WAYUTA 1 - Luvale Bible 1970

Yuta mwavameneka

¹ Ami Yuta, ngundungo yaYesu Kulixitu, ngundumbwaYakova, kuli enu vasanyika, enu vazanga muli Kalunga Setu, enu vamulamina Yesu Kulixitu.

² Kuli enu kupwenga kutetela nakuunda, kaha zangi yimivulile cikuma.

Omu navakapayisa vaka-kunangula mwakwonga

³ Enu ngwazanga, ami hakwanguhwisa kusoneka kuli enu ngwami, nguvuluke ulwilo ou wakutulwila tuvosena hamwe, ngwevwanga kulemuwa mumucima wami ngwami, ngusoneke kuli enu nakumilembelela ngwami, Lwenunga cikuma mulamenga lufwelelo kanelu vahana kamwe kaha kunahu kuli vaka-kujila.

⁴ Mwomwo kuli vatu vamwe vanengila muli etu nakulivembelamo, vaze vasonekelele hamwaka kukuvapayisa ngoco. Vakivo vaka-kuzamukila Kalunga, likoji lyaKalunga ketu veji kulyalumunanga kupwa nge kuzunguma kaha, kaha Uze apwa uka wenyi Mwangana wetu, Mwata wetu Yesu Kulixitu, veji kumuhamikilanga.

⁵ Kaha jino, cipwe munatacikiza lyehi vyuma vyosena kanawa, oloze ngunasake ngwami, ngumyanukise, ngwami, omu alingile Yehova hanalwili lyehi vatu mulifuci lyaEjipitu, oloze hakukuminyina avanongesele vaze vakanyine kufwelela.

⁶ Kaha vangelo nawa vaze vakanyine kulama mwavo mwakulivanga, vaze vafumine kwavo kuze vatwaminenga, avalama palanga nakukusopesa kana cahalikumbi lyalinene mumalenge ahaya myaka yosena mumilima.

⁷ Nge vaka-Sotome-naNgomola nawa, namembo akulihatako, hakuya nge omu vanayi lyehi ava nakulyeca kuujila nakukava mijimba yeka, vavenyika kupwa vakutalilaho, vali nakumona kuvazangamisa nakakahya kahaya myaka yosena.

⁸ Oloze ngoco navava nawa, kukulota cavo veji kupihisanga cisemwa cahamavu, veji kuleununanga mawata nakusaula vaka-ulemu.

⁹ Oloze Mikayele, uze kangelo wakulitulaho, omu alihamikile naliyavolo nakulijingisa nenyi hamujimba waMose, kahasukile nakumusopesa nakasautuko, oloze amwambile ngwenyi, Yehova akuhanjikile.

¹⁰ Oloze ava, vyexovyo vahona kutacikiza veji kuvisaulanga, kaha vyexovyo vinavalumbunukila kucisemwa cavo nge omu mwatunyama vakuhona mangana, kuvyumevi veji kulyenyekanga.

¹¹ Mama lelo hali vakivo! mwomwo vanayi lyehi mujila yaKena, vanalihingunwina mukuhungumuka caMbalame hakukava fweto, kaha vananongo mukulingulula caKola.

¹² Ava vakivo vene vaze vanapu nge malolwa akujimina muviwanyino vyenu vyazangi, hakulya nayenu hamwe cakuzeneka woma, vakivo tufunga vakulilisa vavene, vakivo mavwi akuzeneka vula akukakwomwoka najipeho, vakivo mitondo yahamwaka wakwima yakuzeneka mihako, yinomu kavali, vanayivunyumo namiji zovo.

¹³ Vakivo makimba akutenuka akukalungalwiji, akutupwoka lifululu lyasonyi yavo vavene, vakivo vatanganyika vakucamangila, ava valamina kwilava camilima nahaya myaka yosena.

¹⁴ Ava nawa Enoke avavulukile naupolofweto wenyi, ikiye apwile wamucitanu navavali hakufuma kuli Alama, ngwenyi, Tala, Mwata ejile navaka-kujila jenyi tununu,

¹⁵ mangana ngwenyi, akasopese vatu vosena, akavahanjikile vakakuzamukila Kalunga vosena havilinga vyavo vyakuzamukila Kalunga vyosena, vize valingile nakuzamukila Kalunga, nahamazu amakalu osenaze vanamufulilila nawo vakaxili vaka-kuzamukila Kalunga.

¹⁶ Ava vanapu vaka-kuyayavala, vaka-kutatwoka, veji kutambukanga nge mwaya kufwila cavo cacipi ceka naceka, kaha tunwa twavo tweji kuhanjejekanga mazu akulitukwojola, veji kukomokanga vatu kumeso avo, mangana vakawanyineho vyuma.

Mwavahuhumuna, mwavalembelela

¹⁷ Oloze enu ngwazanga, enu kwenu anukenu mazu aze vahanjikile hakulivanga kuli vaposetolo jaMwata wetu Yesu Kulixitu,

¹⁸ omu vamilwezele ngwavo, Hamyaka yakukuminyina nahakasoloka vaka-kuhenda, navakatambuka nge mwaya kufwila cavo vavene ceka naceka cakuzamukila Kalunga.

¹⁹ Ava vakivo vaze vaka-kuhandununa vakwavo, vaka-myono yakuhwima kaha, kavexi naXipilituko.

²⁰ Oloze, enu ngwazanga, enu kwenu hakulitunga mukufwelela cenu cajila cikuma, hakulomba muli Xipilitu wajila,

²¹ lilaminenunga muzangi yaKalunga, talililenunga kutetela caMwata wetu Yesu Kulixitu cakutwala kukuyoya cahaya myaka yosena.

²² Kaha vamwe vatetelenu, vakivo vaka-kukakasana.

²³ Veka valwilenu hakuvokola mukakahya. Veka vatetelenu nawoma, hakuhunga cipwe lihina lize linatambula lyehi kupihya cacisemwa cahamavu.

Mwavakisula

²⁴ Jino kuli Uze nahase kumikinganga kucina namulimbuka, nakumimika kumeso aupahu wenyi mukulisamba, cakuzeneka katenga,

²⁵ kuli Uze apwa uka wenyi kaha Mulwilo wetu Kalunga, muli Yesu Kulixitu Mwata wetu, kuli Ikiye kupwenga upahu naukelenga nawata nangolo, kufumisa haze yapwile myaka yosena kanda, noholili, nahaya myaka yosena. Amene.