NAHUME 1 - Luvale Bible 1970

Ndombo yaYehova

¹ Eci cikiko citeli caNyineve. Ou ukiko mukanda waceci vamumwenesele Nahume wakuElekoxe.

² Yehova Ikiye Kalunga Walisungu Muka-kulitenda. Yehova eji kulitenda, ukweci kulundundu. Yehova eji kulitendanga kuli vaka-kumwimanyina nakole, eji kuvalaminanga vaka-kole jenyi ndombo.

³ Yehova napu wakuxipwokela kutenuka, wamunene nangolo, kusambisa kexi kukasambisava vatela kupayisako. Yehova ali najila yenyi mucijimbilanganga namunyamanganda, kaha mavwi anapu lukungu lwakumahinji enyi.

⁴ Mwahanjikila kalungalwiji nakumumisa, tulwiji vosena nawa mwavomisa cau. KuMbaxane nakulehuka, nakuKalamele nawa. Jitemo jakuLevanone najilehuka.

⁵ Jipili jajinene jeji kundendanga hali Ikiye, jipili jajindende najinowa. Mavu Mwalizundula kumeso enyi, hano hakaye navosenava vatwamaho.

⁶ Iyaze mwemana kumeso amatoto enyi? Iyaze mwatwama muliyena lyautenu wenyi? Kulundundu yenyi mwayihingununa nge kakahya, kaha malolwa navawapuzwojola kuli Ikiye.

⁷ Yehova Ikiye wamwaza, Ikiye mwakukakama halikumbi lyaluyando, avatacikizava navacinyina muli Ikiye.

⁸ Oloze kuma kwalyo mwakakumisako nalivaji lyakupapa, kaha vakakole jenyi mwakavahangila mumilima.

⁹ Namujina ika kuli Yehova? Mwakalinga kukumisa. Luyando kalwexi kukakatuka kamucivaliko.

¹⁰ Mwomwo vakivo hakuliselwojola nge vikwata, hakupenda nawala wavo, vanavali vosena ndolokoto nge vijinji vyamwila vyaumu.

¹¹ Muli ove munalovoka umwe wakujina kumupihisa Yehova, ou wakulweza vakwavo mwauvihu.

¹² Yehova nambe ngwenyi, Cipwe vanasu, cipwe vanapu vavavulu, cipwe ngoco navakavatema, kaha mwakahita. Cipwe ngunakumwenesa lyehi malwa, oloze kangwexi kukakumwenesa ceka malwako.

¹³ Kaha jino nangukuhokola toka yenyi, jikuli jove nangujihokwojola hokohoko.

¹⁴ Yehova nahane lyehi luximbi hali ove ngwenyi, Kulijina lyove kavexi kukakuvako cekako. Muzuvo yatulunga twove nangukatetamo makombelo akusonga namakombelo akuzuzulula. Nangukafula cimbumbe cove, mwomwo unapu uwakuzonda, xikaho.

Mujimbu wakulindumuka caNyineve

¹⁵ Talenu, hajipili hali mahinji ayou mwambulula mujimbu wamwaza, ou mwevwakanyisa kuunda! Ove Yuta, lamanga Viwanyino vyove, tesamo omu unaxiki, mwomwo kavihu kexi kukahita ceka muli oveko, vanamuteteko lyehi nakumulalisa.