Masalimo 148 - Mawu a Mulungu mu Chichewa Chalero

Salimo 148

¹ Tamandani Yehova. Tamandani Yehova, inu a kumwamba, mutamandeni Iye, inu a mlengalenga.

² Mutamandeni, inu angelo ake onse, mutamandeni, mutamandeni, inu zolengedwa za mmwamba.

³ Mutamandeni, inu dzuwa ndi mwezi, mutamandeni, inu nonse nyenyezi zowala.

⁴ Mutamandeni, inu thambo la kumwambamwamba ndi inu madzi a pamwamba pa thambo.

⁵ Zonse zitamande dzina la Yehova pakuti Iye analamula ndipo zinalengedwa.

⁶ Iye anaziyika pa malo ake ku nthawi za nthawi; analamula ndipo sizidzatha.

⁷ Tamandani Yehova pa dziko lapansi, inu zolengedwa zikuluzikulu za mʼnyanja, ndi nyanja zonse zakuya,

⁸ inu zingʼaningʼani ndi matalala, chipale ndi mitambo, mphepo yamkuntho imene imakwaniritsa mawu ake,

⁹ inu mapiri ndi zitunda zonse, inu mitengo ya zipatso ndi mikungudza yonse,

¹⁰ inu nyama zakuthengo ndi ngʼombe zonse, inu zolengedwa zingʼonozingʼono ndi mbalame zowuluka.

¹¹ Inu mafumu a dziko lapansi ndi anthu a mitundu yonse, inu akalonga ndi olamulira a dziko lapansi.

¹² Inu anyamata ndi anamwali, inu nkhalamba ndi ana omwe.

¹³ Onsewo atamande dzina la Yehova pakuti dzina lake lokha ndi lolemekezeka; ulemerero wake ndi woopsa pa dziko lapansi pano ndi kumwamba komwe.

¹⁴ Iye wakwezera nyanga anthu ake, matamando a anthu ake onse oyera mtima, Aisraeli, anthu a pamtima pake. Tamandani Yehova.