Pilip 1 - Migaama

Salammiti Pol oko giimi ku geegar ka Pilip

¹ Naa Pol ma giitu Timote, lawweetee Iisa Masi, ni salammatoŋ. Maktup teete pa ni ketepeyyatoŋca oko kuŋ, gimtee Mellayi ma kappenta ma Iisa Masi, kuŋ ma nowotte geegar ka Pilip. Ni ketepeyyatoŋca oko ajaawaŋgeetoŋ ma gayaaweeco o oko kuŋ parattoŋ.

² Ga Mella Tattine o Miltine kee Iisa Masi leetoŋ gidaanuwe o gu biraatoŋ aapiya.

Pol enaayooga Mella oko giimi ku Pilip

³ Kulla wikinne aɗe maa naa mooyitoŋ, na leewee barkinti oko Mella Miltu.

⁴ Keeke pa, na leewaa diiman ma parhane, wikinne paratti maa naa enaa Mella oko kuŋ parattoŋ. Haa, na leewee barkinti oko Mellayi ma parhane,

⁵ asan ga min meene maa ku dowɗiy galbigeetoŋ oko Iisa Masi ya haŋka ku timmeero ma nii oko taasití kabarre ta daana.

⁶ Mella pa, gata ma delewwitoŋga paaɗe aattoŋ lubbi ka samaane keeke dowwiyee ɗa, namma ga asiyya tattipa pe meene maa ga Iisa Masi asawɗo. Keeke pa, na lekkee kabarre ma seene kadar ga akka dee.

⁷ Ƴekkitu maa na lekkitoŋ parattoŋ aaye pe butultí aɗe, asan ku aaye galbantu. Gidaanuwti Mellayi maa ga biryaw ka taasití kabarre ta daana pa, ga kuŋ kulla parattoŋ gasakkiya. Wikinne maa gu bakamɗinoo daŋayi o wikinne kulla maa na taraɗɗica o maa na garawɗiyooca seene oko giimi ma aŋkica ɗa kabarre ta daana, ga parattoŋ ku gaayinoo.

⁸ Mella ellano a ga geewano kadar na ƴekkatoŋ parattoŋ, ma ƴekko ma okomma min oko Iisa Masi.

⁹ Ay ɗakko appe, na enewɗiya Mella oko kunta maa gi ƴekkitoŋ gaayiɗo ta ƴiila, ku maa ku ibiniyya ta tirta o ku gederriɗo ku akawɗiy gaari.

¹⁰ Goŋŋa ku gederra ku passalɗiya ma wagee ƴiila o ku deewa purta unti Mellayi o ga lekka ɗa ma gederra ga luumiyittoŋ ma gaari meene maa ga Masi asawɗo.

¹¹ Innitu ta Mellayi payya pa, ay ga Iisa Masi gaayittoŋ ku lewɗiy gaartoŋ paracco ɗayaŋ unti Mellayi, meenti taata. Ma gaartoŋ kotti pa, ku cepellay semeetee Mellayi o ku logokkaa.

Kabaayargeetee Pol o lubbiti

¹² Seneeta, na aŋka ku ibinɗo kadar gi baamitu ta daŋayi teete, birti botol oko kabarre ta daana gi tacilɗo ta ƴiila.

¹³ Ay goŋŋa appe gu asaakargee paracco ma tarakkaca karaayiti tattuwe ka tatta ka Rooma o gimtee paracco ku karaayiti ibinɗe samaane kadar gu bakamminoo asan na lobokkee oko Masi.

¹⁴ Seneeta ku maani pa ma ellica nuntitu ta daŋayi, gi damannico oko Miltine deero maani, guu tasawɗiya beneyti ta ƴiila bala ɓayaw.

¹⁵ Daare pa tasay gaartee Masi ku maa gu giimi elelɗiy pe guta ka min oko naa maa gu ƴiilinno iɗiico giimo. A daare pa ma aŋka ɗa ello min oko giimo tasaaca ma galbane ta purta.

¹⁶ Guta kooko pa lobokka asan gu ƴekkano, lekka kabarre kadar ga Mella gaginoo iŋee daŋayi ku maa na taricca kabarre ta daana.

