ZEKALIYA 1 - Luvale Bible 1970

Vatu navavasanyika ngwavo, vakinduluke kuli Yehova

¹ Hakakweji wamucitanu navatatu, hamwaka waNdaliu wamucivali, lizu lyaYehova lyejile kuli kapolofweto Zekaliya mwanaMbelekiya mwanaIto ngwenyi,

² Yehova asangumukile nandombo kuli vakaka jenu.

³ Ngoco vambulile ngwove, Yehova wamayongomena nambe ngwenyi, Kindulukenu kuli Ami. Mukiko mwanambe Yehova wamayongomena. Ngwenyi, Kaha nangukinduluka kuli enu. Mukiko mwanambe Yehova wamayongomena.

⁴ Kanda mupwa nge muze vapwile vakaka jenuko, vaze vasanyikilenga kuli vapolofweto vaze valivangile ngwavo, Yehova wamayongomena nambe ngwenyi, Kindulukenu jino nakuseza jijila jenu jajipi nakuseza vilinga vyenu vyavipi, oloze kavevwililileko cipwe kutengeleka matwitwi avo kuli Amiko. Mukiko mwanambe Yehova.

⁵ Vakakuluka jenu vali kulihi? Kaha vapolofweto veji kuyoyanga haya myaka yosena numba?

⁶ Oloze mazu ami, vilika vyami, vize ngwavalwezele vangamba jami vapolofweto, vyavawanyine vakaka jenu nyi? Kaha Valumukile, valyambile ngwavo, Nganomu ajinyine Yehova wamayongomena kutulinga, nge kutesa najijila jetu, nge kutesa navilinga vyetu, mukiko vene mwanatulingila.

Kapolofweto navamumwenesa tuvalu

⁷ Halikumbi lyakakweji wakusokesa mulikumi naumwe lyakusokesa mumakumi avali naawana, uze kakweji Xevate, hamwaka waNdaliu wamucivali, lizu lyaYehova lyejile kuli kapolofweto Zekaliya mwanaMbelekiya mwanaIto ngwenyi,

⁸ Ngwamwene haufuku, kaha kumana, kwapwile lunga apwile nakutambuka hakavalu ucila, emanyine mumiluta yize yapwile mumilefwe. Kaha munyima yenyi mwapwile tuvalu, vacila navaciluluka navatoma.

⁹ Ngwamwihwile ngwami, Ove mwata wami, ava veya? Kangelo uze ahanjikile nayami angukumbulwile ngwenyi, Ami nangukulweza muvapwava.

¹⁰ Lunga uze emanyine mumiluta angukumbulwile ngwenyi, Ava vakivo vaze vanatumu kuli Yehova mangana vatambwojokenga hamavu.

¹¹ Kaha vamukumbulwile kangelo kaYehova uze emanyine mumiluta ngwavo, Tunatambwojoka lyehi hamavu, kaha kumana, kumavu kwosena kuli nakunoka nakuunda.

¹² Jino uze kangelo kaYehova ahanjikile ngwenyi, Ove Yehova wamayongomena, palanga nakumwaka uka numba ukevwile Yelusalema keke namembo aYuta awa unevwila matoto myakeyi makumi atanu naavali?

¹³ Yehova amukumbulwile kangelo uze ahanjikile nayami namazu amwaza, mazu akumuvendejeka.

¹⁴ Ngoco kangelo uze ahanjikile nayami angwambile ngwenyi, Vilika ngwove, Yehova wamayongomena nambe ngwenyi, Ngunasungwila Yelusalema naZeyone lisungu lyalinene.

¹⁵ Ngwenyi, Ngunasangumuka nandombo yayinene kuli vaka-mafuci eka vaze vanatwame muuholela, mwomwo Ami ngwasangumukile cacindende kaha, oloze vakivo valutwalile lupi cikuma.

¹⁶ Xikaho Yehova nambe ngwenyi, Ngunakinduluka lyehi kuYelusalema navilinga vyakeke. Zuvo yami navayitungulwilamo. Mukiko mwanambe Yehova wamayongomena. Ngwenyi, Kaha navakanyika wanda wakwesekesa haYelusalema.

¹⁷ Vilika ceka nawa ngwove, Yehova wamayongomena nambe ngwenyi, Kumembo ami nakwiza kusupuka ceka kuwaha, Yehova mweza kuvendejeka ceka Zeyone, mweza kusakula Yelusalema.

Kapolofweto navamumwenesa jimbinga navaka-kusonga

¹⁸ Jino ngwandwile meso ami nakutala, kaha kumana, kwapwile jimbinga jiwana.

¹⁹ Ngwamwihwile kangelo uze ahanjikile nayami ngwami, Eji jika? Angukumbulwile ngwenyi, Eji jikiko jimbingojo jinamwange lyehi Yuta naIsalele naYelusalema.

²⁰ Yehova angumwenesele nawa vaka-kusonga vawana.

²¹ Ngwamwihwile ngwami, Ava vaneza mangana valinge muka? Kaha angukumbulwile ngwenyi, Eji jikiko jimbingojo jinamwange lyehi Yuta, ngoco kakwapwile mutu andwile mutwe wenyiko. Oloze ava vaneza mangana vajizuzwise nawoma, mangana vakambile jimbinga javakamafuci eka hamavu, ava vazundwile lifuci lyaYuta jimbinga javo mangana valimwange mwamwa.