Juɛl a pwɔdɛn tɛ Mak 1 - Juɛl a pwɔdɛn tɛ Mak 1947

¹ JUƐL a pwɔdɛn tɛ Kacɛ Juɔŋ a Tolɛn, Yecu Kitho jɔnɛn ɔŋ.

² Ballɛ ba juɛl kienɛn nebi Ajaya: Gwɔlɛ, Ya cwondɛ minɛ cwunɛn Ya i nyamɔ ti, Minɛ yɔŋɛ pɔy i;

³ Pwɔnu minɛ yaadɛn wuwɛ jidɛn, Naŋdɛ pɔy Ciagɔn Tolɛn, Noŋdɛ pɔy a tɛlgɛ.

⁴ Jɔn bɛnɛ, eke a minɛ noŋɛ baptaijɛ tɛ wuwɛ jidɛn ɔci mitkɛ ma tɛ juɛl baptaijɛ tɛ makɛ wiagɛ tɛ nɔjɛ ɔci nyingɛ yalɛn aŋkɛ nɔjɛ badɛ.

⁵ Ma ɔcɛn Jɔn ti wakɛnda, ɔcɛn ta ban Judaya, ɔcɛn ta ban Jerucalem. Jɔn noŋɛn baptaijɛ tɛ makɛ lɛrtɛ nɔjɛ eken da, noŋɛn baptaijɛ thul ji, thul Jordan.

⁶ Jɔn yhɛŋyɛ buruŋ naŋɛn tɛ ji koloŋa, ɔci bwɔrɛn eke degdɛ tɛyɛ ti; eke omdɛ tooŋgɛ ɔci cinyɛ.

⁷ Jɔn gɔkjɛn: Minɛ ballɛ botɛ ya ŋwoyɛ ti, Eke a minɛ tolcɛn ta ya, ya bwɔnɛ minɛ cwɔkɛn bɛ.

⁸ Ya baptaijɛ ɣɛke piak jidɛn; Eke baptaijɛn tɛ Boŋ a Bɔwɛn jitɛn.

⁹ Aŋkɛ tɛ ɣoŋkɛ a nɛnɛ Yecu bɛnɛ ta Nadaret Galili, ɔci Jɔn noŋdɛ Eke baptaijɛ tɛ Jordan ji.

¹⁰ Aca nɛntɛ Yecu ballɛ bɛyɛn ta piatɛn Eke gɔrcɛn puɔlɛ nyalɔ jɛnyɛn jidɛn, ɔci Boŋ a Bɔwɛn ba bom cocɛn Eke ti:

¹¹ ɔci pwɔnu bɛnɛn ta nyalɔ, gɔkjɛn: I Kacɛ Ya, Ya anɛ I nɛ tolɛn, yum Ya pwɔn a pwɔn I ti.

¹² Aca nɛntɛ Yecu enyɛ Boŋ a Bɔwɛn tɛ wuwɛ jidɛn.

¹³ Yecu ballɛ wuwɛ jidɛn ninkɛ maban aŋɛ ayo ɔci Cetan bɛnɛ Eke ti aŋkɛ Yecu maaldɛ eke tɛ nɔjɛ; Yecu ciyɛ tɛ wuwɛ yakɛn liy; ɔci makɛ enjel nyotɛ Eke.

¹⁴ Tɛ nɛnɛ badɛn Jɔn uljɛn ma cigɛn ji, ɔci Yecu bɛnɛ Galili, mitkɛn ma tɛ juɛl a pwɔdɛn Juɔŋ a Tolɛn ti.

¹⁵ Eke gɔkjɛn: Ɣoŋ a bɛnɛ dokɛ, ɔci Kɛn Juɔŋ a Tolɛn ballɛ cwɔlcɛn: wiagɛ ta nɔjɛ, nyingɛ yalɛn; jithɛ juɛl a pwɔdɛn.

¹⁶ Yecu atɛn a wun pɔy thul Galili, Eke gɔrcɛn Caimon ɔci mod Caimon Andru wiwɛn ɣuŋ thul ji: eken a makɛ muwɛ yak.

¹⁷ Yecu gɔkjɛn eken ti: Bɛdɛ, botɛ Yɛ ti, ɔci Ya lotɛ ɣɛke ti akɛ ɣɛke muwɛ maban.

¹⁸ Aŋkɛ aca nɛntɛ ɣuŋgɛ dulɛn, eken atɛn botɛ Yecu ti.

¹⁹ Eken atɛ lakɛn diɛrɛn tɔlɛ, Yecu gɔrcɛn Jakob kacɛ Yebedi, yakɛn mod eke Jɔn, ballɛ bumɛ ji, yɔŋɛn ɣuŋgɛ.

²⁰ Aca nɛntɛ Yecu borcɛn eken: ɔci Jakob ɔci Jɔn, wegen Yebedi dulɛn bumɛ ji yakɛn makɛ kɛngɔn eken, ɔci eken atɛ botɛn Yecu ti.

²¹ Eken atɛn Kapernaum ji; ɔci tɛ ɣoŋ a wuwɛn Yecu atɛ cinagog ti, kacɛn ɣora ɔci ma laldɛn tɛ juɛl.