¹⁷ A guta soo ma tasay gaartee Masi maa gu giimi elelɗiy gi mooyico taata miɗɗa ka, asan gu mooye oko kanco ka, gu ziɗɗiyyawga sippitu daŋayi.

¹⁸ Naa soopa gi suuraw ɗa ta kaw caŋ gu daare tasay maa gu deeɗo ellenta min oko naa o daare tasay ma seene, serco gu tasay gaartee Masi. Ay oko keeke appe na alɗo parhinenta. Naata soopa nowotta appe parhinenta min haŋka ya omma kulla,

¹⁹ asan na lekkiyo kabarre oko diigaŋgee kooko paracco, ga Mella akkino najjiya. Keeke pa deewa asan ku enaa Mella oko naa, o asan gi Ruuhane ta Iisa Masi akkino gaaya.

²⁰ Maa na aŋakke ma gudirantu parattí o maa na ocokke ta tirta teete pa, ay na alɗo lee ɗa ya jaalo paalta ka kulla oko maa ga Mella enewwinoo na lewɗiya. Gaa min haŋka ya diiman, bala ɓayaw, ga naata gaariyya ma ziitu tattuwti Masi, caŋ ga ma hayaatantu dunuuniti o caŋ gi deewaw meene kulla.

²¹ Oko naata, gi hayaatane ay Masi. A muutu pa, ƴiilawca hayaatantu tee ta dunuune teete.

^22-23 A naa nowotta missa pa, ma ziitu aattí dunuune teete, na gederra missa ma lubbitu na lewɗo ka samaane. Kaaka pa, na kalawwica seera seera. Na ibina ɗa payya, baŋ ga ay ŋawwa ma ƴiila: Ay nunto e, e ga muutu? A maa na aŋakke soopa ay muutu, maa na kaatiɗo na deeɗo nunta ma Iisa Masi, asan gi nunto ma Iisa Masi ƴiila latta paratti.

²⁴ Saanantoŋ soopa, gi samaane ƴiila na nuntiɗo dunuune teete.

²⁵ Ma keeke pa, na caɗawwica kadar na nowotta dunuune teete ma kunta parattoŋ ku maa na gaayittoŋ ku sappiɗo aattí amannitoŋ ma parhane.

²⁶ Ay goŋŋakite pe ga maa naa ase yooka wikirtoŋ ku gassiɗo ƴiila gudirane, ku maa ku logiyya Iisa Masi oko latta maa ga leyyaw.

Nunto maa gi kabarre ta daana enewwine

²⁷ A kunta pa, nuntoŋca nunto ma wagee ma kabarre ta daana ma beneyya ma gaartee Masi, maa gi nuntitoŋ deeɗo tee ta giimi koo ku mulunniti Mellayi. Goŋŋakite, naa yookeero wikirtoŋ e baŋ naa yookeero ɗa pa kulla, na geewa kadar ku bakamme talta, ma Ruuhanti Mellayi ku alɗo kaƴi ka, o ku nekerra parattoŋ sawa ma galbane kaƴi ka, oko amanno ma asaa min oko kabarre ta daana.

²⁸ Aɗaaniyo ɓaya ɗa ta kaw oko giimi ma aŋkitoŋ ɗa. Ma keeke pa, ku garaayo kadar gu kataa masilti, o ku garaayo kadar ga kunta aaye botol ka najjiyti. Masilco oko guta o najjiytoŋ oko kuŋ, paracco appe pa asaa min Mellayi.

²⁹ Ay ma saananti Masi ga Mella oyyiɗe ma gidaanuwti ga birittoŋ botol ku maa ku duwɗiy galbigeetoŋ oko Masi. A gata pa, ay maa ku duwɗiy ɗa ka oko gata, innasoo ga ay maa ku diigiyɗo kulla oko Masi.

³⁰ Nikirtoŋ ta haŋka teete pa, sawa ka ma tanni maa ku elle tippa, o haŋka kulla na nekerra missa. Keeke pa ku lekkee paaɗe kabarre.