YOWELE 1 - Luvale Bible 1970

Lifuci navalinongcsa kuli Vambimba-makumbi

¹ Awa akiko mazu aYehova aze ejile kuli Yowele mwanaPetwele.

² Enu vakulwane, ivwililenu eci. Enu mwatwama mulifuci muvosena, tengelekenu matwitwi enu. Cumeci casoloka lyehi hamakumbi enu, cipwe hamakumbi avakakuluka jenu numba?

³ Kavahicilenumo vana venu, vana venu vakavahicilemo vana vavo, kaha vana vavo vakavahicilemo vaka-cisemunwino ceka.

⁴ Ovyo vanaseze vasenya Vambimba-makumbi vanavili, kahovyo vanaseze Vambimba-makumbi vasamuyandulu vanavili, kahovyo vanaseze vasamuyandulu vambimba-kalunga vanavili.

⁵ Enu vaka-kupenda, tonenu, lilenu. Enu mweji kunwanga vinyo, kalwomwokenu havinyo vyavihya, mwomwo vanaviteteko lyehi kutunwa twenu, xikaho.

⁶ Mwomwo halifuci lyami hanakanduka lyehi vaka-muyaci wakujikiza, ava vanahono vatu kulava. Mazo avo anapu mazo aundumba, vali namazo mujimbange javo nge awa andumba wacihwevo.

⁷ Muvinyo wami vanawenyeka lyehi, mukuyu wami vanauhulu lyehi, vanauhulula cakuuhulula, vanaumbili, mitango yawo vanayitomesa.

⁸ Lilenu nganomu mwalinga mwanapwevo nalijingilika vikelei nakulila lunga lyenyi wahawana wenyi waupwevo.

⁹ Mawana akulya namawana akuhingununa vanawateteko lyehi kuzuvo yaYehova. Vangamba jaYehova vapilixitu vali nakulixona.

¹⁰ Mawande vanawenyeka lyehi, mavu ali nakulixona, mwomwo kulya camanona vanacenyeka lyehi, wala wamihako yavinyo unominako, maji ali nakulehuka.

¹¹ Enu vanjimi, ivwenu sonyi, enu mweji kunonganga mivinyo, kalwomwokenu, hatiliku nambale, mwomwo evi vyakwima kumawande vinanongo lyehi, xikaho.

¹² Mivinyo yinominyina, mikuyu yinalehuka, namiloma namikoma nawa namitondo yamihako yeka, mitondo yamuvipapa yosena yinominyina, mwomwo cisambo cinominyina nakufuma kuli vana vavatu.

¹³ Enu vapilixitu, lijingilikenu vikelei, lilenu, enu mweji kuzacilanga kulijiko lyakulumbila, kalwomwokenu. Enu mweji kumuzacilanga Kalunga kami, twayenu, Savalenu ufuku wosena nakuvwala vikelei. Mwomwo mawana akulya namawana akuhingununa vanawakanyisa kwiza kuzuvo yaKalunga kenu, xikaho.

¹⁴ Jilikenu kulitwamina kulya, Vilikenu kuunga cacilemu, vakulwane navava vatwama mulifuci vosena vakungulwilenu kuzuvo yaKalunga kenu Yehova, mukatetenga kuli Yehova.

¹⁵ Mama lelo, likumbi kana! Mwomwo likumbi lyaYehova lili hakamwihi, kaha naliza nge hikwenyeka cakuli Ukweci ngolo josena.

¹⁶ Kulya vanaciteteko lyehi kumeso etu nyi? nakuwahilila nakukinyinyina vanaviteteko lyehi kuzuvo yaKalunga ketu nyi?

¹⁷ Mbuto jili nakupolela muxi yamaundu amavu, visete vanaviseze vyahwilici, jizuvo jakusweka kulya jinaxiuka, mwomwo kulya camanona cinominyina, xikaho.

¹⁸ Tunyama omwo navaliximwokela! Mautanga avangombe veji kuhilasananga, mwomwo kavexi nauliloko, xikaho. Namautanga avimuna vavandende nawa vanawapayisa.

¹⁹ Ove Yehova, yove vene nangusanyika, mwomwo kakahya kanali lyehi malilo amupambo, milangi yinawemesa lyehi mitondo yamuvipapa yosena.

²⁰ Natunyama vamuvipapa nawa navakulembelela, mwomwo tulwiji vameya vanominyina lyehi, kaha kakahya kanali lyehi malilo amupambo, xikaho.