Beetani, saripti ƴiiro ta Yurden ma sorotta diiman were maa ga Yaaya batasayɗo giimi.

Iisa ay Tamawti Mellayi

²⁹ Gaa ma ta sokkonta kaƴi maa ga Yaaya elliyya Iisa ga asee, gaa beneyyiɗe gaa: «Elloŋga, keeke ay Tamaw maa ga Mella n̰akamme saɗikane ma cemekkay zunubgeeco giimo.

³⁰ Ay gata appe maa na beneyyitoŋ gaartee naa: Gata akka asa taartu, o ga tatta ƴiila min oko naa, asan ga aaye paaɗe omma min oko naa.

³¹ Naa saa kulla ma kayaatu lekka ɗa kabarre kadar ga ay gata ma ay Tamawti Mellayi, innasoopa, na ase batisiyco giimo ma ammi, ku maa na gaariyyooga Tamaw keeke oko giimi ku Isirayel.»

³² Gaa Yaaya gemmiɗe saa tak gaartee Iisa maa ga elle gaa: «Na ellica saa Ruuhanti Mellayi ma beere min uwwa samaani aleŋ hamam gi asiyyee joppa, gii nuntiyyee ziiti.

³³ Min omma ga naa saa kulla ma kayaatu lekka ɗa kabarre kadar ga ay gata, innasoopa, ga Mella ma n̰akamminoo na asiɗe batisiya giimi ma ammi, ay gata ma beneyyiyaw gaa: “Gimu maa ki akka ella gii Ruuhanti Mellayi asiyee beera gi nuntiyyee, ay gata appe ma akkiy batisiya giimi ma Ruuhanti Mellayi.”»

³⁴ Gaa Yaaya beneyyiɗe payya gaa: «Naa pa elliy saa gaari kooko ma iɗiitu, o na beneyya kadar ga gimu keeke ay Runti Mellayi.»

³⁵ Gaa ta sokkonta kaƴi, ga Yaaya alɗo payya ma jobookeetee ku seera geegar ka Beetani.

³⁶ Gaa maa ga elliyya samaane Iisa gaa ƴelaa, gaa beneyyiɗe gaa: «Keeke ay Tamawti Mellayi.»

³⁷ Gaa maa gu jobookee ku seera kotti giyyiyya beneyti Yaaya kaaka, guu jobbiyya Iisa.

³⁸ Gaa maa ga Iisa jigirɗe, gaa elliɗe guu jobokkaa, gaa inniɗiy gaa: «Ku deyekka ini me?» Guu guta pa tiiliyyee goo: «Rabbi, kii nowotte taŋaa?» (Seme ku Rabbi kooko pa, goo ‘Garaawa’.)

³⁹ Wikinne kaaka pa gi paato ay usur appe. Gaa Iisa tiiliyyoo gaa: «Asoŋ, ku asiyya ella were maa na nowoɗɗe.» Gaa maa gu kaatiɗe gu deeɗiya ella, guu nambiɗe iŋaa paalta.

⁴⁰ A min oko giimi ku seera kotti pa ma giyyiya beneyti Yaaya guu jobbiyya Iisa, ga kaƴi gu semeetee goo Andire. Gata ay sinti oko Simo Piyer.

⁴¹ Andire gata pa waagiki ƴa omma sinti kee Simo, gaa beneyyiyyee gaa: «Ni gassiya Masi.» (Seme ku Masi kooko pa goo ‘gata maa ga Mella aparre’.)

⁴² Gaa Andire kaatikkiki Simo wikirti Iisa. Maa ga Iisa elliyya samaane, gaa beneyyiyyee gaa: «Kii ay Simo runti Yaaya, haŋka pa, gu semeecam daa pe goo Sepas.» (Sepas pa goo Piyer.)

Iisa kolaa Pilip ma giiti Natanayel

⁴³ Gaa ta sokkoŋta kaƴi ga Iisa icciɗe niyyane gaa kaatiɗe kiɗa ta Galilee. Maa ga sarɗe, guu deeɗe waaga ma giiti Pilip, gaa Iisa beneyyiyyee gaa: «Jobbino.» Gaa Pilip jobbiyya.

⁴⁴ Pilip pa gata, ay ka geegar ka Betsayda darrico Andire ma giiti Piyer.

⁴⁵ Gaa Pilip kaatiyyee oko Natanayel, gaa deeɗiyee beneyya gaa: «Ni gassiya gimu maa ga Muusa beneyye aattí Kitamniti o maa gu nabiinigee ketepeyye gaartee min tippa, maa gu semeetee goo Iisa, ma ay runti Yuusup ka geegar ka Nazaret.»

⁴⁶ Gaa Natanayel tiiliyyee gaa: «Nazaret ma ay geegar ka rootta gonek ka, ga lekka aɗe maatiki ka samaane ma akka ooma!» Gaa Pilip tiiliyyee gaa: «Asu saa ki asiɗo ella ma iɗiicum ga kii milco.» Gaa Natanayel kaatiɗe ma Pilip gu deeɗiya ella Iisa.

⁴⁷ Gaa maa ga Iisa elliyya samaane Natanayel gaa asee, gaa beneyyiɗe gaa: «Elloŋ, ay keeke pe ay gimu ka tirta ka Isirayel ma lekka ɗa kosso.»

⁴⁸ Gaa Natanayel beneyyiyyee oko Iisa gaa: «Ki ibinno kii me?» Gaa Iisa tiiliyyee gaa: «Maa ga Pilip alɗum kolaa ɗa missa, na ellum maa ki nowoɗɗe baltí booti.»

⁴⁹ Gaa Natanayel tiiliyyee gaa: «Garaawa, kii ay Runti Mellayi o ki ay sultan ka Isirayel!»

⁵⁰ Iisa pa tiiliyyee gaa: «Ki amanne kadar na ay Runti Mellayi asan na beneyyiyam naa na ellum maa ki nowoɗɗe balti itti. Ki akka ella gaari ma kaawenta ƴiila min oko kooko.»

⁵¹ Gaa beneyyiyyee payya oko Natanayel gaa: «Giyyoŋ ƴa! Na beneyyatoŋca seene: Ku akkiya ella samaane gaa eyee, guu malaykatnigeetee Mellayi bereɗɗe oko Runti Gimi min samaani kiɗaati o gu kalappa.»