Masalimo 3 - Mawu a Mulungu mu Chichewa Chalero

Salimo 3

Salimo la Davide. Atathawa mwana wake Abisalomu.

¹ Inu Yehova, achulukadi adani anga! Achulukadi amene andiwukira!

² Ambiri akunena za ine kuti, “Mulungu sadzamupulumutsa.” Sela

³ Koma Inu Yehova, ndinu chishango chonditeteza, Inu mwandiveka ulemerero ndipo mwanditukula.

⁴ Kwa Yehova, Ine ndilira mofuwula ndipo Iye amandiyankha kuchokera ku phiri lake loyera. Sela

⁵ Ine ndimagona ndi kupeza tulo; ndimadzukanso chifukwa Yehova amandichirikiza.

⁶ Sindidzaopa adani anga osawerengeka amene abwera kulimbana nane kuchokera ku madera onse.

⁷ Dzukani, Inu Yehova! Pulumutseni, Inu Mulungu wanga. Akantheni adani anga onse pa msagwada; gululani mano a anthu oyipa.

⁸ Chipulumutso chimachokera kwa Yehova. Madalitso akhale pa anthu anu. Sela