2 Timote 1 - Migaama

Salammiti Pol oko Timote

¹ Naa Pol n̰amaakati Iisa Masi ma aŋkiti Mellayi, na tasaaca hayaatane ma gakamma ɗa ta kaw, maa ga Mella beneyye gaa ga bereeneeca ma kappitine ma Iisa Masi.

² Maktup teete na ketepeyyamca oko kii Timote maa na ƴekka aleŋ runtu. Ga Mella Baaba, o Miltine kee Iisa Masi, leyyam gidaanuwe o gu biram kawiyo o aapiya.

Pol leewee barkinti oko Mellayi

³ Na leewee barkinti oko Mellayi, gata maa gu kookuweetaw aabide, o naata kulla aabaddaa bala loomane min mooyitu ma passalla ka samaane o ka miɗɗa. Aandoŋ o paato bala nambo, naa lollokka Mella, gu semeecam oko ki Timote na esekkiy.

⁴ Na aŋka na elliɗum ku maa gi galbantu deeɗo unenta ma parhane, asan na moyay tooccam ma sorotta wikinne maa ke tacalɗo.

⁵ Na moyaaca kulla amannicum ta tirta ma lekka ɗa daɓallo. Ay ɗakko appe na lewɗee barkinti oko Mellayi. Amanno teete pa, gi lekkica ƴa omma gi kuuccum tee Lowis o yaacum tee Enis. Haŋka pa na caɗawwica kadar ki lekkica kulla.

⁶ Ay ɗakko appe na enewɗum ki nuntikkiti talta gudirane maa ga Mella biryam, wikinne maa na gagiyamgu pittaw kayaacum.

⁷ A gita pa galbane maa ga Mella birne ay galbane ɗa ma lekka ɓayaw, innasoo gi ay galbane ma bereene gudirane o ƴekko o mooyo ta samaane.

⁸ Ay ɗakko appe naa gi aɗam dee ɗa suura ki beneyɗiyoogu oko giimo garrarritee Miltine kee Iisa maa ki ibina, o naata maa gu esekkinoo daŋayi asan na lubbiyee oko gata. Innasoo, ma gudirane maa ga Mella beram, ki oyyu ki diigiyɗo aleŋ naata, saanantí kabarre ta daana maa ke tasaa.

⁹ Ay gata ma najjiynee, gaa kollinnee ku maa ke deeɗo duwenta oko gata ka, kollinee ɗa oko lubaakitine ku samaane maa ke leelo. Innasoo, ga ay ma kanti maa ga aŋakke liyawti min omma o ma gidaanuwti ga kollinnee. Gidaanuwti pa, ga gaarineega ma Iisa Masi omma min maa ga alɗica leewa ɗa missa dunuune parattí.

¹⁰ A haŋka pa, ga gidaanuwti Mellayi deene saa pe gaarenta, wikinne maa ga Najjaayatine kee Iisa Masi asiɗe kiɗaati. Gata ma gederre ga misilicca gudiranti muuti, gaarineeca saa pe kar̰aŋ hayaatane ma gakamma ɗa ta kaw, ma beneytí kabarre ta daana.

¹¹ A naata pa, ay oko gaarti kabarre ta daana gita paaɗe, ga Mella apirinnoo ku maa na taasicca o na gaaricca o na deeɗo n̰amaakati Iisa Masi.

¹² Ay ɗakko appe gu diigaŋgee kooko paracco na hamalɗiy, o gi jalawwiyaw ɗa gu bakamɗino daŋayi, asan na ibina baŋ ga oko we na dowɗica galbantu, o na caɗawwica kadar ga Mella lekka gudirane, maa ga beneytí kabarre ta daana maa ga damakkawca alɗo dee ɗa magenta, namma ya meene ta parlanti.

¹³ Giraane ta samaane o ta tirta maa ki gasse min oko naa, ki iccica, gi deeɗam botol ka jobbiti, ma amanno o ma ƴekko maa ke lekka ma kappitine ma Iisa Masi.

¹⁴ Ma Ruuhanti Mellayi ma nowotte galbigeetine, ki baamiy talta beneyyiŋgeeti kabarre ta daana.

Barkanti Mellayi oko girti Onezipor

¹⁵ A kii Timote pa, lekka kabarre kadar gu seneeta paracco ma aaye kiɗa ta Aazi poocinoo. Pijel o Ermozen guta kulla poocinoo.

^16-17 Ga Miltine kawiyayo oko gimtee Onezipor, asan ga gaayinoo diiman maa gu bakamɗinoo daŋayi o gi deewiyee ɗa suuree. Ay ɗakko appe ga maa ga asiɗe geegar ka Rooma, ga asiyya diyya uwwa o kiɗaati were maa gu bakamɗinoo. Gaa gassinnoo guu onokkinoo daŋayi ma janaazargee.

¹⁸ Ay kaaka appe, naa ga Miltine ban̰n̰u ga Onezipor gassicca kawiyo meene ta parlanti. Min oko giimi paracco, ga ki Timote lekka ƴiila kabarre oko lubbi maa ga Onezipor leyyaw geegar ta Epez.