Pilemon 1 - Migaama

Salammiti Pol oko Pilemon

¹ Naa Pol ma sintine kee Timote, ni salammam. Naata pa, gu bakamminoo daŋayi asan na lubbiyyee oko Iisa Masi. Maktup teete pa, ni ketepeyyica oko kii Pilemon, sintini ka ƴekkenta o giitini ka lubbi,

² o gi oko suttini maa gu semeeti goo Apiyya, o oko Arsip ma ay giitini ka bookati oko kabarre ta daana, o oko giimi ma temekka saananti Iisa Masi gircum.

³ Ga Mella Tattine o Miltine kee Iisa Masi leetoŋ gidaanuwe o gu biraatoŋ aapiya.

Pol leewee barkinti oko Mellayi

⁴ Kulla meene, wikinne maa naa enaa Mella Miltu, na leewee barkinti, o gu semeecam oko kii Pilemon na esekkiy,

⁵ asan na giyye kadar ki ƴekkay gimtee Mellayi o ki dowwica diiman galbancum oko Miltine kee Iisa.

⁶ Na enaa Mella maa gi baamo ta zeneetine saanantí amannicum, deeɗo gaarenta ma lubaaki. Ay goŋŋa pe ki ibiniyya ƴiila ka samaane paratti maa ke leewa oko Masi.

⁷ Sintu, ƴekkicum ta giimo issiyaw parhino ta tirta o dekerro, asan ki ooliyoogu kulla galbigeeco oko gimtee Mellayi.

⁸ Ay ɗakko appe Pilemon, na gederɗo na beneyɗamga latta maa ki deeɗiya leewo asan ga Masi biryaw botol na lewɗiya liyaw keeke,

⁹ innasoopa, mileŋ na ƴekkam, na aŋke na inniɗum ma maktup teete, ga naa Pol ma ay baabiŋgi, o gu esekkinoo daŋayi asan na lubbiyee oko Iisa Masi.

Pol n̰akammaa Onezim oko Pilemon

¹⁰ Maktup ta inniti teete pa, ay ma gaartee Onezim, ma deero aleŋ runtu ka aattu aattí daŋayi.

¹¹ Gata pa tippa ga gayawwiyam ɗa maatiki, haŋka soopa ga awayyam oko kii o oko naa kulla.

¹² Haŋka pa, na n̰akammamga payya Onezim, gata ma aaye galbantu.

¹³ Ampane kee, na aŋakke ga nuntiɗo sariptu, ku maa ga lubbiyaw gaddancum, aattí daŋayi maa gu bakamɗinoo asan na taasica kabarre ta daana.

¹⁴ A naa soopa, aŋke ɗa na leeɗo maatiki bala aŋko tancum, ku maa ga ka samaane keeke alɗo dee ɗa asarrenta, innasoopa ga asiɗo min oko aŋko tancum.

¹⁵ Ma Onezim pa, alaa ku caaɗe oko wikinne paalta ka, ku maa ga haŋka pa ki oyyiyya ga nuntiɗo ta kaw ma kii.

¹⁶ Gata pa, ki oyaa ɗa payya aleŋ lawwu, innasoopa aleŋ gimu ma ƴiila lawwu. Oko naa ƴa omma ga deyyaw sin ka ƴekkenta, oko kii pa ga akkam dee pe ƴiila. Gata pa, ay sin ka tirta ma akkum gayawwo aleŋ lawwicum o aleŋ gimu kulla ma duwca galbanti oko Miltine aleŋ tancum.

¹⁷ Kii bakammikino aɗe goŋŋa naata aleŋ giicum ka lubbi, ki baamiya Onezim kulla aleŋ naata.

¹⁸ Gaa leewiyam latta ka miɗɗa, e baŋ pa gaa ecekkiyam ɗaane, gu gaartee kotti ki gagawgu oko naa.

¹⁹ A beneyyi keeke pa, ay naa Pol saa ma pittu ma ketepeyyamga: «Ay naa Pol ma pelekkamgu ɗannannitee Onezim.» Na ketepeyyamga ɗa beneyyi keeke maa ki leeɗo kabarre kadar ga kii kulla lekkaw ɗaane maa ki beraw. Ɗaane maa ki beraw pa, ga kii Pilemon, ay hayaatancum.

²⁰ Haŋka pa, sintu, ma semeetee Miltine ki oyyiya Onezim, goŋŋa ki olawca galbantu ma semeetee Masi.

²¹ Na ketepeyyamca maktup teete ma damanno kadar ki leewaa maa na enaam, o na caɗawwica kadar ga ma seene ki leewaa ƴiila kanni maa na enee,

²² o ki panaw kulla were ka ooƴiti asan na aŋka na kaatittoŋ katta. A gata pa, ay ma inaawitoŋ oko Mellayi na katawɗitoŋ.

Salammo ta dessiti

²³ A Epapiras ma ay giitu maa gu bamaɗɗini daŋayi saananti Iisa Masi pa, salammam.

²⁴ Mark o Aristaarke o Demas o Lik, gittaw maa ni loboɗɗo sawa, guta kulla salammam.

²⁵ Ga gidaanuwti Miltine kee Iisa Masi dee ma kuŋ.