Kanta 1 - Maayong Balita nga Biblia (2012)

¹ Ang labing matahom sa mga ambahanon ni Solomon.

Ang Nahauna nga Ambahanon Ang Babayi

² Ginpaligusan mo ako sing mga halok, ang imo gugma mas matam-is pa sang sa bino.

³ May kaamyon sa palibot nimo, sa pagmitlang sang imo nga ngalan, ang imo kahumot akon madumdoman. Wala sing babayi nga indi maghigugma sa imo.

⁴ Dalha ako upod sa imo kag malagyo kita, manginhari ko ikaw kag dalha ako sa imo kwarto. Magamalipayon kita, magakasadya kita sa aton paghigugma, labaw pa sang sa pag-inom sang bino. Indi makatilingala nga ang tanan nga mga babayi nagahigugma sa imo!

⁵ Mga babayi sang Jerusalem, mailom-ilom ako subong sang mga tolda ni Kedar sa desierto, pero matahom subong sang mga kurtina sa palasyo ni Solomon.

⁶ Indi ako paghikayi tungod sang akon kolor, kay nagkayumanggi ako tungod sang adlaw. Ang akon mga utod nga lalaki naakig sa akon kag ginpaobra nila ako sa talamnan sang ubas. Wala na ako sing tion sa pagtatap sang akon kaugalingon.

⁷ Sugiri ako, palangga ko, diin ka bala mapahalab sang imo panong? Diin bala sila mapasilong tungod sa init sang udtong adlaw? Ngaa magpangita ako sa imo sa mga panong sang iban nga mga manugpahalab?

Ang Lalaki

⁸ Wala mo bala matultoli ang lugar, O labing matahom sa mga babayi? Lakat, sunda ang panong kag pangita sing halalban para sa imo mga kanding malapit sa mga tolda sang mga manugpahalab.

⁹ Ikaw, palangga ko, nagapukaw sang balatyagon sang mga lalaki, subong sang isa ka kabayo nga babayi nga nagapukaw sang balatyagon sang mga lalaki nga kabayo sa mga karwahi ni Paraon.

¹⁰ Ang imo sinalapid nga buhok matahom tan-awon sa imo mga pisngi, kag nagawayway sa imo liog kaangay sang mga alahas.

¹¹ Pero magahimo kami sing kulintas nga bulawan para sa imo, nga napunihan sang pilak.

Ang Babayi

¹² Samtang ang akon hari yara sa iya salaliayan, ang akon agwa nagapangamyon.

¹³ Ang akon kahagugma may kahumot sang mira samtang nagaulon sia sa akon dughan.

¹⁴ Ang akon kahagugma kaangay sang mga bulak sa talon nga nagapamukadkad sa talamnan sang ubas sa Engedi.

Ang Lalaki

¹⁵ Daw ano katahom sa imo, palangga ko, daw ano ang pagsiga sang imo mga mata tungod sang gugma!

Ang Babayi

¹⁶ Daw ano ka gwapo sa imo, mahal ko, kag daw ano ka makawiwili sa imo! Ang malagtom nga hilamon mangin-aton higdaan,

¹⁷ ang mga sedro amo ang mangin mga balayan sang aton balay, kag ang mga kahoy nga sipres amo ang kisame sini.