²² Yecu ma laldɛn nɛ pwɔdɛn, ba makɛ kijɛ wɛragɛ budan bɛ; Yecu ma laldɛn ba minɛ juɛl nhijɛn kan.

²³ Minɛ mwuŋɛn juɔŋ a yayɛn ballɛ cinagog ji; eke yaadɛ, gɔkjɛn:

²⁴ I Yecu Nadaret, ɔn noŋdɔn wakɛ I ti; I bɛnɛ ɔn nhugdɛn? I nhijɛn ya dokɛ, I a Minɛ Bɔwɛn Juɔŋ a Tolɛn ti.

²⁵ Ɔci Yecu ɣitɛ eke ti, gɔkjɛn: Ciyɛ liedɛ, kacɛ burɛ ta minɛ.

²⁶ Juɔŋ a yayɛn nɛnɛ minɛ jɛmɛn, yaadɛ nɛ peny, ɔci kacɛn burɛ, minɛ dulɛn dokɛ.

²⁷ Ma punɛn wakɛnda, ɔci ma tocɛ a tatɛn pokɛn, gɔkjɛn: Nɛnɛ a wakɛ? juɛl a wonɛ! Minɛ ɣitɛ jɔkɛn yayɛn ɔci jɔkɛn jithɛ.

²⁸ Juɛl wakɛ naŋɛn Yecu piyɛn nɛ peny non warɛda ban Galili.

²⁹ Tɛ wun koyɛn burɛ tɛ cinagog Yecu ɔci Jakob ɔci Jɔn, ma a dokɛn, kacɛn ɣora ɣon Caimon ɔci Andru.

³⁰ Ɔci eŋ Caimon megen ballɛ ninɛ tɛ inyu warɛ yayɛ. Yecu myitkɛ ma nɛ peny:

³¹ aŋkɛ Eke bɛnɛ ɔci minɛ warɛ yayɛn mwugdɛ tɛ biŋɛ, luldɛn nyalɔ; warɛ pwɔnɛ dokɛ, eke atɛ nhɔrthɛ ma am.

³² Nɛ tenɔ tɛ ɣoŋ ɣocen ma ɛŋnɛ makɛ wakɛn yɛyɛn Yecu ti, yakɛn ma mwuŋɛ jɔkɛn.

³³ Ɔci ma ban ji ɔcɛn wakɛnda tɛ ɣon Caimon.

³⁴ Ma mwuŋɛn wajɛ a coŋɛn pwɔŋnɛn Yecu, ɔci jɔkɛn a coŋɛn yɛmnɛn Eke ɔntɔ; ɔci Yecu yuokɛn tɛ jɔkɛn gɔkjɛn jig, Eke nhijɛn jɔkɛn.

³⁵ Nɛ lidɔ ɣoŋ min bawɛ Yecu jɔŋɛn nyalɔ, atɛn burɛ, muortɛn Juɔŋ a Tolɛn ti.

³⁶ Caimon ɔci ma ballɛ tɛ Yecu atɛ botɛ pɔy Eke;

³⁷ tɛ Yecu yowɛrnɛn, ma gɔkjɛn: Ma lirtɛ I wakɛnda.

³⁸ Yecu gɔkjɛn eken ti: Dalɛ, ikin otin ban aŋan ti, aŋkɛ makɛ nɛnɛ laldɛn daŋkɛn; Ya bɛnɛ aŋkɛ noŋgɛ ɔŋ.

³⁹ Yecu botɛ ban Galili warɛda, kacɛn cinagog ji, lotɛn ma tɛ juɛl ɔci pɔktɛ ma ta jɔkɛn.

⁴⁰ Minɛ mwuŋɛ ceecɛ bɛnɛ Yecu ti, nyiwɛn Eke ti, ɔci dwinjɛn inyu Eke ti, gɔkjɛn: Kan I bwɔgɛ, I yakɛ ti, warɛ ya da pɔkɛ.

⁴¹ Yecu yum Eke pɔŋnɛ, atɛ minɛ tabdɛ tɛ biŋɛ, ɔci gɔkjɛn eke ti: Ya bwɔgɛ; warɛ i pɔkɛ.

⁴² Ɔci aca nɛntɛ ceecɛ atɛ ɔntɔ, minɛ warɛ pwɔnɛ dokɛ.

⁴³ Yecu ɣitɛ eke ti, gɔkjɛn:

⁴⁴ Ɔgdɛ otɛ; na gɔkjɛ minɛ ti bɛ: ɔgdɛ otɛ minɛ Juɔŋ a Tolɛn ti, eke gɔrtɛ i ɔci wakɛ gwɔŋɛ Mojet ɣondɛ tɛ eke, aŋkɛ i warɛ luɔgdɛ, ɔci ma gɔrcɛ aginɛ naŋɛn Ya.

⁴⁵ Minɛ ceecɛ nɛnɛ atɛ, gɔkjɛn juɛl nɛ peny, aŋkɛ ma yuokɛn tɛ Yecu, ban cienɛ tɛ Eke, ɔci Eke atɛ non a wuwɛ. Ma bɛnɛ Eke ti ta ban warɛda.