Ebireenigee 1 - Migaama

Mella beneyyine ma Runti

¹ Tippa, ga Mella beneyyayo diiman ka ma bottolli pay pay oko kookuweetine ma nabiinigee.

² Oko meeni ku dessití dunuuniti kooko soopa, maa ke aayiyo, ga beneyyine ma Runti. Gata kaaka pa, ga aparriya ku maa ga deeɗo Milco lawwi paracco, o ga ma gata appe gi dunuune ga kilgiyicca.

³ Runti kaaka pa ay beerití bahaarane tee ta darjanti Mellayi. Ay ma gata appe gu giimi ibiniyya Mella baŋ ga maateŋ asan ga saabayyiya saa tak. Gata sekennica dunuune ma beneyti ma lekka gudirane. A wikinne maa ga apilɗiy ta wac wac giimi min zunubgeeco pa, gaa deeɗe nunta samaani tiyaawati oko Mella maa ga tattuwti kakee ta kaw.

⁴ Ma keeke pa, ga Mella biryee oko Runti darjane ma ƴiilaca arro tee ta malaykatnigeyyo, mileŋ gu semeetee maa ga biryee kulla kakawwiy ta kaw kunco.

Runti Mellayi ay tattuwe ƴiilay malaykatnigee

⁵ A gata pa Mella beneyye ɗa ta kaw kaytiŋ oko malaykat kaƴi gaa: «Kii ay runtu, o ga min meente na ay taccum», e baŋ pa gaa: «Na deewee tatti oko gata, o gata deewaw runtu.»

⁶ A maa ga n̰aamiyya soopa Runti dunuuniti, gata ma aaye omma min oko lawwi paracco o ga ay kayaaco, ga beneyye gaa: «Malaykatnigeetaw darassa paracco gu aabidiyya»,

⁷ o ga beneyye payya ma gaarco malaykatnigeyyo gaa: «Naata lobokkiko malaykatnigeetaw aleŋ ussu, lubaakeetaw kotti pa aleŋ lettitti okkati.»

⁸ A ma gaartee Runti soopa, ga beneyye gaa: «Kii ay Mella, o wikircum ka mulunniti maa ki nowoɗɗe, nowotta diiman ta kaw, o ki hekemeyya ma botol ka ɗayaŋ.

⁹ Ki ƴekkaa ka ɗayaŋ, o ka miɗɗa pa ki ɗakattiya. Ay ɗakko appe ga kii Mella, ga naa Mella Milcum apirɗum, ma kallo ta siwinni kayaacum ku maa ki nuntiɗo kayaaco giccam. Apiro taata pa beram parhane.»

¹⁰ Gaa beneyyiɗe kulla gaa: «Ay kii Miltine ma kilgiyca kiɗa min diiliti, kii aticca talta, o samaane kulla ay lubbico piccam.

¹¹ Lawwi kooko maa ki kilgiyeero paracco aɗe akka masila, kiita soopa aaye diiman. Guta paracco akka raawa aleŋ n̰aŋgitatti,

¹² kii asiɗiy ɗamalmila aleŋ kaɗiyyu, o ki akkiy maga aleŋ ta kaɗiŋgee maa ga gimu magakka. A kii soopa nowotta kii gata ka, o gu ƴilaakeecam gakamma ɗa ta kaw.»

¹³ Mella beneyye ɗa ta kaw kaytiŋ oko malaykat kaƴi gaa: «Asu ki asiɗo nunta tiyaawatu, namma na asiɗiy gaga giimi ma ɗakattum kiɗaati min asincam ki urpiyyo ta rac.»

¹⁴ A guta malaykatnigee pa ay ini we? Guta ay ruuhaŋgee maa ga Mella n̰amakka gu gayawɗiy giimi ma akka gassa najjiyo.