Obaadiyaa 1 - Macaafa Qulqulluu Afaan Oromoo

Firdiin Edoom Irratti Akka Dhufu Himuu Isaa

¹ Mul'anni Waaqayyo gooftaan waa'ee biyya Edoomiif Obaadiiyaatti mul'ise kanatti fufee jira; ergamaan tokko gara saba biyya lafaa irra jiraniitti ergamee, <<Ka'aa! Dhaqnee biyya Edoom in lollaa!>> jechuuf akka jiru nuyi Waaqayyo irraa dhageenyeerra.

² Ammas Waaqayyo,<<Kunoo, saba lafa irraa keessaa ati akka xinnaattu, raawwattees akka tuffatamtu nan godha;

³ ati yaa isa mana kee iddoo ol jedhaa irratti ijaarrattee, yaa isa holqa dhagaa keessa jiraattuu, <<Eenyutu lafatti gad na buusa?>> jettuu, of tuulummaa garaa keetiitu si gowwoomse*.

⁴ Ati akka joobiraa yoo ol kaate iyyuu, mann'ee kees urjoota gidduutti yoo ijaarratte iyyuu, ani achii gad sin buusa>> jedhee dubbateera*.

⁵ Hattuun yookiis saamtuun halkaniin mana kee dhufuun si balleessuudhaaf yoo ta'e iyyuu, hammuma barbaadan hatu mitii ree>> Warri ija waynii ciratanis yoo dhufan, qarmii in hambisu mitii ree>>

⁶ Garuu attamitti qabeenyi Esaawuu fonqolfame, badhaadhummaan inni dhokfates attamitti akka jirutti saamame ree>>

⁷ Warri garee keetii hundinuu gara daariitti si in dhiibu, firoonni kees gowwoomsaadhaan si mo'u; firoonni kee warri amanamoon dhoksaatti kiyyoo si dura in kaa'u, <<Inni immoo hin hubatu>> siin jedhu.

⁸ Guyyaa sanatti Waaqayyo, <<Ani warra ogeessota Edoom keessaa, warra hubatoo tulluu Esaawuu irraa hin balleessuu ree?>> jedhee dubbateera.

⁹ <<Yaa Temaan! Loltoonni kee in sodaachifamu, warri tulluu Esaawuu irra jiran hundinuus ajjeefamanii in dhumu.

¹⁰ Obboleessa kee Yaaqoob irratti humnaan waan kaateef, in yeellaasifamta, bara baraanis in badda.

¹¹ Yommuu warri ormaa loltoota isaa booji'anii dallaa isaatti ol lixanii Yerusaalem irratti muka buufatan, atis akkuma warra kaanii isaanitti taatee, irraa fagaattee in dhaabatte*.

¹² Guyyaa obboleessi kee rakkatutti isa tuffachuun, guyyaa badiisa namoota Yihudaatti, gammaduun, yeroo dhiphina isaaniittis isaanitti baanachuun siif hin ta'u ture!

¹³ Guyyaa badiisi saba kootti dhufutti dallaa isaaniitti ol lixuun, guyyaa badiisa isaaniitti isaanitti ga'isuun, isaan saamuunis siif hin ta'u ture*!

¹⁴ Guyyaa dhiphina isaaniitti karaa qaxxaamuraa irra dhaabattee eegdee warra baqatanii ba'an rukuttee ajjeesuun, warra hafanis dabarsitee kennuun, siif hin ta'u ture!

¹⁵ <<Guyyaan ani Waaqayyo saba hundumaatti faradu dhi'aateera; akkuma ati nama irratti hojjette si irratti in hojjetama; hojiin kees mataa keetti in deebi'a*.

¹⁶ Akkuma sabni koo tulluu koo isa qullaa'aa irratti xoofoo dheekkamsaa keessaa dhugan akkasuma immoo sabni hundinuu utuu wal irraa hin kutin isa in dhugu; isaan qodaa isaa keessaa xuruurfatanii in dhugu, akka waan hin jirrees in ta'u*.

¹⁷ Warri hafan garuu tulluu Xiyoon irra in jiraatu, tullichis qulqullaa'aa in ta'a; sanyiin Yaaqoob immoo warra lafa isaanii fi qabeenya isaanii isaan irraa fudhatee harkaa deebisanii in fudhatu*.

¹⁸ Yommus egaa sanyiin Yaaqoob ibidda, sanyiin Yoseefis barbadaa itti ta'anii, sanyii Esaawuu isa akka habaqii gubanii in fixu; sanyii Esaawuu keessaa kan oolu tokko illee hin jiru>> jedhee dubbateera*.

¹⁹ Warri biyya gara mirgaa tulluu Esaawuu, warri gaara jala jiraatan immoo biyya Filiisxiyaa in qabatu; isaan Samaariyaadhaa fi lafa sanyii Efreem in qabatu, sanyiin Benyaamiin immoo Giil'aadin in qabatu.

²⁰ Loltoonni Israa'el warri booji'amanii turan biyya Kana'aan hamma Zaarefaatitti in qabatu; warri Yerusaalemii booji'amanii Sefaaraad jiran immoo mandaroota biyya gara mirgaa keessa jiran in qabatu.

²¹ warri isaan furan tulluu Xiyoon irratti ol ba'anii Esaawuutti in faradu; yommus mootummaan kan Waaqayyoo in ta'a*.