Matiye 1 - Migaama

Kookuweetee Iisa Masi

¹ Semeeco kookuweetee Iisa Masi ay kooko. Gata pa ay ka balti sultan Dawud. Dawud pa ay ka balti Biraayim.

² Biraayim pa weyya Isaaka. Isaaka pa weyya Yakub. Yakub pa weyya Yudaa ma seneetee.

³ Yudaa pa weyya Peres o Zeera. Yaaco pa gu semeeti goo Tamar. Peres pa weyya Eserom. Eserom pa weyya Aram.

⁴ Aram pa weyya Aminadab. Aminadab pa weyya Naason. Naason pa weyya Salma.

⁵ Salma pa weyya Booz. Yaati Booz pa, gu semeeti goo Rahab. Booz pa weyya Obed. Yaati Obed pa, gu semeeti goo Rit. Obed pa weyya Zesee.

⁶ Zesee pa weyya sultan ka tatta kee Dawud. Dawud pa weyya Suleman. Yaati Suleman taata pa, min omma gi ay daatti oko Uri.

⁷ Suleman pa weyya Robowam. Robowam pa weyya Abiya. Abiya pa weyya Aza.

⁸ Aza pa weyya Yozapat. Yozapat pa weyya Yoram. Yoram pa weyya Oziyas.

⁹ Oziyas pa weyya Yotam. Yotam pa weyya Akaz. Akaz pa weyya Ezekiyas.

¹⁰ Ezekiyas pa weyya Manaase. Manaase pa weyya Amon. Amon pa weyya Yoziyas.

¹¹ Yoziyas pa weyya Yekoniya ma seneetee wikinne maa gu bammiɗiy giimi ku Isirayel gu kaatikkiko kiɗa ta Babilon.

¹² Maa gu giimi ku Isirayel nowoɗɗe kiɗa ta Babilon, gaa Yekoniya weeɗiya Salatiyel. Salatiyel pa weyya Zorobabel.

¹³ Zorobabel pa weyya Abiyu. Abiyu pa weyya Eliyakim. Eliyakim pa weyya Azor.

¹⁴ Azor pa weyya Sadok. Sadok pa weyya Akim. Akim pa weyya Eliyud.

¹⁵ Eliyud pa weyya Eliyazar. Eliyazar pa weyya Mattan. Mattan pa weyya Yakub.

¹⁶ Yakub pa weyya Yuusup mittí Mariyam. Mariyam pa ay gita appe ma weyya Iisa maa gu kolaa goo Masi, gata maa ga Mella aparre.

¹⁷ Ay kaaka appe ga min oko Biraayim namma ya oko Dawud gu gemmiɗe kookuwee orro o pooɗi, o min oko wikinniti Dawud namma ya wikinne maa gu bammiɗiy giimi ku Isirayel gu kaatikkoo Babilon gu gemmiɗe kookuwee orro o pooɗi, o min wikinne maa gu kaatikkoo giimi ku Isirayel Babilon namma ya wikinne maa gu weeɗiya Masi gu gemmiɗe kulla kookuwee orro o pooɗi.

Wiyawti Iisa Masi

¹⁸ Wiyawti Iisa Masi pa deero aleŋ teete: Mariyam ma akka dee yaati Iisa, ga Yuusup ɓajawwica. Omma min maa ga alɗica eesa ɗa missa pa, gi gita deero ayyenta ma Ruuhanti Mellayi.

¹⁹ Yuusup gata pa ma ecekkaca Mariyam ay gimu ɗayaŋ. Mileŋ ga aŋka ɗa ga leeɗiti yuune unco giimo pa, ga icceero niyyane maa ga meeliɗo ma ƴaapo ka.

²⁰ Gaa maa ga moyowɗo ma gaari ku meeliti kotti, ga malaykatti Mella Miltine oomiyyee gaa beneyyiyyee ma waano gaa: «Yuusup, kii ma ay ka balti sultan Dawud, addo ɓaya ɗa ki iccicca Mariyam aleŋ daaccum, asan ga miica kaaka ma aaye aattí asaa min Ruuhanti Mellayi.

²¹ Gita pa akka wee miica, kii oyyiyyee seme kii Iisa asan ga ay gata appe ma akkiy najjiya gimtee min zunubgeeco.»

²² Gaa keeke paratti deeɗe ku maa ga beneyti Miltine maa ga beneyye ma nabiinice asiɗo butulti. Gata pa beneyye gaa:

²³ «Gomosso ma esee ɗa missa miiɗi akka dee ayyenta. Gii weeɗo miica guu oyyiyyee seme goo Emmanuwel.» Seme ku Emmanuwel pa goo ‘Mella aaye ma keeta’.

²⁴ Maa ga Yuusup miiniɗe min waano, gaa leeɗiya aleŋ maa ga malaykatti Mella Miltine beneyyiyee, gaa iccica Mariyam girti aleŋ daatti.

²⁵ Innasoopa ga eesica ɗa namma gi weeɗiya miica. Gaa Yuusup oyyiyyee seme gaa Iisa.