Fakkeenya 1 - Macaafa Qulqulluu Afaan Oromoo

Bu'aa Fakkeenyonni Kennan

¹ Fakkeenyonni Solomoon ilma Daawit, mootii Israa'el kanatti aananii jiru*.

² Isaanis namoonni ittiin ogummaa fi barsiisa akka argataniif, dubbii beekumsa of keessaa qabus akka hubataniif in gargaaru;

³ akkasumas qalbifachuudhaan, qajeelummaa fi wanta seeraan eegame, wanta dhugaa ta'es akka argataniif,

⁴ wallaalonni mala, ijoollonnis beekumsaa fi dubbii gargar baasu akka qabaataniif kennaman.

⁵ Namni ogeessi in dhaggeeffata, barumsas in dabalata, namni dubbii gargar baasuu beekus mala in argata.

⁶ Dubbii fakkeenyaan dubbatamu, haasaa sookaa, wanta ogeeyyiin dubbataniif hibboo in hubata.

⁷ Waaqayyoon sodaachuun jalqaba ogummaa ti, gowwoonni garuu ogummaa fi barsiisa in tuffatu*.

Dargaggeessaaf Gorsa Kennuu Isaa

⁸ Yaa ilma ko, gorsa abbaa keetii dhaga'i, barsiisa haadha keetiis hin tuffatin*.

⁹ Isaan mataa keetiif akka daraaraa battee dha'amee ti, morma keetiifis mi'a miidhaginaa ati dirattuu dha.

¹⁰ Yaa ilma ko, cubbamoonni yoo si wallaalchisuuf jedhan, tole hin jedhiniif*;

¹¹ isaan,<<Nuu wajjin kottu, dhiiga namaa dhangalaasuudhaaf dhaqnee riphnee eegganna; nama balleessaa hin qabnes sababiidhuma tokko malee, miidhuudhaaf karaatti in eegganna;

¹² akka iddoo lafa jalaatti, akka warra fayyaatti boolla gad fagoo keessa buufamaniittis guutummaatti isaan in liqimsina.

¹³ Nuyi wanta gati-jabeessa hundumaa in arganna, manneen keenyas wanta saamneen in guuttanna;

¹⁴ hirmaata keenya walitti in dabalanna, korojoon keenyas tokko haa ta'u!>> yoo siin jedhan,

¹⁵ yaa ilma ko, isaanii wajjin hin adeemin, karaa isaanii irras hin bu'in!

¹⁶ Miilli isaanii hamaatti in fiiga, isaan dhiiga dhangalaasuudhaaf in ariifatu.

¹⁷ Warra baalleedhaan ka'an qabuudhaaf, erga isaan arganii kiyyoo diriirsuun waa'ee hin baasu.

¹⁸ Namoonni kun riphanii eeggachuun isaanii, dhiiguma ofii isaanii dhangalaasuutti in geessa; kan biraa karaatti eeggachuun isaaniis jireenya ofii isaanii in balleessa.

¹⁹ Jireenyi nama bu'aa jal'inaa buufatuu kana in fakkaata; qabeenyi akkasiis lubbuu namichaa in balleessa.

Ogummaan Namoota Waamuu Ishee

²⁰ Ogummaan bakkee keessaa guddiftee in iyyiti, walga'ii karaa keessaas sagalee ishee in dhageessifti;

²¹ mataa lafa namoonni itti wal ga'anii irraa, sagalee ishee ol fudhattee in iyyiti; karra kellaa mandaraatiis in dubbatti*.

²² Isheen,<<Isin wallaalota nana, hamma yoomiitti wallaalummaa jaallattu>> Isin ga'iftoota nana, hamma yoomiitti ga'isuutti gammaddu>> Isin warri gowwoonnis hamma yoomiitti beekumsa jibbitu>>

²³ Gorsa koo dhaggeeffadhaa! Kunoo, ani hafuura koo isiniif nan dhangalaasa, dubbii koos akka beektan nan godha;

²⁴ ani isin waamnaan erga diddanii, harka koo bal'ifnaanis gara koo kan dhufu erga dhibee*,

²⁵ isin gorsa koo hundumaa tuffattanii, iffata koos erga hin barbaannee,

²⁶ ani immoo badiisa keessanitti nan kolfa, naasuun yommuu isin qabatus isinittan ga'isa*.

²⁷ Naasuun akka bubbeetti yommuu isinitti dhufu, badiifni akka qilleensa jabaatti yommuu isinitti bubbisu, rakkinnii fi muddamni yommuu isin irra gara galu,

²⁸ isin na waammattu, ani garuu deebii isiniif hin kennu; dhimmitaniis na barbaaddu, ana hin argattan*.

²⁹ Isin beekumsa in jibbitan, sodaa Waaqayyoos hin fo'anne;

³⁰ isin gorsa koo hin barbaanne, iffata koo hundumaas in tuffattan;

³¹ kanaaf isin ija hojii keessanii in nyaattu, wanta akeeka baafattaniinis in wichirooftu*.

³² Wallaalota karaa irraa goruutu ajjeesa, gowwootas <<Giddii hin qabu>> jechuutu balleessa.

³³ Namni anaaf dhaga'u garuu nagaatti in jiraata, wanta hamaa hin sodaatu, hin bir'atus>> in jetti.