Masalimo 92 - Mawu a Mulungu mu Chichewa Chalero

Salimo 92

Salimo. Nyimbo ya pa tsiku la Sabata.

¹ Nʼkwabwino kutamanda Yehova ndi kuyimbira nyimbo dzina lanu, Inu Wammwambamwamba,

² Kulengeza chikondi chanu mmawa, ndi kukhulupirika kwanu nthawi ya usiku,

³ kuyimbira nyimbo choyimbira cha zingwe khumi ndi mayimbidwe abwino a zeze.

⁴ Pakuti Inu mumandisangalatsa ndi ntchito zanu, Inu Yehova; Ine ndikuyimba mwachimwemwe pa ntchito ya manja anu.

⁵ Ndi yayikuludi ntchito yanu Yehova, maganizo anu ndi ozamadi!

⁶ Munthu wopanda nzeru sadziwa, zitsiru sizizindikira,

⁷ kuti ngakhale anthu oyipa aphuka ngati udzu ndipo anthu onse ochita zoyipa apindula, adzawonongedwa kwamuyaya.

⁸ Koma Inu Yehova, ndinu wokwezedwa kwamuyaya.

⁹ Zoonadi adani anu Yehova, zoonadi adani anu adzawonongeka; onse ochita zoyipa adzabalalitsidwa.

¹⁰ Inu mwakweza nyanga yanga ngati nyanga ya njati; mafuta abwino akhuthulidwa pamutu wanga.

¹¹ Maso anga aona kugonjetsedwa kwa olimbana nane, makutu anga amva za kugwa kwa amaliwongo anga oyipa.

¹² Anthu olungama adzaphuka ngati mtengo wa mgwalangwa, adzakula ngati mkungudza wa ku Lebanoni;

¹³ odzalidwa mʼnyumba ya Yehova, adzakula bwino mʼmabwalo a Mulungu wathu.

¹⁴ Iwo adzaberekabe zipatso mu ukalamba wawo, adzakhala anthete ndi obiriwira,

¹⁵ kulengeza kuti, “Yehova ndi wolungama; Iye ndiye Thanthwe langa, ndipo mwa Iye mulibe choyipa.”