Galasi 1 - Migaama

Salammiti Pol oko giimi ku kiɗa ta Galasi

¹ Maktup teete, ay naa Pol n̰amaakati Iisa Masi ma ketepeyyatoŋca. Naata pa, ay giimi ɗa ma leenoo na deeɗe n̰amaaka, o ga gimu ɗa ma n̰akamminoo. Innasoo, na n̰aamenta ma Iisa Masi o ma Mella Baaba, gata ma naɗiya Masi min aacco giimi ku mattenta.

² Ma seneeta paracco ma aaye ma naata, ni salammitoŋ ma maktup teete, kuŋ giimi koo ku kiɗa tee ta Galasi ma temekka saananti Iisa Masi.

³ Ga Mella Tattine o Miltine kee Iisa Masi leetoŋ gidaanuwe o gu biraatoŋ aapiya.

⁴ Masi pa ay gata saa ma birya ziiti saɗikane, ku maa ga Mella saamiyinneegu zunubgeetine. Gata pa leyya keeke ku maa ga cimminne min gaari ku miɗɗa ku dunuune teete ma hekemeyyinee. Keeke pa, ga leyya aleŋ maa ga Mella Tattine aŋka.

⁵ Ay oko gata gi darjane diiman diiman! Amin.

Kabarre ta daana kaƴi ka

⁶ Na ajjibeero ta tirta maa ga Mella ku poociyya saa koɗokka ka goŋŋakite. Ampane kee, ga kolowwitoŋ ma gidaanuwe ma asaa min oko Masi, gaa kunta pa poociyya, kuu joboɗɗo kabarre ta daana kaƴi ma sawa ɗa ma tantini maa ni taasitoŋ.

⁷ A gita pa, lekka ɗa payya kabarre ta daana kaƴi. Lekka soo giimi ma asitoŋ aattoŋ, guu amasɗitoŋ. Guu aŋkiɗo gu ribiliyya ma aaye aattí kabarre ta daana ma beneyya ma gaartee Masi.

⁸ A gata pa, gaa lekka gimu, caŋ ga niita, e baŋ ga malaykat ma asaa min samaani, gaa asittoŋ ga tasawɗitoŋ kabarre ta daana ma sawa ɗa ma tantini maa ni taasitoŋ, ga Mella bolaa.

⁹ Ni beneyyiya paaɗe, o haŋka kulla na ɗelekkaa payya: Gaa gimu asitoŋ taasa kabarre ta daana ma sawa ɗa ma teete maa ku gasse min oko nii, ga gimu kaaka dee boolenta ma Mella.

¹⁰ A gata pa, naa haŋka deyekke aɗɗe logaw ta giimo? Kaw! Na deyekka soo logaw ta Mellayi. Ellino ƴa, na deyekke aɗɗe na deeɗiyo daanayo oko giimo? Naa deyekke missa na deeɗiyo daanayo oko giimo, na deewa ɗa ta kaw lawwiti Masi.

Lubbiti Pol

¹¹ A gata pa seneeta na aŋka ku ibiniyya keeke: Kabarre ta daana teete maa na taasitoŋ asaa ɗa min gimi,

¹² o ga min oko gimi ɗa tuk na gassicca o na ɓeldicca. Innasoo, gi deyyaw saa gaarenta ma Iisa Masi.

¹³ A gita pa, nuntitu ta tippa maa na bakamɗiy aadaŋgeeco Yawudigeyyo ku giyyikiti aɗe. Na diigiyiy ma kaawo gimtee Mellayi, guta ma temekka saananti Iisa Masi, o na diyye misilco.

¹⁴ Gittaw maa gu ƴilaakeetini alɗo sawa ma ay Yawudigee, ga tippa kaaka na ƴiilay arro ma jobbo ta aadaŋgeetini, o na sokokkiya ziitu na joboɗɗiy aadaŋgeeco kookuweetini.

¹⁵ A gata pa, Mella apirnoo maa na alɗo missa aatti yaatu gaa ma gidaanuwti ga kollinnoo maa na deeɗo pe kanti ka. Wikinne maa gi deeɗiyee daanee,

¹⁶ ga Mella gaarawga Runti oko naa ku maa na taasiyyooga oko giimi ma ay Yawudigee ɗa. Oko wikinne kaaka saa, na inneero ɗa ya wasaane kaƴi min oko gimi,

¹⁷ o na kaateero ɗa geegar ka Zerizalem maa na deeɗiy gassa n̰amaakeetee Iisa ku omma min oko naa ku maa gu deeɗaw gaara beneyyiŋgee. Innasoo, na kaateero saa koɗok kiɗa ta Arabi, naa yookiɗe payya geegar ka Damas.

¹⁸ Na nunte ƴilaakee subba omma, naa kaatiɗe ka pe geegar ka Zerizalem maa na deeɗiya ibina Piyer. Ma gata pa, na deero nunta meeni orro o beeƴa.

¹⁹ Bala Piyer na elleero ɗa gimu kaƴi min oko n̰amaakeetee Iisa, illa ay Zak kayti ka sinti Miltine.

²⁰ Na halpayya unti Mellayi, kadar ga beneytu keeke maa na ketepeyya, ay borooli ɗa.

²¹ Min Zerizalem pa, na kaateero diyargee koo ku kiɗa ta Sirii o ku Silisi.

²² Giimi ma temekka saananti Iisa Masi koo ku kiɗa ta Yudee ellinoo ɗa naata saa.

²³ Innasoo, gu giyyeero maa goo: «Gimu ma deegeyyinee min omma saanantí amannitine o ma aŋakke misiltí ma gudiranti parattí, yookeero haŋka ga tasawɗica kabarre ta daana ma asawko giimi gu duwɗiy galbigeeco oko Iisa Masi.»

²⁴ Oko gaartee Mellayi maa ga leyyaw pa, gu giimi ku kiɗa ta Yudee logokkaa.