Koloos 1 - Migaama

Salammiti Pol oko giimi ku geegar ka Koloos

¹ Naa Pol, n̰amaakati Iisa Masi ma aŋkiti Mellayi, naa ma sintine kee Timote, ni salammatoŋ.

² Maktup teete, ni ketepeyyatoŋca oko kuŋ gimtee Mellayi ma nowotte geegar ka Koloos, o ma kappitine ma Masi ku ay seneetini ku damannenta. Ga Mella Tattine leetoŋ gidaanuwe o ga biraatoŋ aapiya.

Pol ma giiti Timote leewee barkinti oko Mellayi

^3-4 Ni giyyikiti amannitoŋ oko Miltine kee Iisa Masi o ƴekkitoŋ maa ku lekka oko gimtee Mellayi. Ay ɗakko appe ni lewɗee diiman barkinti oko Mellayi maa ni enaatoŋga.

⁵ Wikinne maa ku giyyiyya beneyyi ka seeniti, gata ma ay kabarre ta daana, ku ibinya saa maa ga Mella dowwitoŋ samaani. Gata pa, ay keeke appe maa ku ocokke. Amannitoŋ o ƴekkitoŋ pa, gi baltí ay oko keeke gata paaɗe.

⁶ Kabarre ta daana teete pa, sareero namma ya wikirtoŋ. Gita pa tacile dunuune parattí, o were paratti maa gi sarɗe, gi magakkaca nuntico giimo, o gi deewa ka ta ƴiila taasenta. Kunta pa kulla, min meene maa ku giyyicca o ku ibiniyya ta tirta teete gidaanuwti Mellayi, gi magica nuntitoŋ o gi deewa ka ta ƴiila taasenta wikirtoŋ.

⁷ Ku giyyica kabarre ta daana teete min oko Epapiras, giitini ka lubbi maa ni ƴekkaa ma lobokka oko kuŋ aleŋ lubaakati Masi ka damannenta.

⁸ Gata pa gaariniica ƴekkitoŋ maa gi Ruuhanti Mellayi berewwitoŋ.

⁹ Ay ɗakko appe ga niita pa kulla, min meene maa ni giyyikkiti kabarre tee ta amannitoŋ o tee ta ƴekkitoŋ, ni alɗe warra ɗa inniti Mellayi oko kunta. Ni lollokkaa diiman maa ga birittoŋca ibino ta gaaro parattí o iyyo ta kayyeetoŋ ma asaa min oko Ruuhanti. Ma gaari kooko pa, ku ebennaa ta tirta teete latta maa ga aŋka.

¹⁰ Ma goŋŋakite, ku gederra ku nuntiɗo nunto ma wagee ma ta Miltine, o ku leewa diiman latta ma daanee. Gaartoŋ paracco maa ku dee leewo ay gaari ku samaane ka, o ku sapakka ku ibiniyya ta ƴiila Mella.

¹¹ Ni lollokkaa kulla maa ga issittoŋ gudirane ku lewɗiya latta paratti ma gudiranti ma gakamma ɗa ta kaw, maa ku deeɗo baatiynigee o ku hamalɗiy gaari namma ya dessiti.

¹² Ma parhane ku leewinee barkinti oko Mella Baaba, gata ma iyyitoŋ botol ku maa ku gassiɗo haggane min oko lattaati maa ga dowwiyoo oko gimtee were maa gi deyyanti ɓelewɗo.

¹³ Gata cimminee min gudirane tee ta Seetanni, gita ma esekkinee namtuwwi, gaa parinnee aattí mulunniti Runti, gata maa ga ƴekkaa ta kaw.

¹⁴ Ma Runti pa, ga Mella cimminee min zunubgeetine o ga saamiyneegu.

Tattuwti Iisa Masi, Runti Mellayi

¹⁵ Lekka ɗa gimu ma gederra ga elliyya Mella, a innasoo ga Runti saabayyiya saa tak o ga garawwineega. Gata pa aaye omma min oko lawwi paracco ku kilgiyenta o ga ay kayaaco.

