NEHEMIAH 1 - Luvale Bible 1970

Nehemiya mwalombela Yelusalema

¹ Awa akiko mazu aNehemiya mwanaHakaliya walunga. Jino casolokele hakakweji Kixileve, hamwaka wakusokesa muma­kumi avali, omu ngwapwile ami muXuxane muzuvo yawangana,

² kuli vandumbwami kwejile umwe, ou Hananyi, ikiye namalunga vamu­Yuta vamwe. Ngwavehwile hali va­Yuleya vaze vapwile vanayovoka lyehi, vaze vasalileho kuli vafunge, nahaYelusalema.

³ Vangukumbulwile ngwavo, Vaze vanasaleho kuli vafunge kuze kulifuci lize vali nakumona lupi lwalunene nakuvatomba. Kembwe yaYelusa­lema nawa vanayipuzwojola, kaha kuvikolo vyayo vanocoko lyehi na­kakahya.

⁴ Jino casolokele, omu ngwevwile mazu awa ngwatwamine nakulila, ngwalixonenenga makumbi amwe. Ngwalitwaminyine kulya, ngwalombele kumeso aKalunga kalilu,

⁵ ngwami, Ove Yehova Kalunga kalilu, Ove Kalunga wamunene Wa­kwivwisa woma, Ove weji kulamanga luxiko lwove nalikoji lyove hali ava vakuzanga veji kulamanga jiximbi jove,

⁶ acitengeleke jino litwitwi lyove, meso ove atone, mangana wivwilile kulomba cayami ngamba yove eci nguli nakulomba lelo namusana naufuku kumeso ove hali vangamba jove vana vaIsalele, ximbu nangwitavila milonga yavana vaIsalele yaxili eyi tunakuvulumuna. Camwenemwe­ne, etu navava vakuzuvo yatata tuna­vulumuna.

⁷ Tunalyenyeka cakulyenyeka kuli Ove, katwalamine jiximbi joveko, cipwe vilika vyove, cipwe mazu ove akuyulako, evi wamulwezele ngamba yove Mose.

⁸ Acanuke lizu lize wamulwezele ngamba yove Mose ngwove, Kaci nge enu namukahengesa, kahAmi nangukamipuzumwina muli vatu ve­ka naveka.

⁹ Oloze kaci nge namukakinduluka kuli Ami nakulama jiximbi jami nakujilinga, cipwe vakwenu ava va­nahange navakapwa kusongosongo yalilu, oloze nangukavakungulula kuze, nangukavaneha oku kuma ngunasakula nakutwamisako lijina lyami.

¹⁰ Jino ava vakivo vangamba jove, vatu jove, vakivo vene ava unasokola natwima jove jajivulu nalivoko lyove lyangolo.

¹¹ Ove Mwata, acitengeleke litwitwi lyove kukulomba cayami ngamba yove nakukulomba cavangamba jove ava vanevu kuwaha hakwivwa li­jina lyove woma, acingufukixile ami ngamba yove likumbi lyalelo, ungumwenese kungutetela kumeso alungou. Jino ami ngwapwile ngumukakumuhana mwangana lupasa.