¹⁶ Ay ma gata gu lawwi paracco ku dunuuniti deeɗe kilgiyenta, ku samaani o ku kiɗaati, maa ke ella o maa ke ella ɗa, ma ay aleŋ malaykatnigee ma taattuweeco, o guta ma lekka gudirane ta mulunniti o ta hikimiyti. Paracco, ga Mella kilgiyiy ma Runti, o gu ay oko Runti.

¹⁷ Runti pa aaye omma min maa ga Mella alɗica kelgeyya ɗa missa dunuune, o ga ma gudiranti Runti gu lawwi paracco nowoɗɗo wereeriyeeco.

¹⁸ Gimtee paracco ma temekka saananti ay ziiti, gata pa ay kayaaco. Ay ma gata appe gi hayaatane ta marawta diiliɗe, o ga gata ma ay ka omma ma naɗeero ta kaw min aacco giimi ku mattenta, ku maa ga deeɗo ka omma oko lawwi paracco, diiman o were paratti.

¹⁹ Haa, Mella pa, gi deyyee daanee ga latta paratti ma aaye oko gata nuntiyyee ta kaw oko Runti,

²⁰ o gi deyyee daanee kulla, ga taacicca dunuune parattí ma Runti oko gata. Keeke pa ga leyya ma n̰aalo ta baartee Runti maa gu deyya ma paapo kuruwayi. Ay goŋŋa appe ga Mella asikkiti aapiya ku maa ga taaciɗiy ma gata kilgane parattí ma aaye kiɗaati o ma aaye samaani.

²¹ A kunta pa kulla, min omma ku aaye arro min Mellayi, ku alɗiya aŋka ɗa kanti ma mooyitoŋ maa ku lewɗo ka miɗɗa.

²² Haŋka pa, ga Mella taacitoŋ ma gata, ma muutti Runti, gata ma aseero dunuuniti ma zii ka gimi. Keeke pa, ga leyya ku maa ku asiɗo warra unti salan̰, bala er̰n̰e o bala loomane.

²³ Keeke pa ku gasakka, illa kuu bakammica amannitoŋ talta bala bammiti seera seera, o ku aɗaatini duwa ɗa oko ucawtoŋ maa ku nowottikiti min maa ku giyyicca kabarre ta daana. Kabarre ta daana teete pa, deero taasenta oko giimi paracco ku dunuuniti. Naa Pol pa, deero lubaakati Mellayi ma tasaaca kabarre ta daana.

Diigaŋgeetee Pol oko gimtee Mellayi

²⁴ Naata pa haŋka, gi daanaw maa na deegeyɗe oko kuŋ. Ma diigaŋgeetaw kooko pa ziitu, na tattappaa ma koyee oko diigaŋgeetaw maa ga Masi kolowɗinoo. Guta pa, ay oko gimtee ma temekka saananti, guta ma ay ziiti.

²⁵ Naata pa deero lubaakaco, maa na leeɗiyooga lubbi maa ga Mella berewwiyaw. Lubbi kaaka pa, ay na taasittoŋga oko kuŋ kulla beneyti paratti.

²⁶ Seene ma aaye aatti beneyti kaaka pa, min tippa ga Mella kelewwica wikinne paratti o oko ballee paracco, gaa haŋka pa, ga gaariyyooca purta oko giimi ma ay kuntee.

²⁷ Oko guta pa, ga aŋke ga gaariyyooga maanuwti o samanti latta maa ga aŋka ga leeɗiya oko ballee paracco. Latta kaaka pa ma kiilenta gaa haŋka ga garawɗiya purta, ay ga Masi aaye galbigeetoŋ. Ay ma keeke appe ku ocoɗɗe ta tirta teete ga issittoŋ darjanti Mellayi.

²⁸ Gata pa ay Masi keeke appe maa ni tasaa oko giimi paracco o ni wassayyay o ni garkayay ma ibino ta gaaro parattí maa ga Mella berewwini, ku maa ga kulla gimu aɗe sarɗo ga deeɗo talta amanniti ma kappiti ma Masi.

²⁹ Ay oko keeke pe na loboɗɗo, o na nekerɗo ma gudirane maa ga Masi berewwiyaw. Gita pa aaye ziitu gi loboɗɗo ta tirta teete.